ဒုတိယအကြိမ် အမျိုးသားလွှတ်တော် (၁၁) ကြိမ်မြောက် ပုံမှန် အစည်းအဝေး ပဉ္စမနေ့ ကျင်းပ

 

နေပြည်တော် ဇန်န၀ါရီ ၂၈

ဒုတိယအကြိမ် အမျိုးသားလွှတ်တော် (၁၁) ကြိမ်မြောက် ပုံမှန်အစည်းအဝေး ပဉ္စမနေ့ကို ယနေ့နံနက် ၁၀ နာရီတွင် နေပြည်တော်ရှိ အမျိုးသားလွှတ်တော် အစည်းအဝေးခန်းမ၌ ကျင်းပသည်။

အစည်းအဝေးတွင် ဧရာဝတီတိုင်းဒေသကြီး မဲဆန္ဒနယ်အမှတ်(၄) မှ ဦးထိန်ဝင်း၏ ဧရာဝတီတိုင်းဒေသကြီး၊ ဟင်္သာတ မြို့နယ်၊ ကျောက်ရဲကျေးရွာ၊ သဲရိုးကျေးရွာ၊ တာငုတ်ကျေးရွာနှင့် ဖောင်ဆိပ်ကျေးရွာတို့တွင် ဧရာဝတီမြစ်ရေတိုက် စားမှုကြောင့် ကမ်းပါးပြိုကျနေမှုကို ဟန့်တားရန်အတွက် မြစ်ကမ်းထိန်းလုပ်ငန်း ဆောင်ရွက်ပေးရန်နှင့် တစ်ဖက်ကမ်းကျွန်း သောင်အား မြစ်ဖြတ် တူးမြောင်းဖော်ပေးရန် အစီအစဉ် ရှိ/မရှိမေးခွန်းနှင့်စပ်လျဉ်း၍ ပို့ဆောင်ရေးနှင့် ဆက်သွယ်ရေး ၀န်ကြီးဌာန ဒုတိယ၀န်ကြီး ဦးကျော်မျိုးက ရေအရင်းအမြစ်နှင့် မြစ်ချောင်းများ ဖွံ့ဖြိုးတိုးတက်ရေး ဦးစီးဌာန အနေဖြင့် ဟင်္သာတ မြို့နယ် ကျောက်ရဲကျေးရွာနှင့် သဲရိုးကျေးရွာ ကမ်းပြိုကာကွယ်ရေးအတွက် ၂၀၁၈ - ၂၀၁၉ ဘဏ္ဍာရေးနှစ်တွင် ဧရာဝတီ တိုင်းဒေသကြီး အစိုးရအဖွဲ့ထံသို့ ရန်ပုံငွေကျပ်သန်း (၅၇၀) တင်ပြတောင်းခံခဲ့သော်လည်း ရန်ပုံငွေ မပါရှိခဲ့ပါ သဖြင့် ၂၀၁၉ - ၂၀၂၀ ဘဏ္ဍာရေးနှစ်တွင် ဧရာဝတီ တိုင်းဒေသကြီး အစိုးရအဖွဲ့ ငွေလုံးငွေရင်း ရန်ပုံငွေတွင် ပထမဦးစား ပေးအဖြစ် ထပ်မံ တင်ပြတောင်းခံသွားမည် ဖြစ်ပါကြောင်း။

ထို့ပြင် တစ်ဆက်တစ်စပ်တည်း ဆက်လက်ဆောင်ရွက်ပေးရန် လိုအပ်သော တာငုတ်ကျေးရွာနှင့် ဖောင်ဆိပ်ကျေးရွာ ကမ်းပြို ကာကွယ်ရေးအတွက် ရန်ပုံငွေ ကျပ်သန်း (၈၂၀) ကို ၂၀၁၉ - ၂၀၂၀ ဘဏ္ဍာရေးနှစ် ဧရာဝတီ တိုင်းဒေသကြီး အစိုးရအဖွဲ့ ငွေလုံးငွေရင်း ရန်ပုံငွေတွင် ဒုတိယဦးစားပေးအဖြစ် ထပ်မံတင်ပြတောင်းခံသွားမည် ဖြစ်ပါကြောင်း။

ထို့ပြင် မြစ်ဖြတ်မြောင်း တူးဖော်ရန်ကိစ္စနှင့် ပတ်သက်၍ ရေအရင်းအမြစ်နှင့် မြစ်ချောင်းများ ဖွံ့ဖြိုးတိုးတက်ရေးဦးစီးဌာနက ၂၀၁၈ ခုနှစ် နိုဝင်ဘာလတွင် ကွင်းဆင်းလေ့လာခဲ့ရာ တူးဖော်ရမည့် တူးမြောင်းအလျားမှာ (၃ ဒသမ ၅) မိုင်နှင့် အကျယ်မီတာ (၁၀၀) ဖြစ်ပြီး အနက်မှာလည်း ပင်မရေလမ်းကြောင်းတွင် ဖြစ်ပေါ်နေသော ရေအနက်ထက် တူးဖော်မှသာ ရေကြောင်းဖြစ်ပေါ်နိုင်သဖြင့် အနည်းဆုံး (၁၀) မီတာ တူးဖော်ရမည်ဖြစ်သောကြောင့် တူးဖော်ရမည့် ပမာဏမှာ ကုဗမီတာ (၆) သန်းခန့်ဖြစ်ပြီး ငွေကျပ်သန်း ၆၀၀၀ ခန့် ကုန်ကျမည်ဖြစ်သဖြင့် ရင်းနှီးမြှုပ်နှံရမည့် တန်ဖိုးမှာ အလွန်များပြားမည် ဖြစ်ပါကြောင်း။

မြစ်ဖြတ်မြောင်းတူးဖော်ပါကလည်း မြစ်ကွေးအလျားနှင့် မြစ်ဖြောင့်လေးကြိုး မျဉ်းတို့၏ အချိုးသည် (၁ ဒသမ ၅) နှင့် (၂ ဒသမ ၅) ရှိရမည်ဖြစ်ပြီး လက်ရှိအနေအထားအရ အဆိုပါအချိုးမှာ (၁) နီးပါသာရှိသဖြင့် ရေလမ်းကြောင်းပေါက်နိုင်မှု အခွင့်အလမ်း နည်းပါးနိုင်မည် ဖြစ်ပါကြောင်း၊ သို့ဖြစ်ပါ၍ ၂၀၁၉ - ၂၀၂၀ ဘဏ္ဍာရေးနှစ်တွင် ကျောက်ရဲကျေးရွာနှင့် သဲရိုး ကျေးရွာကမ်းထိန်း လုပ်ငန်းအတွက် ခွင့်ပြုရန်ပုံ ငွေရရှိပါက ရေလမ်းထိန်းအစီအမံများ ဆောင်ရွက်ပေးမှုကြောင့် ဖြစ်ပေါ် တိုးတက်လာမည့် အခြေအနေ ရလဒ်အပေါ် မူတည်၍ ဆက်လက်ဆောင်ရွက်သင့်သော အစီအမံများကို တင်ပြသွားမည် ဖြစ်ပါကြောင်း ဖြေကြားသည်။

မကွေးတိုင်းဒေသကြီး မဲဆန္ဒနယ်အမှတ်(၁၀) မှ ဒေါက်တာကျော်ငွေ၏ မကွေးတိုင်းဒေသကြီး၊ ရေစကြိုမြို့နယ်၊ ကျောက်ကာအုပ်စုရှိ ကျောက်တံခါးဆည်တမံတွင် ရေထိန်းတံခါးတစ်ခု မိုးရာသီအမီ တပ်ဆင်ပေးရန် အစီအစဉ် ရှိ/မရှိ မေးခွန်းနှင့် စပ်လျဉ်း၍ စိုက်ပျိုးရေး၊ မွေးမြူရေးနှင့် ဆည်မြောင်း ၀န်ကြီးဌာန ဒုတိယ၀န်ကြီး ဦးလှကျော်က တမံမှ ရေပေးဝေမှု လွယ်ကူအဆင်ပြေစေရန် ရေထုတ်ပြွှန်ကို စနစ်တကျ တည်ဆောက်ပေးခြင်းနှင့် ရေပိုလွှဲ အခိုင်အမာ တည်ဆောက် ပေးခြင်းလုပ်ငန်းများကိုသာ ဆောင်ရွက်ပေးခြင်းက ပိုမိုသင့်လျော်မှုရှိသည်ကို စိစစ်တွေ့ရှိရပါကြောင်း၊

ထို့ကြောင့် ကျောက်တံခါးရေလှောင်တမံတွင် ရေထုတ်ပြွန်စနစ်တကျ တည်ဆောက်ခြင်းနှင့် ရေပိုလွှဲအခိုင်အမာ တည်ဆောက်ခြင်း လုပ်ငန်းများကို ဆောင်ရွက်ရန်အတွက် လိုအပ်သည့် စူးစမ်း တိုင်းတာလေ့လာမှု လုပ်ငန်းများကို ဦးစွာ ဆောင်ရွက်သွားမည် ဖြစ်ပါကြောင်း၊ အဆိုပါ လုပ်ငန်းများအရ ခန့်မှန်းကုန်ကျငွေ တွက်ချက်ကာ လိုအပ်ရန်ပုံငွေကို (၂၀၁၉ - ၂၀၂၀) ဘဏ္ဍာနှစ်၊ မကွေးတိုင်းဒေသကြီး အစိုးရအဖွဲ့ရန်ပုံငွေတွင် ထည့်သွင်းလျာ ထားတောင်းခံပြီး ရန်ပုံငွေ ခွဲဝေရရှိမှု အပေါ် မူတည်၍ ဆည်မြောင်းနှင့် ရေအသုံးချမှုစီမံခန့်ခွဲရေး ဦးစီးဌာနမှ လုပ်ငန်းများကို အကောင်အထည်ဖော် ဆောင်ရွက် သွားမည် ဖြစ်ပါကြောင်း ဖြေကြားသည်။

အလားတူ ရခိုင်ပြည်နယ် မဲဆန္ဒနယ်အမှတ် (၃)မှ ဦးခင်မောင်လတ်၊ ရခိုင်ပြည်နယ် မဲဆန္ဒနယ်အမှတ် (၅) မှ ဦးမြင့်နိုင်နှင့် မွန်ပြည်နယ် မဲဆန္ဒနယ်အမှတ်(၂) မှ ဒေါ်နွယ်နွယ်အောင်တို့၏ မေးခွန်းများနှင့် စပ်လျဉ်း၍ ဒုတိယ၀န်ကြီး ဦးလှကျော်နှင့် နေပြည်တော်ကောင်စီဝင် ဦးညီထွန်းတို့က ပြန်လည်ရှင်းလင်းဖြေကြားခဲ့ကြသည်။

ထို့နောက် ကလေးသူငယ်အခွင့်အရေးများဆိုင်ရာ ဥပဒေကြမ်းနှင့် စပ်လျဉ်း၍ လွှတ်တော်ကိုယ်စားလှယ်များက ဆွေးနွေး ကြသည်။

ပဲခူးတိုင်းဒေသကြီး မဲဆန္ဒနယ်အမှတ် (၅) မှ ဒေါက်တာ တင်တင်ဝင်းက အခန်း(၇) အပိုဒ် - ၂၃ အမျိုးသားနှင့် အမျိုးသမီး တို့၏ ထိမ်းမြားလက်ထပ်နိုင်သည့် အသက်သည် ၄င်းတို့၏ သက်ဆိုင်ရာ တည်ဆဲဥပဒေနှင့် ဓလေ့ထုံးတမ်းဥပဒေများတွင် သတ်မှတ်သည့် အတိုင်းဖြစ်စေရမည်။ သို့ရာတွင် လက်ထပ် ထိမ်းမြားခြင်း စာချုပ်ချုပ်ဆို၍ ထိမ်းမြား လက်ထပ်ခြင်းဖြစ်ပါ က ထိမ်းမြားလက်ထပ်ရန် ပဋိဥာဉ်ပြုနိုင်သည့် အသက်သည် ၁၈နှစ်ပြည့်ပြီး ဖြစ်ရမည်ဟု ပါရှိပါကြောင်း၊ မိမိအနေဖြင့် အပိုဒ် - ၂၃ တစ်ပိုဒ်လုံးကို ပယ်ဖျက်လိုပါကြောင်း၊ ဥပဒေ၏ အပိုဒ်တစ်ခုတည်းတွင် အသက် ၁၈ နှစ်အောက်နှင့် ၁၈ နှစ်အထက် ဖြစ်နေပါကြောင်း၊ ဥပဒေတစ်ခုတည်းတွင် ဒွိဟဖြစ်စရာ ဖြစ်နေပါကြောင်း၊ ကလေး အကျိုး စီးပွားနှင့်လည်း သက်ဆိုင်ခြင်းလည်း မရှိသောကြောင့် ပယ်ဖျက်လိုခြင်း ဖြစ်ပါကြောင်း ဆွေးနွေးသည်။

တပ်မတော်သားကိုယ်စားလှယ် ဒုတိယဗိုလ်မှူးကြီး မျိုးထွန်းအောင်က ကလေးသူငယ် အခွင့်အရေးများဆိုင်ရာ ဥပဒေကြမ်း အခန်း ၁၊ ပုဒ်မ ၃၊ ပုဒ်မခွဲ (ဂ) တွင်ပါရှိသည့် “နှင့် အခြားခိုင်လုံသော အထောက်အထားစာတမ်း အမှတ်အသား” ဆိုသည့် စကားရပ်ကို ပယ်ဖျက်ရန်နှင့် ၄င်းနှင့် တစ်ဆက်တစ်စပ်တည်းဖြစ်သော ပုဒ်မ ၁၁၀ ပုဒ်မခွဲ (က) ပုဒ်မခွဲငယ် (၆) တွင် ပါရှိသည့် ပုဒ်မခွဲငယ် (၁) မှ (၅)အထိ သတ်မှတ်ထားသော အထောက်အထားများ မရရှိပါက အခြားခိုင်လုံသော အထောက်အထား စာတမ်းအမှတ်အသား တစ်ခုခုဟူသည့် စကားရပ်ကို ပယ်ဖျက်ရန် အဆိုပြု ဆွေးနွေးသွားမည် ဖြစ်ပါကြောင်း။

ကျိုးကြောင်းဖော်ပြချက်အနေဖြင့် “အခြားခိုင်လုံသော အထောက်အထား စာတမ်းအမှတ်အသား” ဟူသည့်စကားရပ်သည် ယျေဘုယျ ဆန်၍ အဓိပ္ပာယ် တိတိကျကျ ဖော်ပြနိုင်ခြင်း မရှိသည့်အပြင် အထောက်အထား ခိုင်လုံမှုကိုတာဝန်ခံ သတ်မှတ်မည့်သူ မပါရှိပါသောကြောင့် ပယ်ဖျက်လိုခြင်း ဖြစ်ပါကြောင်း။

ဥပဒေကြမ်းပါ ပုဒ်မ ၃၊ ပုဒ်မခွဲ ည၊ ဋ၊ ဌ၊ ဍ တို့ကို ပြင်ဆင် အဆိုပြုရသည့် အကြောင်းအရင်း မှာ လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေး ၀န်ကြီးဌာန၏ စိစစ်ကြီးကြပ်မှု ရှိမှသာလျှင် သင်တန်းကျောင်း၊ ပရဟိတ ဂေဟာ၊ ယာယီစောင့်ရှောက်ရေးဂေဟာ၊ အခြားနည်းဖြင့် ပြုစုစောင့်ရှောက်မှုတို့၏ လုပ်ဆောင်ချက်များသည် ဥပဒေပါ ပြဋ္ဌာန်းချက်များ၊ ရည်ရွယ်ချက်များနှင့် ကိုက်ညီမှု ရှိ/မရှိ၊ တာဝန်ခံမှု၊ တာဝန်ယူမှု ရှိ/မရှိ စိစစ်ကြီးကြပ်နိုင်မည် ဖြစ်သကဲ့သို့ ဥပဒေနှင့်အညီ မှတ်ပုံတင် တည်ထောင်ဖွဲ့စည်းထားသော အဖွဲ့အစည်းများ ဖြစ်သင့် ပါသောကြောင့် ပြင်ဆင်၊ ဖြည့်စွက်၊ အဆိုပြုရခြင်း ဖြစ်ပါကြောင်း ဆွေးနွေးသည်။

ယင်းဥပဒေကြမ်းနှင့် စပ်လျဉ်း၍ ရခိုင်ပြည်နယ် မဲဆန္ဒနယ် အမှတ်(၈) မှ ဦးကျော်ကျော်ဝင်း၊ ကယားပြည်နယ် မဲဆန္ဒနယ် အမှတ်(၉) မှ ဦးစိုးသိန်း၊ ဧရာဝတီတိုင်းဒေသကြီး မဲဆန္ဒနယ် အမှတ်(၃) မှ ဦးဆန်းမြင့်၊ တပ်မတော်သားကိုယ်စားလှယ် ဗိုလ်မှူးရဲအောင်စော၊ တနင်္သာရီတိုင်းဒေသကြီး မဲဆန္ဒနယ် အမှတ်(၁၀)မှ ဦးစိုးသိန်း (ခ) ဦးမောင်စိုးတို့က ဆက်လက် ဆွေးနွေးကြသည်။

ဒုတိယအကြိမ် အမျိုးသားလွှတ်တော် (၁၁) ကြိမ်မြောက် ပုံမှန်အစည်းအဝေး ဆဋ္ဌမနေ့ကို ဇန်န၀ါရီ ၃၀ ရက်တွင် ဆက်လက်ကျင်းပ သွားမည်ဖြစ်ကြောင်း သိရသည်။

အောင်ရဲသွင်၊ လူမော် (သတင်းစဉ်)