ကျုံးရိပ်၊ ကြာရိပ်၊ မြစ်ဆိပ်နေရီ အာဠ၀ီ " စီ " လမ်း

ဆူးငှက်

သာသနာ့လင်္ကာရကျောင်းတိုက်ဆီက အုန်းမောင်း ခေါက်သံကြားရပြီး အရှေ့ဆီမျှော်ကြည့်လိုက်တော့ မှိုင်း ညို့ညို့ရှမ်းရိုးမ အထက်က အက်ကြောင်းထင်၏။ ရောင်နီ သည် အက်ကြောင်းမှတိုးကာတိုးကာ ရုန်းထသည်။ ကောင်းကင်သည် ပါးလွှာလာ၏။ တိမ်အနားတစ်ဝိုက် အက်ရာများဆက်လာချေပြီ။ အနီရောင်တိမ်နားသတ်၏။ မှိုင်းသောကောင်းကင် ကြည်စပြုလာချေပြီ။

သည်အခါတွင်မှ ''ကြေးမုံတံခါး'' ၏ ပြာသာဒ်ဆောင် သည် ကိုယ်ထင်ပြလာတော့သည်။ အချိုးကျလှပ လှသော ပြာ သာဒ်ဆောင်သည် အရုဏ်ကျင်းစ ကောင်းကင်ဝယ် စွင့်နေ၏။ နောက်ခံရှမ်းရိုးမက ကောင်းကင်နှင့် နီညိုညို အုတ်မြို့ရိုးကြီး အကြား အချိုးညီသွားစေသည်။

မန္တလေး နန်းမြို့ရိုးပတ်လည်မှ လင်းအရုဏ်တက်အလှ ကို ဟောသည် ကြေးမုံတံခါးမှကြည့်ရလျှင် ပြီးပြည့်စုံချေ ပြီ။ တကယ်တော့ ကြေးမုံတံခါးကို မန္တလေးသားတွေ နှုတ် ကျိုးခေါ်ဝေါ်နေတာက''အာဠဝီတံခါး''ဟူ၍ဖြစ်၏။ အမရ ပူရမြို့ဟောင်းတွင် တွင်ကျယ်နေသော အမည်ဖြစ်သဖြင့် အမရပူရမှမန္တလေးသို့ ပြောင်းလာ သူတွေအဖို့ နှုတ် ကျိုး နေကြခြင်းဖြစ်ပေသည်။

''ကြေးမုံတံခါး''က နန်းမြို့ရိုးအနောက်မျက်နှာတောင် ဘက်အစွန်တွင်ရှိသည်။ သစ်တောဝန်မင်းကျော်မင်းလှ စည်သူကြီးကြပ် တည်ဆောက်၏။ မိတ်တံခါး ''ဂဗ္ဗေ''ဟူသော ဓာတ်သက်နံသင့် အက္ခရာကို ယူ၍ ''ကြေးမုံ'' တံခါးဟု သမုတ်သည်။ ကြေးမုံတံခါးမှသည် ကျုံးကိုကျုံးကူးတံတားဖြင့် ကူးဖြတ်ထား၏။ တံတားများ၏ ဟိုဘက်ထိပ် သည်ဘက်ထိပ် များကို အုတ်အင်္ဂတေဖြင့် ခိုင်မာစွာ တည်ဆောက်ထားနိုင် ပြီး ထုံးဖွေးဖွေး ခြယ်သထားသည်။ ထိုအုတ်တံတားတွင် တံတားလက် ရုံးနှင့်တကွ မုခ်တိုင်(၇)တိုင်ကျစီ တစ်ဖက် တစ်ချက်၌ရှိသည်။ အုတ်တံတိုင်းနှစ်ခုက ကျုံးဘက် တဖြည်းဖြည်းမြင့် တက်သွားကြပြီး ကျုံးအလယ် ရောက်ကာမှ ကွက်လပ်ကျန်သွားတော့သည်။ ထိုကွက်လပ်ကား ဖြုတ်၍ တပ်၍ အလွယ်တကူ ရနိုင်သော တံတားနင်းကြမ်းအရှင်ဖြင့် ဆက်စပ်ထားတော့၏။ နင်းကြမ်းနှင့် လက်ရန်းတိုင်များကို ကျွန်းသစ်ဖြင့် ဆောက်လုပ်ကာ ဟင်္သာပြဒါးရောင် သုတ်လိမ်း ထားလေတော့သည်။

ဖြူဖွေးသောကျုံးကူး တံတား၊ အနီရောင် လက်ရန်းတိုင်၊ ပြာနှမ်းသော မိုးကောင်ကင်၊ စိမ်းလဲ့လဲ့ကျုံးရေပြင်...။

သည်မြင်ကွင်းထဲမှာမူ ထုထည်အခိုင်အခံ့နှင့် တံတိုင်းမီးတားကြီးထက်ဝယ် နွဲ့နှောင်းပြေပြစ်သည့် ယွန်းဆက် ပြေ တန်ဆောင်းပြာ သာဒ်က မားမားမတ်မတ်။

''ဓာတုမဏ္ဍ၊ ပတ်လည်ချသား၊ ကွန်းမပြာသာဒ်၊ ဒွာဒရသ် လည်း၊ မျဉ်းခတ်တသွန်း၊ စတုကဏ်၌၊ ဗိမာန်လေးသွယ်၊ ဘဝဂ်ကယ်မျှ၊တစ်နယ်တစ်နယ်၊ တစ်လာပယ်မူ၊ ရွှေကြယ် ငွေကြယ်၊ မျက်စုံခြယ်လျက်၊ တိမ်စွယ်ထဲချောင်၊ ရဲရဲပြောင် သည်၊ ရှစ်ဆောင် ရှစ်ဆောင်၊ ရစ်မြှောင်ဝန်းလည်၊ ရွှန်းရွှန်း ကြည်မျှ၊ ရောင်ခြည်တွဲ့တွဲ့၊ ယိုအံ့သကဲ့ သို့၊ လေးဆယ့် ရှစ်တန်၊ ဝေဇယန်လည်း၊ ဘုန်းဝှန်းသတိုး၊ ရှင့်တန်ခိုးကြောင့်၊ လိုစိုး မျက်မှောက်၊ မြေမှပေါက်၏''ဟူ၍ စလေဦးပုညက ရတနာနဒီ မော်ကွန်းလာ စာပိုဒ်ဖြင့် ကျုံး၊ မြို့ရိုး၊ ပြာသာဒ်အလှကို ဖွဲ့ဆိုခဲ့ချေသည် မဟုတ်ပါလော။

အာဠဝီတံခါးခေါ် ကြေးမုံတံခါးနှင့်တည့်တည့် အနောက် ဘက် ဧရာဝတီမြစ်ဆီအထိပေါက်သော လမ်းဖြောင့် ကြီးသည် ''စီ''လမ်းဖြစ်၏။ (၂၂-စီ)လမ်းဟု မန္တလေးသားတို့ သိကြ သည်။ ထို့အတူ အာဠဝီစီ လမ်းဟူ၍လည်း ခေါ်ဝေါ်ကြသေး သည်။

ရှေးတုန်းက အာဠဝီစီလမ်းသည် ယနေ့ (၂၆-ဘီ) လမ်း ကဲ့သို့ပင် စည်ကားခဲ့၏။ ဈေးဆိုင်များ၊ ကုန်တိုက်ကြီးများ ရှိခဲ့၏။ အာဠဝီစီလမ်းပေါ်တွင် စာတိုက်ကြီးရှိသည်။ အေဘီ အမ်ပုံနှိပ်တိုက်ရှိခဲ့သည်။ ယင်းပုံနှိပ်တိုက်မှာ စာအုပ်တိုက် ဆိုင်ကြီးဖြစ်သဖြင့် ကျောင်းသုံးစာအုပ်များ၊ စာရေးကိရိယာ များ ရောင်းချသည်။ ခရစ်စမတ်ကတ်များ၊ စာအိတ်များ လည်းရောင်းချသည်။ ထို့ပြင် မန္တလေးနှင့်ပတ်သက်၍ ပြည့်စုံလှသော စာအုပ်ကြီးတစ်အုပ်ကိုလည်း အာဠဝီစီလမ်း တိုက်နံပါတ် (၁၁)၊ ကိုဘေတင်ထံတွင် ဝယ်ယူနိုင်သည်။ ထို စာအုပ်ကြီးက ပုဂံဝန်ထောက်မင်းဦးတင်၏ ကုန်းဘောင်ဆက် မဟာရာဇဝင်တော်ကြီး သုံးတွဲဖြစ်၏။ တစ်တွဲလျှင် ၆/-၈ဲ နှုန်းဖြစ်သည်။

ထို့ပြင် အာဠဝီစီလမ်းတွင် ဝှိုက်တဝေးလိဒ်ဒလော ကုမ္ပဏီ ကြီးလည်းရှိသည်။ ဝှိုက်တဝေးသည် ရိုးကုမ္ပဏီနှင့် အပြိုင် ဖြစ်သည်။ ဝှိုက်တဝေးမှာ အဝတ်အစားအမျိုးမျိုး၊ အိပ်ရာခင်း အမျိုးမျိုး၊ ဇွန်း၊ ခက်ရင်း၊ ပန်းကန်အမျိုးမျိုး၊ ရှူးဖိနပ်ခြေနင်း အမျိုးမျိုး၊ သေတ္တာအမျိုးမျိုး၊ ခုတင်ပုခက်အမျိုးမျိုး စုံလင် အောင် ရောင်းချသည်။ ယုတ်စွအဆုံး တွယ်ချိတ်အထိရှိသည်။ တွယ်ချိတ်တစ်ဒါဇင်မှ တစ်မူး၊ သူ့တွယ်ချိတ်ကလည်း အာမခံချိတ်တဲ့၊ မပျောက် လို့ကတော့ တစ်သက်လုံးသုံးရော ဆိုသည့် တွယ်ချိတ်မျိုးဖြစ်သည်။

အာဠဝီစီလမ်း တွင် မစ္စကွစ်ကုမ္ပဏီလည်းရှိသည်။ ထို ကုမ္ပဏီကတော့ တယော၊ မယ်ဒလင်၊ စန္ဒရားစသည့် တူရိယာ ပစ္စည်းများနှင့်ဓာတ်စက်ခေါ်ဓာတ်သေတ္တာအမျိုးမျိုး၊ လစဉ် ထုတ်သီချင်း ဓာတ်ပြားများလည်း ရောင်းချရာဌာနဖြစ်သည်။ ထိုခေတ်က စန္ဒရားကို ငွေကြေးတတ်နိုင်သူများသာ ကိုယ်ပိုင် ဝယ်ယူ၍ အင်္ဂလိပ်အတီးသင်နည်း စာအုပ်များဖြင့် စန္ဒရား တီးသင်ကြသည်။ စန္ဒရားသင်ဆရာ ဆရာမများက အများ အားဖြင့် အင်ဂလိုအင်ဒီးယန်းများဖြစ်၏။

''မစ္စကွစ်''မှာ စန္ဒရားများရောင်းသည်။ ထို့ပြင် စန္ဒရားကို ငှားလည်းငှားသည်။ ပြင်လည်းပြင်သည်။ ငွေဒင်္ဂါး တစ်ပြား လျှင် ၁၃ိ/-ကာလက ''မစ္စကွစ်''မှ မို(လ) တရီအမျိုးအစား စန္ဒရားတစ်လုံးကို တစ်လလျှင် တစ်ဆယ့်နှစ်ကျပ်ပေး၍ ငှား ရမ်းကာ အတီးသင်ခဲ့ကြသည်။ မန္တလေးမီးရထားကုန်ရုံ ဝန်ထောက်ကြီး၏ သမီးသုံးယောက်အနက်မှ တစ်ယောက် သည် နောင်အခါနာမည်ကျော် ''မိုးဒေဝါမလှရွှေ'' ဖြစ်လာခဲ့ဖူး သည်။

ထို့အတူ ''မစ္စကွစ်''မှ ဗီသိုဗင်၏ ဆင်ဖိုနီအမှတ်(၅)၊ ၁၂ လက်မဓာတ်ပြားတွဲကိုဝယ်ကာ ဓာတ်စက်တွင်ဖွင့်ပြီး နားထောင်၊ ဓာတ်ပြားအဖုံးအယ်လ်ဘမ်တွင် ပုံနှိပ်ထား သည့် ဆင်ဖိုနီမိတ်ဆက်စာကို ဖတ်ရှု၊ ဂီတ သင်္ကေတများ ကိုမှတ်သားပြီး ဘယ်အသွားဘယ်လိုဖွဲ့၊ ဘယ်တူရိယာ ဘယ်လိုအသုံးချသည်ကို လေ့လာ ခဲ့ကြသည့် မန္တလေးသား ဂီတ ဝါသနာရှင် လူငယ်တစ်စုတွင် နောင်အခါ ဒါးတန်းဦးသန့် ဖြစ်မည့်လူငယ်၊ မြို့မငြိမ်းဖြစ်မည့်လူငယ်လည်း ပါရှိခဲ့သည်။

တကယ်တော့ အာဠဝီစီလမ်းသည် ပဒေသရာဇ် ရှင်ဘုရင် လက်ထက်က ''အမင်္ဂလာလမ်း'' ဖြစ်ခဲ့၏။ အာဠဝီတံခါးခေါ် ကြေးမုံတံခါးသည်ပင် ''ဂဗ္ဗေ''ဟူသည့် ဓာတ်ဘက်နံသင့် အက္ခရာယူသော်လည်း တစ်နည်းအားဖြင့် နန်းမြို့တွင်းမှ သေသောသူတို့ကို ထုတ်ဆောင်ရာ အမင်္ဂလာတံခါးဖြစ်သော ကြောင့် ၎င်းတံခါးမှ ဝင်ထွက်သွားလာ မကြာမကြာကြုံတွေ့ ရသောသူများသည် မရဏဿတိကမ္မဋ္ဌာန်းကို မှန်ကြေးမုံပြင် ကဲ့သို့ အာရုံပြုကြည့်ရှုကြကုန်လော့ဟု သတိပေးသော အထိမ်း အမှတ်ဖြင့် ''ကြေးမုံ'' တံခါးဟု သမုတ်ခဲ့ခြင်းလည်းဖြစ်သည်။

နန်းမြို့တွင်းတွင် ဒင်္ဂါးစက်ရုံတော် တောင်ဘက်ကပ်လျက် တွင်မူ သင်္ချိုင်းတော်များရှိပါ၏။ ထိုသင်္ချိုင်း တော်များတွင် ပဉ္စမသင်္ဂါယနာတော်တင် မင်းတုန်းမင်း တရားကြီး၊ ရွှေဘို မင်းတရား၏ အဂ္ဂမဟေ သီမိဖုရားခေါင်ကြီး၊ သီပေါမင်း၏ မယ်တော်လောင်းရှည် မိဖုရားကြီးနှင့် ဆင်ဖြူမရှင်မိဖုရား ကြီးတို့၏ ဂူဗိမာန်ကြီးများရှိသည်။

ထို့ပြင်မြောက်ဥယျာဉ် တော် ရွှေပြည်ဥယျာဉ်ကွက်အတွင်းတွင် တောင်မိဖုရား ခေါင်ကြီးသင်္ချိုင်းတော်ရှိသလို သစ်တပ်အနောက်မြောက် ထောင့်တွင်လည်း မြောက်နန်းမတော်မိဖုရားသင်္ချိုင်းတော် တစ်ခုရှိသည်။ ကျန်ရှိ သည့်မင်းညီမင်းသား၊ မှူးကြီးမတ်ရာ သေနာပတိများ၏ သင်္ချိုင်းတော်သည် အာဠဝတီလမ်းအတိုင်း အနောက် ဆင်းသောအခါ ရွှေတချောင်းမြောင်းအလွန်၊ မြစ်ဆိပ်အကြားတွင် အသီးသီးရှိခဲ့ကြ၏။

အာဠဝီစီလမ်း၏ ရွှေတချောင်းမြောင်းကူးသစ်သား တံတားကြီးမှာ ဇရပ်ကြီးနှစ်ဆောင်ပါရှိ၏။ ကျွန်း၊ ပွတ်လုံး၊ လက်ရန်းတိုင်ကြီးများပင်ပါရှိသည်။ လွန်ခဲ့သော ဆယ့်လေး ငါးနှစ်ကာလ၊ လမ်းတိုးချဲ့သောအခါ ရှေးဟောင်းဇရပ်ကြီး များကို ဖျက်သိမ်းလိုက်ကြသည်။

ရွှေတချောင်းမြောင်း ပေါင်ပေါ်တွင် မတ္တရာသွားမီးရထား လမ်းကလေးရှိခဲ့ဖူးသည်။ မန္တလေး-မတ္တရာသွား မီးရထားဘူတာ လေးက ၂၆-ဘီလမ်းနှင့် ရွှေတချောင်းမြောင်းပေါင်မှာရှိ သည်။

ထိုနေရာတွင် ရွှေတချောင်းလှေဆိပ်ရှိ၏။ မီးရထားက မစ္စတာမနက်ဂျီခေါ် ကုလားသူဌေးပိုင်သည်။ မြန်မာ များက ''မနှင်းဆီရထား'' ဟု ခေါ်တွင်ခဲ့ကြ၏။ ဘူတာလေးအနီး တွင် ''ဆိုင်ဒူခန်း''ခေါ်သည့် လက်ဖက်ရည်ဆိုင် တစ်ဆိုင်ရှိသည်။ လက်ဖက်ရည်တစ်ခွက်သုံးပြား၊ ယင်းလက်ဖက်ရည် ဆိုင်တွင် ''မြို့မဗုဒ္ဓဝေယျာ ဝစ္စတူရိယာအသင်း'' သားများ ထိုင်တတ်သည်။ မြို့မအသင်းသားများက အနောက်နား ဆိုင်းတန်းရပ်ရှိ ဧရာဝတီစာရေးကြီး ဦးမြသိန်းအိမ်မှာ အမြဲ တန်းစတည်းချကြသည်။ 

''မနှင်းဆီရထား'' လေးသည် အာဠဝီစီလမ်းမရောက်မီ (ယခု ၈၄-လမ်းနှင့် ၂၃-လမ်းထောင့်၊ မေမန်းဝင်းကြီး)တွင် ရထားစက်ခေါင်းရေဖြည့်သည်။ တစ်ခါတစ်ရံ မီးပေါင် မတက်သဖြင့် စီလမ်း-သင်္ချိုင်းတော်တံတားအတက်ကို ခရီးသည်များက ဆင်းတွန်းကြရသည်။

တောင်ပြုန်းပွဲတော် အခါများဆိုလျှင် ရွှေတံချောင်း တွင် လှေလောင်းနှစ်စင်းတွဲ၍ ရေခင်းသံမြိုင်မြိုင်ဖြင့် နတ်ပွဲ သွားကြသူများကို အာဠဝီစီလမ်းသင်္ချိုင်းတော်တံတား ပေါ်မှ ကြည့်ရှုကြရသေး၏။

ရွှေတချောင်း အနောက်ဘက်ကမ်း စီလမ်းဘေးတွင် သီပေါမင်းသားအပါအဝင် မင်းညီမင်းသားများ ပညာသင် ခဲ့ကြသည့် ဒိုင်အိုသံတဲကျောင်းတော်ကြီးရှိသည်။ ¤င်း ကျောင်းတော်ကြီးကို ၁၂၃၁ ခု၊ နတ်တော်လပြည့်ကျော် ၁၁ ရက် (၄-၆-၁၈၆၉) နေ့တွင် ဆောက်လုပ်ပြီးစီးသည်။

သင်္ချိုင်းတော်တံတားသည် ရွှေတချောင်းကိုဖြတ်ပြီး နောက် သံတဲကျောင်းကြီးမြောက်ဘက်တွင် အုတ်တံတား မြင့်ကြီးဖြစ်၏။ အုတ်တံတားကြီးမြောက်ဘက်တွင် အသား ဇရပ်ကြီးများလည်းရှိသည်။ ¤င်းတံတားများနှင့်အတူ ဇရပ်ကြီးများကို လှေသင်းအတွင်းဝန်မင်းက ဆောက်လုပ် ခဲ့၏။ မှတ်တမ်းအဖြစ် အာဠဝီစီလမ်းပေါ်တွင် ကျောက်စာ တစ်မျက်နှာတစ်တိုင် စိုက်ထူထားခဲ့လေသည်။

ကျောက်စာတွင် ရွှေတချောင်းကူးတံတားဦးဇရပ်နှင့် တကွ အနောက်ကို သွပ်မိုး၊ ပျဉ်ခင်း၊ ဝဲယာတံတားခန်းရေ (၁၆၄)၊ မြောင်းအကူးမှ အနောက်မြေမြို့ရိုး အရောက်၊ ထိုမှတစ်ဖန် တောင်ချိုးကာ ပိုက်ကျုံးအရောက် (၆၇၇) တာ၊ ကျောက်လမ်းတံတားကြီးမှစ၍ ပုဏ္ဏားကုန်းသုသာန်တွင် အတွင်းဝန်မင်း အဘအလောင်းသင်္ဂြိုဟ်ရာ ပျဉ်ဇရပ် တစ်ဆောင်၊ အတွင်းဝန်ကတော် အမိရှေ့ဝန်မှူးကတော် သင်္ဂြိုဟ်ရာ အုတ်ဇရပ်တစ်ဆောင်နှင့် သုသာန်မြေအကာအရံတံတိုင်းမီးတားများကို ၁၂၄၄ ခုမှ ၁၂၄၇ ခုအထိ ဆောက်လုပ်တဲ့ကုန်ကျစရိတ်ငွေ (၃၄၈၄၄ိ ၅ူ၁ဲ) လုပ် ဆောင်ကုန်ဝင်ကြောင်း ကမ္ပည်းထိုးမှတ် ရေးသားခဲ့ လေသည်။

ယခုအခါ ထိုဇရပ်ကြီးများလည်း မရှိတော့ပြီ။ သင်္ချိုင်း တော်လည်း မရှိတော့ပြီ။ အတွင်းဝန်မင်းအမိ၊ အဘဟူ သည် မင်းကြီးမင်းလှ မဟာဇေယျသင်္ကြံမြို့သစ်အတွင်း ဝန်မင်းဦးဘီ၏ အမိအဘဖြစ်၏။ လွန်ခဲ့သောလေး ငါးနှစ်ကအထိ ¤င်းဇရပ်ကြီးများ၊ ဂူဗိမာန်ကြီးများ ရှိသေးသည်။

မှတ်ချက်။ ။ မန္တလေးအကြောင်းပြောကြပြီဆိုလျှင် စာရေးဆရာ ဆူးငှက်၏ ''မန္တလေးမျဉ်းဖြောင့်များ'' အကြောင်းက အခြားသော မန္တလေးသား စာရေးဆရာ၊ စာရေးဆရာမကြီးများ၏ စာအုပ်များနည်းတူ မပါမဖြစ်ပြောဆိုခဲ့ကြရသည်။ အဘယ့်ကြောင့်ဆိုသော် သမိုင်းအစဉ်အလာကြီးမားသော မန္တလေးမြို့၏ ပုံရိပ်များကို အပြောင်းအလဲမြန်သည့် နှစ်ကာလများတွင် မျက်ခြည်မပြတ် ရသဟန်ဖြင့် မှတ်တမ်းတင်ခဲ့ သောကြောင့်ဖြစ်သည်။ အတိတ်နှင့်ပစ္စုပ္ပန်ကို ဆက်စပ်သုံးသပ်ပြသည့် ရေးဟန်ဖြစ်သည်။ ''မန္တလေး မျဉ်းဖြောင့်များ'' ကို မြန်မာ့ဓနစီးပွားရေးမဂ္ဂဇင်းတွင် ၁၉၉၆ ခုနှစ် မေလ ထုတ်မှစတင်၍ လစဉ်မပြတ်ရေးသား ခဲ့သည်ဟုမှတ်မိနေသည်။ ၂ဝ၁၁ ခုနှစ်ဝန်းကျင် မြန်မာ့ဓနမဂ္ဂဇင်း မရပ်နားမီအထိ ရေးသားခဲ့ပုံရသည်။ အပြောင်း အလဲမြန်လွန်းသည့် ၁၉၉ဝ ပြည့်လွန်ကာလများ(ဝါ) ၂၁ ရာစု ကြိုကာလများက မန္တလေး  င့် စာအုပ်ထုတ်ဝေခဲ့ဖူးသည်။ အဆိုပါ စာအုပ်ကိုပင် ၂ဝဝ၃ ခုနှစ်တွင် The Straight Lines of Mandalay အမည်ဖြင့် ဆရာ ရေချမ်း(မန္တလေး)က အင်္ဂလိပ်ဘာသာသို့ ပြန်ဆို၍ ဥတ္တရလွင်ပြင် စာအုပ်တိုက်က ထုတ်ဝေဖူးသည်။ ယခုတစ်ဖန် သမိုင်းဖြစ်သွားပြန်လေသော 'မန္တလေးမျဉ်းဖြောင့်များ'ကို မြန်မာ့အလင်းက ပြန်လည်ဖော်ပြအပ်ပါသည်။ လတ်တလောနှစ် ၂ဝ အတွင်း မန္တလေးသည် ဘာတွေအမြတ်ရ၍ ဘာတွေ ဆုံးရှုံး သွားလေပြီနည်း၊ ဘာတွေသင်ခန်းစာယူ၍ ဘာတွေဆင်ခြင်ရမည်နည်း၊ သင်္ခါရဟုဖြစ်စေ၊ ပြောင်းလဲခြင်း တရားဟုဖြစ်စေ၊ သုံးသပ်ရုံဖြင့် လုံလောက်မှုမရှိတော့တာက သေချာပါပြီ။ ထို့ကြောင့် ရှားပါးစာအုပ်ဖြစ်နေသော မူလ'မန္တလေး မျဉ်းဖြောင့်များ'ကို သမိုင်းအဖြစ် ပြန်လည်ဆင်ခြင်နိုင်ရန် မပြုမပြင် မတည်းမဖြတ် ပြန်လည် ဖော်ပြအပ်ပါကြောင်း။

(မန္တလေးမျဉ်းဖြောင့်များ အခန်းဆောင်းပါးကို အပတ်စဉ် ဗုဒ္ဓဟူးနေ့တိုင်း ဖော်ပြပါမည်)