မြန်မာ့အသံနှင့်ရုပ်မြင်သံကြားမှ ထုတ်လွှင့်သည့် ဒစ်ဂျစ်တယ်စနစ်(DVB-T2) ဖြင့် ရုပ်မြင်သံကြား အစီအစဉ်များ တိုးချဲ့ထုတ်လွှင့်မည်

နေပြည်တော် ဖေဖော်ဝါရီ  ၅

ပြန်ကြားရေးဝန်ကြီးဌာန၊ မြန်မာ့အသံနှင့်ရုပ်မြင်သံကြားအနေဖြင့် Analogue စနစ်မှ Digital စနစ်သို့ အသွင်ကူးပြောင်း ထုတ်လွှင့်နိုင်ရေး ဆောင်ရွက်လျက်ရှိရာ ပထမအဆင့် ရုပ်သံလွှင့် စက်ရုံ (၄)ရုံ၊ ဒုတိယအဆင့် (၂၂)ရုံ၊ တတိယအဆင့် (၂၁)ရုံ  စုစုပေါင်း (၄၇)ရုံတွင် ဆောင်ရွက်ခဲ့ပြီး ဖြစ်ပါ သည်။

ယခုအခါ ရန်ကုန်မြို့အပါအဝင် အထက်ပါ DVB-T2 ရုပ်သံလွှင့်စက်ရုံ(၄၇)ရုံတို့တွင် Digital အခမဲ့ ရုပ်သံလိုင်း (၈)လိုင်းအား ထုတ်လွှင့်လျက်ရှိရာမှ ၂၀၁၅ ခုနှစ်၊ ဖေဖော်ဝါရီလ (၁၅)ရက်နေ့မှစ၍ မူလရုပ်သံ လိုင်းများအပါအဝင် အောက်ဖော်ပြပါ ရုပ်သံလိုင်း (၁၄)လိုင်းကို တိုးချဲ့ ထုတ်လွှင့် ပေးသွားမည်ဖြစ်ပါသည်-

(က) MRTV

( ခ ) MRTV Entertainment

( ဂ ) MITV

(ဃ) လွှတ်တော်ရုပ်သံလိုင်း

( င ) တိုင်းရင်းသားရုပ်သံလိုင်း (NRC)

( စ ) တောင်သူလယ်သမားရုပ်သံလိုင်း (Farmer Channel)

(ဆ) စာဖတ်သူတို့ရုပ်သံလိုင်း (Reader Channel )

( ဇ ) Sport -1

( ဈ) Sport -2

(ည) MRTV-4

( ဋ ) Channel-7

( ဌ ) 5- Plus

( ဍ ) MNTV

( ဎ ) Channel -9

အဆိုပါ ရုပ်သံလိုင်းများကို အောက်ဖော်ပြပါ ရုပ်မြင်သံကြားဖမ်းစက်(TV)နှင့် ရုပ်သံဖမ်းစက် များမှ ဖမ်းယူကြည့်ရှုနိုင်မည် ဖြစ်ပါသည်-

(က) DVB-T2 Tuner ပါသော ရုပ်မြင်သံကြားဖမ်းစက်(TV)များ

( ခ ) ပြန်ကြားရေးဝန်ကြီးဌာနမှ ဖြန့်ဝေလျက်ရှိသော DVB-T2 Set -Top Box များ

( ဂ ) MRTV-4 နှင့် ဆက်စပ်ရုပ်သံလိုင်းများ ဖမ်းယူနေသော DVB-T2 Set -Top Box များ

(ဃ) အခြားပြင်ပတွင် ရောင်းချနေသော DVB-T2 Set -Top Box များ

ရုပ်သံလိုင်းများ ဖမ်းယူရာတွင် Antenna ကို စက်ရုံတည်ရှိရာ အရပ်သို့ ဦးတည် တပ်ဆင်၍ အောက်ပါအတိုင်း ဖမ်းယူရမည်ဖြစ်ပါသည်-

(က)Set -Top Box ၊ DVB-T2 Tuner ပါTV တို့ရှိ Remote ခလုတ်များမှ Menu နှိပ်၍ Installation သို့ သွားရပါမည်။

( ခ )Channel Search တွင် ဘေးမြားနှိပ်၍ ခေတ္တစောင့်ပါ။

( ဂ ) Progress Pageတွင် မိမိတို့နေထိုင်ရာ ဒေသအတွင်းရှိ အခမဲ့ ထုတ်လွှင့်သော  DVB -T/T2 Digital ရုပ်သံလိုင်းများ၊ ရေဒီယိုလိုင်း အမည်များ ပေါ်လာသည့် အထိ စောင့်ပါ။

(ဃ) Exit ခလုတ်နှိပ်၍ မိမိနှစ်သက်ရာ ရုပ်သံလိုင်းများကို ဖမ်းယူကြည့်ရှုပါ။

မြန်မာ့အသံနှင့်ရုပ်မြင်သံကြား