ရုရှား - မြန်မာ (၇၅) နှစ်တာ စိန်ရတုခရီးလမ်းမှသည်…

 

 နွေကံ့ကော်(မြို့လှ)

သူတို့အခေါ် ရပ်ဆီးယား ကျွန်တော်တို့အခေါ် ရုရှား။ 

သူတို့အခေါ် မာ့စ်ကဗား ကျွန်တော်တို့အခေါ် မော်စကို။

ဘဝရဲ့အမှတ်တရအရှိဆုံးထဲက အမှတ်တရ တစ်ခုကို ရွေးထုတ်ပြပါဆိုလျှင် ရုရှားနိုင်ငံ၌ ပညာသင်ခဲ့ဖူးသည့် အချိန်ကာလကို ညွှန်ပြရမည် ဖြစ်သည်။ ၂၀၀၉ ခုနှစ် စက်တင်ဘာလမှ ၂၀၁၂ ခုနှစ် ဇူလိုင်လဆန်းပိုင်းအထိ ရုရှားနိုင်ငံ မော်စကို မြို့တွင်ရှိသော မော်စကို မီးရထားတက္ကသိုလ်၌ ကျွန်တော်အပါအဝင် အခြားသင်တန်းသားများ တက်ရောက်ခဲ့ကြသည်။ ယနေ့ဆိုလျှင် ရုရှားမှ ပြန်လာခဲ့သည်မှာ ၁၁ နှစ်ကျော်ခဲ့ပြီဖြစ်၏။ ပြန်တွေးကြည့်လျှင် အိပ်မက်တစ်ခုနှယ်ပင် ရှိနေသေး၏။

ကျွန်တော်နှင့် ရုရှားနိုင်ငံ၏ဆုံစည်းမှုသည် သက်တမ်းအားဖြင့် သုံးနှစ်ခန့်သာ ရှိခဲ့သော်လည်း နှလုံးသားတွင် ထာဝရ ရင်းနှီးနေသလို ခံစားရသည်။ မကြာမီတွင် ရုရှားနိုင်ငံနှင့် မြန်မာနိုင်ငံတို့၏ သံတမန်ဆက်ဆံမှုသက်တမ်း (၇၅) နှစ် ပြည့်မြောက် တော့မည်ဖြစ်သည်။ တိတိကျကျ ဆိုရပါလျှင် ၁၉၄၈ ခုနှစ် ဖေဖော်ဝါရီလ ၁၈ ရက်နေ့မှစတင်၍ သံတမန် ဆက်ဆံမှုပြုခဲ့ခြင်းကြောင့် ၂၀၂၃ ခုနှစ် ဖေဖော်ဝါရီလ ၁၈ ရက်နေ့တွင် ရက်မြတ်အခါသမယ စိန်ရတုသို့ ရောက်ရှိလာခြင်းဖြစ်သည်။

ရုရှားနိုင်ငံကို စတင်သတိပြု

တပ်မတော်သားဘဝမရောက်ခင် ရုရှားဟူသော အမည်နာမတစ်ခုကို ကိုးတန်းကျောင်းသားဘဝ ကတည်းက ကြားဖူးခဲ့သည်။ ကမ္ဘာကျော် တင်းနစ် ဘုရင်မ မာရီယာရှာရာပိုဗာ ဟူသော အလှဧကရီကို အားကစားစိတ်ဝင်စားသူတိုင်း မသိသူမရှိကြပေ။ မြင့်မားသောအရပ်၊ တောင့်တင်းသောခန္ဓာ၊ လှပ ကြော့ရှင်းသောမျက်နှာနှင့် ကျွမ်းကျင်သောတင်းနစ် စွမ်းရည်များကြောင့် ပုရိသတို့ အသည်းစွဲ အားကစားမယ်မှတစ်ဆင့် ရုရှားနိုင်ငံကို စတင်သတိ ပြုမိခဲ့သည်။ ရုရှားမတိုင်ခင် ပထမဆုံး အမျိုးသမီး အာကာသမယ်ကိုတော့ ဆိုဗီယက်ယူနီယံအမည်ဖြင့် ကြားဖူးခဲ့သော်လည်း ငယ်ရွယ်သေးသော ကာလမို့ ဆိုဗီယက်အသုံးအနှုန်းကို နားထဲသိပ်မစွဲခဲ့ပါ။

ထို့နောက်ပိုင်း စစ်တက္ကသိုလ်ဗိုလ်လောင်းဘဝ ရောက်ချိန်တွင် ရုရှားနှင့် ပိုမိုနီးကပ်လာသည်။ ယူရို ခြေစစ်ပွဲများတွင် နာမည်ကြီးအင်္ဂလန်ကို ဖြုတ်ချခဲ့သော ရုရှားဘောလုံးအသင်းကို စတင်စိတ်ဝင်စား လာမိသည်။ တစ်ဦးကောင်းဆိုသည်ထက် အသင်းလိုက်စုစည်းမှုကောင်းကောင်းဖြင့် နာမည်ကြီး အသင်းများကို ယှဉ်ကစားနိုင်သော ရုရှားအသင်းကို သဘောကျမိသလို ရုရှားဂျာစီသည်လည်း ပရိသတ် များကြားထဲ အသိအမှတ်ပြုခြင်း ခံလာရသည်။ ထို့အပြင် ကျွန်တော်တို့ကို စာပေသင်ကြားပေးသော နည်းပြအရာရှိများထဲတွင် အချို့မှာ ရုရှားနိုင်ငံမှ ပညာတော်သင်ပြန်လာခဲ့ကြသူများ ဖြစ်သည်။ အဆိုပါနည်းပြအရာရှိများကိုကြည့်ကာ ကျွန်တော် အပါအဝင် ဗိုလ်လောင်းများ အားကျမိခဲ့သည်။

အားကျစိတ်ဖြင့် စိတ်ဓာတ်၊ စည်းကမ်း၊ စာပေ၊ လေ့ကျင့်ရေးပိုင်းဆိုင်ရာများ ပိုမိုကောင်းမွန်အောင် ကြိုးစားခဲ့ကြသည်။ စာပေပိုင်းအထူးချွန်ကြီး မဟုတ် သော်လည်း ကဏ္ဍများအလိုက် ရမှတ်များကောင်း ခဲ့သည်မို့ မဟာသိပ္ပံတန်းဝင်ရာမှတစ်ဆင့် ကျွန်တော် ရုရှားနိုင်ငံသို့ ခြေချခွင့်ရခဲ့သည်။ ပြင်ဦးလွင်တွင် ရုရှားဘာသာစကားသင်တန်းအကြို တက်ချိန်မှစ၍ စာသင်ပေးသော ဆရာမများကို ကြည့်ခြင်းအားဖြင့် သူတို့၏ စည်းစနစ်ရှိမှုကို မျက်ဝါးထင်ထင်မြင် ခဲ့ရသည်။

မမေ့နိုင်ဖွယ်ဖြစ်ရပ်များကို ကြုံခဲ့ရ

လေဆိပ်မှ မြို့ထဲနေရမည့်အဆောင်သို့ ချီတက်စဉ်မှာပဲ သန့်ရှင်းသပ်ရပ်သည့် မြို့ပြအင်္ဂါရပ်၊ စည်းစနစ်ကျသည့် ယာဉ်သွားယာဉ်လာမှုနှင့် ပြည်သူ တို့၏ လှုပ်ရှားမှုများကို မြင်တွေ့လိုက်ရသည်။ သုံးနှစ်တာကာလအတွင်း ပညာသင်ကြားခဲ့စဉ် မမေ့နိုင်ဖွယ်ဖြစ်ရပ်များကို ကြုံခဲ့ရသလို အားကျအတုယူ စရာများလည်း ရရှိခဲ့သည်။ ကျွန်တော်တို့ အတန်း ပိုင်ဆရာမ အားလ်မာဆီမှ အမှိုက်စည်းစနစ်တကျ ပစ်သည့် အလေ့အကျင့်ကောင်းများ ရရှိခဲ့သလို အေဗရာမိုဗစ်ချ်ဟူသော ဆရာ့ဆီမှ အချိန်လေးစား တိကျလိုက်နာမှု၊ ထူးချွန်ကျောင်းသားကို အသိအမှတ်ပြုချီးကျူးမှု၊ ဆရာမ နာဂျဲ့ချ်သာဆီမှ အမှန်ကိုအမှန်အတိုင်း ဒီမိုကရေစီနည်းကျကျပြောဆို တင်ပြရဲမှု စသည့်အတွေ့အကြုံများကို ဆရာများဆီမှ ရရှိခဲ့သည်။

ဘတ်စ်ကားစီးရာတွင်ဖြစ်စေ၊ မြေအောက် ရထားစီးရာတွင်ဖြစ်စေ စာအုပ်လေးများ လက်ဝယ် ကိုင်လျက် အချိန်ကိုအသုံးချကြသော ခရီးသွား ပြည်သူများကလည်း ကျွန်တော့်အတွက် အထူး အဆန်း ဖြစ်နေခဲ့သည်။ ကုန်တိုက်ကြီးများတွင် အရက်ဝယ်သည့်အခါ ပတ်စ်ပို့ကြည့်ပြီး အသက် ၁၈ နှစ်ပြည့်ပြီလားဟု အရင်မေးတတ်ကြသည်။ ည ၁၀ နာရီ နောက်ပိုင်း အရက်ဘီယာ ဝယ်၍မရ တော့။ ကျောင်းတွင်ဖြစ်စေ၊ အဆောင်တွင်ဖြစ်စေ ဆေးလိပ်သောက်ခွင့်ပြုထားသော်လည်း နေရာများ သတ်မှတ်ပေးထား၏။ ကျောင်းသားများကလည်း စည်းကမ်းကို တိကျစွာ လိုက်နာကြသည်။ လမ်းပေါ် တွင် ပြီးစလွယ် အမှိုက်မစွန့်၊ တံတွေးတစ်ချက်ပင် အလွယ်တကူ မထွေး။ ကျွန်တော်တို့အဖို့တော့ အားလုံးသည် အစိမ်းသက်သက်သဖွယ် ဖြစ်နေသည်။ မမြင်ဖူးသော အလေ့အထများပင် မဟုတ်ပါလား။

လူတစ်ဦးချင်းဆီမှစ၍ အားလုံးသည် တူညီသော အမျိုးသားရေးအသိဖြင့် ဒီမိုကရေစီကို လိုက်နာကျင့်သုံးနေကြသည်မို့ ကျွန်တော့်အနေဖြင့် များစွာလေးစားမိသည်။ အတုယူလိုစိတ်များလည်း ဖြစ်ပေါ်လာခဲ့သည်။ ရုရှားနှင့် မြန်မာတို့၏နှစ်နိုင်ငံ ဆက်ဆံရေးသည် ဂေါတမမြတ်စွာဘုရားလက်ထက် ကပင်ဗျာဒိတ်တော်ရှိခဲ့သည်ဟု မှတ်သားရသည်။ ကျွန်တော့်အနေဖြင့် ရုရှားနိုင်ငံသို့ ပညာတော် သင်ရောက်ခဲ့သော်လည်း ထိုစဉ်က ရုရှားနှင့် မြန်မာနိုင်ငံတို့၏ ရှေးအစဉ်အဆက်ရှိခဲ့ဖူးသော ဆက်ဆံရေးကို ကောင်းစွာမသိရှိခဲ့ပါ။ ၃-၂-၂၀၂၃ ရက်နေ့နှင့် ၄-၂-၂၀၂၃ ရက်နေ့ထုတ် ကြေးမုံ သတင်းစာပါ ဆောင်းပါးရှင် မောင်လွင်မြင့်၏ “မြန်မာ့ပဒေသရာဇ် ခေတ်နှောင်းကာလ နယ်ချဲ့ကိုလိုနီစနစ်အား တွန်းလှန်ရန်ရုရှားနိုင်ငံနှင့် နှစ်နိုင်ငံဆက်ဆံရေး တည်ထောင်ရန် ကြိုးပမ်းခဲ့မှုများ” ဆောင်းပါးကို ဖတ်ရှုခွင့်ရမှ ဇာတ်ရည်လည်စွာသိခွင့်ရခဲ့ခြင်းဖြစ်၏။

တန်ဖိုးများစွာရှိသော သမိုင်းမှတ်တမ်းတစ်ခုပင် ဖြစ်သည်။ ၂၀ ရာစု အလယ်ကာလ လွတ်လပ်ရေး ရပြီး မကြာမီမှာပင် တရားဝင်သံတမန်ဆက်ဆံရေးကို ထူထောင်နိုင်ခဲ့ခြင်းအားဖြင့် နှစ်နိုင်ငံရွှေလမ်း ငွေလမ်းကို ထိုခေတ်အခါ ခေါင်းဆောင်များက အမြော်အမြင်ကြီးစွာ ဖောက်ခဲ့ကြခြင်းဖြစ်ပေသည်။ ကျွန်တော်တို့ မြန်မာကျောင်းသားများအား အခြားနိုင်ငံမှ ကျောင်းသားများထက်ပို၍ ရုရှားဆရာများက ချစ်ခင်ကြသည်ကိုသတိထားမိ၏။

အဘယ်ကြောင့်ချစ်ရပါသနည်းဆိုလျှင် မြန်မာကျောင်းသားများသည် မြန်မာ့ယဉ်ကျေးမှုကျင့်ဝတ် များအတိုင်း ဆရာများကို ဆက်ဆံသောကြောင့်ဖြစ်သည်။ ရုရှားနိုင်ငံကို ရောက်ချိန်မှစ၍ ရုရှားဘောလုံး အသင်းကို ပိုမိုအားပေးဖြစ်ခဲ့သည်။ အကျိုးဆက် အားဖြင့် ယနေ့အချိန်အထိ ကိုယ့်မြန်မာဘောလုံး အသင်းပြီးလျှင် အခြားသောနိုင်ငံတကာပွဲများ၌ ရုရှားအသင်းဘက်မှ အမာခံပရိသတ်တစ်ဦးသဖွယ် အားပေးဖြစ်ခဲ့သည်။ ထိုစဉ်က ရုရှားနိုင်ငံ၏ အသင်းခေါင်းဆောင် အာရှာဗင်သည် ကျွန်တော်တို့ အကြိုက်ဆုံး အားကစားသမားဖြစ်ခဲ့သည်။

 ပြာပုံကြားမှ နိုင်ငံအား ဘက်စုံတိုးတက်မှုများ ရရှိအောင် စွမ်းဆောင်နိုင်ခဲ့

ရုရှားနိုင်ငံတွင်ရှိနေစဉ် ဆရာများ၏ ရှင်းပြမှုဖြင့် သူတို့ဆီမှ သမိုင်းကြောင်းများကို သိခွင့်ရခဲ့သည်။ ဒုတိယကမ္ဘာစစ်ဒဏ်ကြားမှ ရုန်းထွက်ပြီးနောက် အစိုးရအဆက်ဆက် ဦးဆောင်မှု၊ တိုင်းရင်းသား ပြည်သူများ၏ စုစည်းညီညွတ်မှု စွမ်းအားတို့ဖြင့် ပြာပုံကြားမှ နိုင်ငံအား ဘက်စုံတိုးတက်မှုများ ရရှိ အောင် စွမ်းဆောင်နိုင်ခဲ့ကြသည်မှာ လေးစားဖွယ်ရာပင် ဖြစ်သည်။ ပို၍လေးစားဂုဏ်ယူဖွယ်ကောင်း သည်ကား ဒုတိယကမ္ဘာစစ်အပြီး ၁၆ နှစ်အကြာမှာပဲ အာကာသအထိ ခြေလှမ်းဆန့်နိုင်ခဲ့ခြင်းပင်ဖြစ်သည်။ သူတို့နိုင်ငံ၏ ပညာရေးစနစ်၊ အတိတ် ကာလမှ ဇာဘုရင်စနစ်၊ သူရဲကောင်းလီနင်၊ ရင်ပြင်နီ၊ သန့်ရှင်းသပ်ရပ်သော မြို့ပြလူနေမှုစနစ်၊ စိမ်းလန်း စိုပြည်သော မြို့တွင်းပန်းခြံငယ်များမှသည် နိုင်ငံပိုင် အမျိုးသားအားကစားကွင်းဖြစ်သည့် လုဇနီကီ ဘောလုံးကွင်း စသည်တို့သည် ကျွန်တော့်အာရုံတွင် အမြဲကိန်းအောင်းနေခဲ့သည်။

ထိုအရာများ စုဝေးလာသည့် ကျွန်တော့် နှလုံးသားတွင် စာတစ်ပုဒ်အဖြစ် ဖန်တီးချင်လာခဲ့၏။ ဤသို့ဖြင့် ရုရှား-မြန်မာ သွေးစည်းမှုဟု ဆိုနိုင်သလို ရုရှားနိုင်ငံကြုံတွေ့ခဲ့ရသော သမိုင်းတစ်ကွေ့မှ ဖြစ်စဉ်များကို သင်ခန်းစာယူလျက် အမိမြန်မာနိုင်ငံတော်မှ တိုင်းရင်းသားပြည်သူအပေါင်းတို့ အတုယူလိုသောစိတ်ဖြင့် ဝတ္ထုရှည်တစ်ပုဒ်ဖန်တီး ဖြစ်ခဲ့သည်။

“မော်စကိုမှာ ဝေတဲ့နှင်း ” ဟူသည့် ထိုဝတ္ထုရှည် စာမူသည် ၂၀၁၉ ခုနှစ်အတွက် စာပေဗိမာန်စာမူဆု တွင် ပထမဆုကို ဆွတ်ခူးနိုင်ခဲ့သည်။ ကျွန်တော့် ဘဝအတွက် အမှတ်တရတစ်ခုပင် ဖြစ်ခဲ့သည်။ မိမိတို့ မြန်မာနိုင်ငံသည်သာ နယ်ချဲ့ကျူးကျော်မှု အောက်တွင် ခါးခါးသီးသီး ဆိုးဆိုးရွားရွားနေခဲ့ရခြင်း မဟုတ်ဘဲ နိုင်ငံတိုင်းတွင် အတိတ်ဆိုးကာလများ ရှိခဲ့ဖူးသည်။ ထိုအတိတ်ဆိုးများမှ ရုန်းထွက်လျက် ခေတ်သစ်နိုင်ငံတော်ကို ထူထောင်စေလိုခြင်းမှာ ကျွန်တော့်ရင်ထဲက ဆန္ဒမှန်ပင်ဖြစ်သည်။ ၂၀ ရာစု ကုန်ခါနီးမှာပဲ အင်အားတောင့်တင်းခိုင်မာခဲ့သည့် ဆိုဗီယက်ယူနီယံကြီး ပြိုကွဲခဲ့ရသည်။ အကြောင်း ရင်းမှာ နယ်ချဲ့သွေးထိုးလှုံ့ဆော်မှုကြောင့်ပင်ဖြစ်၏။ ထိုနယ်ချဲ့ဆိုသူကား အခြားမဟုတ်။ အပျက်တကာ့ ထွတ်ခေါင် ပျက်မင်းနောင်ဟုပင် တင်စားရမည့် အမေရိကန်ပင်ဖြစ်ချေသည်။   

“ ငါက အမေရိကန်ကို မုန်းတယ်၊ နေရာတကာ ပါတဲ့ နိုင်ငံလေ ”ဟု ကျွန်တော်တို့ဆရာမ အားလ်မာ က ထိုသို့ပြောခဲ့ဖူးသည်။ အမေရိကန်ပါလာလျှင် အားလုံးပျက်စီးဖို့သာ ဖြစ်စေခဲ့သည်။ ထိုသို့သော သမိုင်းဆိုးကြုံတွေ့ခဲ့ရသဖြင့် ယနေ့အချိန်တွင် ရုရှား နိုင်ငံသည် ကြိုတင်ကာကွယ်ခြင်းသည် ကုသခြင်း ထက်ကောင်းမွန်သည်ဟူသည့်အတိုင်း နိုင်ငံတော် လုံခြုံရေးနှင့် ယင်းတို့၏ အမျိုးသားအကျိုးစီးပွား အတွက် ဆောင်ရွက်သင့်သည်မှန်သမျှကို ပြတ်ပြတ် သားသားဆောင်ရွက်နေသည်ကို တွေ့ရှိရပေသည်။

အားကစားကဏ္ဍတွင် နည်းပြများ လာရောက်နည်းပြပေးခဲ့ကြ

တရားဝင်သံတမန်ဆက်ဆံမှု ထူထောင်ပြီးချိန်မှစ၍ နိုင်ငံအချင်းချင်း အပြန်အလှန်ယဉ်ကျေးမှု၊ ကုန်သွယ်မှုများပြုခဲ့ကြသလို အားကစားကဏ္ဍတွင်လည်း မြန်မာနိုင်ငံသို့ ဆိုဗီယက်ရုရှားဘောလုံး နည်းပြများ လာရောက်နည်းပြပေးခဲ့ကြလေသည်။ အောင်မြင်မှုများလည်း ရရှိခဲ့ကြ၏။ ခေတ်အဆက် ဆက်အစိုးရများအနေဖြင့် လွတ်လပ်၍ တက်ကြွ ပြီး ဘက်မလိုက်သော နိုင်ငံခြားရေးမူဝါဒနှင့်အတူ ငြိမ်းချမ်းစွာအတူယှဉ်တွဲနေထိုင်ရေးမူကို လိုက်နာ ကျင့်သုံးကာ ရပ်နီးရပ်ဝေး နှစ်နိုင်ငံ သံတမန်ဆက်ဆံ ရေးများ ထူထောင်ခဲ့ကြသော်လည်း နိုင်ငံတော် ကာကွယ်ရေးနှင့်ပတ်သက်၍ ကျယ်ကျယ်ပြန့်ပြန့် အမြင်ရှိသည့် ခေါင်းဆောင်များလက်ထက်တွင် မဖြစ်မနေလိုအပ်သော ပြည်ပအတတ်ပညာများ ရရှိရေးအတွက် လူသားအရင်းအမြစ်များကိုရရှိ အောင်ဆောင်ရွက်ခဲ့ကြသည်။

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင် တပ်မတော်အကြီးအကဲ ဖြစ်လာချိန်မှစ၍ ရုရှား-မြန်မာဆက်ဆံရေး အရှိန် အဟုန်ဖြင့် ပိုမိုတိုးတက်ကောင်းမွန်လာခဲ့ပြီး နှစ်နိုင်ငံ တိုးတက်ဖြစ်ထွန်းမှုအတွက် အထောက်အကူ ကောင်းများ ရရှိစေခဲ့သည်ကို တွေ့ရှိရသည်။ မြန်မာ့အရေးနှင့်ပတ်သက်၍ နိုင်ငံတကာစားပွဲဝိုင်း များ၊ စာမျက်နှာများထက် အမှန်တရားကို ရှေးရှုကာ မိတ်ဆွေကောင်းဟူသည့် ခံယူချက်ဖြင့် ရုရှားနိုင်ငံက မားမားမတ်မတ်ရပ်တည်ပေးခဲ့သလို ရုရှားအရေး နှင့်ပတ်သက်၍လည်း မြန်မာနိုင်ငံက ထိုသို့သာ ကျင့်သုံးခဲ့သည်။          

အပြန်အလှန် မိတ်ဆွေကောင်းသဖွယ်၊ ဆွေမျိုး သားချင်းများပမာ ဆက်ဆံကြသော မြင်ကွင်းများကို မြင်တွေ့နေရသည့်အတွက် ဖတ်ခဲ့ဖူးသောလောက နီတိပါ မိတ်ဆွေကဏ္ဍကို သတိရမိသည်။ ရောဂါ ဝေဒနာကျရောက်စွဲကပ်သောအခါ၌ လည်းကောင်း၊ ငတ်မွတ်ခေါင်းပါး ဘေးဒုက္ခရောက်သောအခါ၌ လည်းကောင်း၊ ဥစ္စာစည်းစိမ်ဆုံးရှုံးပျက်စီးသော အခါ၌လည်းကောင်း၊ ရန်သူဖမ်းဆီးခြင်းခံရသောအခါ၌လည်းကောင်း၊ တရားရုံး၌ အမှုကိုရင်ဆိုင် ရသောအခါ၌လည်းကောင်း၊ နာရေးကိစ္စဈာပနနှင့် ကြုံရသောအခါ၌လည်းကောင်း အကြင်အပေါင်း အဖော်သည် မိမိနှင့်အတူရပ်တည်ပေ၏။ ထိုသူသည် အဆွေခင်ပွန်းကောင်းမည်၏ဟူ၍ လောကနီတိ တွင်ဖော်ပြထားသည်ကို မှတ်သားရသည်။

ကိုဗစ်-၁၉ ကပ်ရောဂါကာလအတွင်း ကျန်းမာရေးဆိုင်ရာဆေးဝါးထောက်ပံ့ပေးမှုများ၊ စီးပွားရေးဆိုင်ရာပူးပေါင်းဆောင်ရွက်မှုများ၊ နည်းပညာပိုင်းဆိုင်ရာ မျှဝေဆောင်ရွက်မှုများ၊ စိုက်ပျိုးရေးနှင့် ပတ်သက်သည့် အတတ်ပညာနည်းပညာများအပြင် စစ်ဘက်ဆိုင်ရာ ပူးပေါင်းလေ့ကျင့်ခြင်း များသည် အမိနိုင်ငံတော်ကောင်းကျိုးအတွက် အပြုသဘောဆောင်သည့် အကျိုးရလဒ်များပင် ဖြစ်ပေသည်။

မိတ်ဆွေရင်း သွေးသားရင်းများပမာ ချစ်ခင်စိတ်ကိုပြကြ

ရှေးမြန်မာမင်းများလက်ထက်မှစကာ ရုရှား-မြန်မာဆက်ဆံရေးသည် အမြဲထာဝစဉ် ချစ်ခင် လေးစားမှုကို ပြသခဲ့ကြောင်း တွေ့ရှိရ၏။ ပထဝီ အနေအထားအားဖြင့် မိုင် ၄၀၀၀ ကျော် ကွာဝေး သော်ငြား တကယ့်မိတ်ဆွေရင်း သွေးသားရင်းများပမာ ချစ်ခင်စိတ်ကိုပြကြ၏။ ခင်ရာဆွေမျိုး မြိန်ရာ ဟင်းကောင်းဖြစ်ဖို့ရာ၌ အနေနီးခြင်း၊ အနေဝေးခြင်းများက ပဓာနမကျကြောင်း ရုရှား - မြန်မာ ဆက်ဆံရေးက သက်သေထူလျက်ရှိပေသည်။ ယနေ့ နိုင်ငံတော်စီမံအုပ်ချုပ်ရေး ကောင်စီလက်ထက်တွင် ခရီးသွားလာရေးကဏ္ဍ၊ စွမ်းအင်ကဏ္ဍများ အပါအဝင် အခြားသောကဏ္ဍစုံ၌ ပိုမိုအရှိန်အဟုန်မြှင့် ဆောင်ရွက်လျက်ရှိနေသည်ကို တွေ့ရှိရသည်။ တစ်နည်းအားဖြင့် ရုရှားနှင့်မြန်မာနိုင်ငံတို့မှ တိုင်းပြည်အပေါ် အမှန်တကယ် ချစ်မြတ်နိုးသစ္စာရှိ သောအကြီးအကဲများ၏ အမြော်အမြင်ကြီးသော ဆောင်ရွက်ချက်များပင် ဖြစ်ပေသည်။

မြတ်စွာဘုရားဗျာဒိတ်တော်မှတစ်ဆင့် အစပြုလာ

ဘဝတစ်ကွေ့တွင် ကံအကြောင်းသင့်စွာ နိုင်ငံတော်က တာဝန်ပေးအပ်ချက်အရ ရုရှားနိုင်ငံတွင် ပညာသင်ကြားခွင့်ရရှိခဲ့သူ တစ်ဦးအနေဖြင့် နိုင်ငံတော်အပေါ် ကျေးဇူးတင်မိသလို အဖိုးတန်ပညာများ၊ အခြားသော သိသင့် သိအပ်ဖွယ်ပညာများ၊ နိုင်ငံခြားအတွေ့အကြုံများကို ရရှိခဲ့သဖြင့် ရုရှား ဖက်ဒရေးရှင်းနိုင်ငံကိုလည်း ကျေးဇူးတင်မိပါသည်။ ဖြူစင်ရိုးသားသော သစ္စာတရားကို အခြေခံလျက် ကောင်းမွန်သော သံတမန်ဆက်ဆံရေးများရှိခြင်းအားဖြင့် နှစ်ဦးနှစ်ဖက် အကျိုးဖြစ်ထွန်းရမည်မှာ မလွဲဧကန်ပင်ဖြစ်ပေသည်။ ရုရှား-မြန်မာ သံတမန်ဆက်ဆံမှု(၇၅) နှစ်ပြည့်ချိန်တွင် အတိတ်ကာလ ပညာသင်ကြားခဲ့ရမှုများကို သတိရမိသကဲ့သို့ ရှင်မဟာရဋ္ဌသာရ၏ “သေတူရှင်ဖက်၊ ဆောင်ရွက် မကင်း၊ အချင်းချင်းတွင်၊ အခင်းကြီးငယ်၊ ရှိခါဝယ် လည်း၊ မဖယ်မသွေ၊ ညီညာကုန်း၍ ရုန်းကြလေ” ဟူသော လက်သစ်တောင်တာဆုံးမစာနှင့် “ပေးကမ်းချီးမြှင့်၊ ကိုယ်နှင့်ယှဉ်ထား၊ စီးပွားဆောင်ရွက်၊ နှုတ်မြွက်ချိုသာ၊ သစ္စာမှန်စေ ဝတ်ငါးထွေ၊ ကျင့်လေ မိတ်သဟာ” ဟူသော မိတ်ဆွေကျင့်ဝတ်တို့ကို နားထဲပြန်ကြားယောင်လာမိသည်။ မြတ်စွာဘုရား ဗျာဒိတ်တော်မှတစ်ဆင့် အစပြုလာပြီး ရှေးမြန်မာမင်း များအစဉ်အဆက်မှ လက်ဆင့်ကမ်းခဲ့သည့် ရုရှား-မြန်မာ နှစ်ပြည်ထောင်သွေးစည်းချစ်ကြည်မှုသည် နောင်နှစ်ပေါင်းထောင်သောင်းများစွာတိုင် ထားရှိခဲ့ပြီးသော မိတ်ကောင်းဆွေမွန် ကျင့်ဝတ်များအတိုင်း ဆက်လက်လျှောက်လှမ်းနိုင်မည်ဟု ကျွန်တော့်အနေဖြင့် ခိုင်မာလေးနက်စွာ ယုံကြည်မိသည်။ ။