Friday, September 30, 2016

အာဆီယံ ပါလီမန်များ ညီလာခံ ဥက္ကဋ္ဌရာထူးနှင့် အာဆီယံ ပါလီမန်များ ညီလာခံ အထွေထွေ အတွင်းရေးမှူးချုပ် ရာထူး လွှဲပြောင်းပေးအပ်ပွဲကျင်းပ


နေပြည်တော် စက်တင်ဘာ ၃၀
(၃၇) ကြိမ်မြောက် အာဆီယံ ပါလီမန်များ အထွေထွေ ညီလာခံ၏ အာဆီယံပါလီမန် များ ညီလာခံ ဥက္ကဋ္ဌ ရာထူးနှင့် အာဆီယံ ပါလီမန်များညီလာခံ အထွေထွေ အတွင်းရေး မှူးချုပ်ရာထူး လွှဲပြောင်းပေးအပ်ပွဲ အခမ်း အနားကို ယနေ့နံနက်(၈)နာရီခွဲတွင် နေပြည်တော်ရှိ မြန်မာအပြည်ပြည် ဆိုင်ရာ ကွန်ဗင်းရှင်းဗဟိုဌာန အမှတ်(၁) (MICC – 1) မြခန်းမ၌ ကျင်းပရာ ပြည်ထောင်စုလွှတ်တော် နာယက၊ အမျိုးသားလွှတ်တော် ဥက္ကဋ္ဌ မန်းဝင်းခိုင်သန်းက အာဆီယံပါလီမန်များညီလာခံဥက္ကဋ္ဌရာထူးကို လွှဲပြောင်းလက်ခံသည်။

အခမ်းအနားတွင် မလေးရှားနိုင်ငံ အောက်လွှတ်တော် ဒုတိယဥက္ကဋ္ဌ ဒါတု ရိုနယ်လ် ကီယန်ဒီ က  နှုတ်ခွန်းဆက် စကားပြောကြားပြီး အာဆီယံ ပါလီမန်များ ညီလာခံ ဥက္ကဋ္ဌ ရာထူး၊ အဆောင်အယောင်ဖြစ်သည့် တူနှင့် AIPA အလံတို့ကို ပြည်ထောင်စုလွှတ်တော် နာယက၊ အမျိုးသားလွှတ်တော်ဥက္ကဋ္ဌ မန်းဝင်းခိုင်သန်းထံသို့ လွှဲပြောင်း ပေးအပ်သည်။
ထို့နောက် အာဆီယံပါလီမန်များ ညီလာခံ ဥက္ကဋ္ဌ ပြည်ထောင်စုလွှတ်တော် နာယကမန်းဝင်းခိုင်သန်းက ကြိုဆိုနှုတ်ခွန်းဆက် စကားပြောကြားရာတွင် ပြည်ထောင်စု လွှတ်တော်အနေဖြင့် ဒုတိယသက်တမ်းတွင် အာဆီယံပါလီမန်များ အထွေထွေ ညီလာခံကို ပထမဆုံး အကြိမ် လက်ခံကျင်းပရသည့်အတွက် ဂုဏ်ယူ ပါကြောင်း၊ အာဆီယံ ပါလီမန်များ အထွေထွေ ညီလာခံဥက္ကဋ္ဌအဖြစ် တာဝန်ထမ်းဆောင်ခဲ့သော မလေးရှား အောက်လွှတ် တော် ဥက္ကဋ္ဌ တန်စရီ ဒါတုပန်ဒီကာ အာမင်မူလီယာအား အာဆီယံ ပါလီမန်များ ညီလာခံကို ဦးဆောင် ဦးရွက်ပြုခဲ့သည့်အတွက် အထူးပင် ကျေးဇူးတင်ရှိပါကြောင်း၊ ၂၀၁၄ ခုနှစ် (၃၅) ကြိမ်မြောက် အာဆီယံ ပါလီမန်များ အထွေထွေညီလာခံ ကျင်းပပြီးစီးသည့် အချိန်မှ စ၍ ယခု ၂၀၁၆ ခုနှစ်တွင် ကျင်းပသော (၃၇) ကြိမ်မြောက် အာဆီယံ ပါလီမန်များ အထွေထွေ ညီလာခံအထိ ဥက္ကဋ္ဌတာဝန်ကို ဆက်လက် ထမ်းဆောင်ရန် သဘောထား ကြီးမှုသည် အာဆီယံ ပါလီမန်များ ညီလာခံ၏ အောင်မြင်မှုအတွက် တန်ဖိုးကြီး မားသော လုပ်ဆောင်မှု တစ်ရပ်အဖြစ် မိမိတို့အားလုံးက အသိအမှတ် ပြုပါကြောင်း။
အာဆီယံ ပါလီမန်များ ညီလာခံ၏ ဖွဲ့စည်းပုံ စည်းမျဉ်းနှင့်အညီ နှစ်စဉ် အထွေထွေ ညီလာခံ ကျင်းပ နိုင်ရေးအတွက်  အဘက်ဘက်မှ ကြိုးပမ်းဆောင်ရွက်ပေးသည့် အထွေထွေ အတွင်းရေးမှူးချုပ် မစ္စတာ ပီအိုရမ်အား ကျေးဇူးတင်ရှိပါကြောင်း၊ ပြည်ထောင်စုလွှတ်တော် အနေဖြင့် ယခုညီလာခံပြင်ဆင်ရေးအတွက် အဆင့်မြင့် ကော်မတီတစ်ရပ် ဖွဲ့စည်းခဲ့ပြီး အာဆီယံ ပါလီမန်များ ညီလာခံ အဖွဲ့ဝင် လွှတ်တော်များ၊ အထွေထွေ အတွင်းရေးမှူးချုပ်ရုံးတို့နှင့် အနီးကပ် ပူးပေါင်းဆောင်ရွက်ခဲ့ပါကြောင်း၊ ညီလာခံသို့ လွှတ်တော် အသီးသီးမှ ဥက္ကဋ္ဌများ၊ ဒုတိယဥက္ကဋ္ဌများ ဦးဆောင်သည့် ကိုယ်စားလှယ်အဖွဲ့များ တက်ရောက်လာခြင်းနှင့် အမျိုးသမီးလွှတ်တော် ဥက္ကဋ္ဌများ ပါရှိလာခြင်းသည် အားတက်ဖွယ်ဖြစ်ပါကြောင်း၊ (၃၇) ကြိမ်မြောက် အာဆီယံ ပါလီမန်များ ညီလာခံ ဥက္ကဋ္ဌ အနေဖြင့် ညီလာခံ အောင်မြင်စွာ ကျင်းပနိုင်ရေးအတွက် အစွမ်းကုန် ကြိုးစားသွားမည် ဖြစ်ပါကြောင်း ပြောကြားသည်။
ယင်းနောက် အာဆီယံ ပါလီမန်များ အထွေထွေ အတွင်းရေးမှူးချုပ် ရာထူးကို လက်ရှိ တာဝန်ထမ်းဆောင်နေသည့် စင်ကာပူနိုင်ငံမှ မစ္စတာ ပီအိုရမ်က ထိုင်းနိုင်ငံမှ Mr. Isra Sunthornvat ထံသို့လွှဲပြောင်းပေးအပ်သည်။
ယင်းနောက် အာဆီယံပါလီမန်များ ညီလာခံ အမှုဆောင်ကော်မတီ အစည်းအဝေး ကို ဆက်လက် ကျင်းပသည်။

အစည်းအဝေးအပြီးတွင်  ပြည်ထောင်စု လွှတ်တော် နာယကသည် ညီလာခံသို့ တက်ရောက်လာသည့် အာဆီယံ ပါလီမန်များမှ ကိုယ်စားလှယ် အဖွဲ့ခေါင်းဆောင်များ၊ AIPA နှင့် ပူးပေါင်းဆောင်ရွက် လျက်ရှိသည့် နိုင်ငံ တကာ မိတ်ဖက်အဖွဲ့အစည်းများမှ တာဝန်ရှိသူများအား ရင်းရင်းနှီးနှီး တွေ့ဆုံသည်။

No comments:

Post a Comment