ထာဝစဉ်မမေ့အပ်သင့်သော အမျိုးသားအောင်ပွဲနေ့

မြန်မာနိုင်ငံသည် ရှေးပဝေသဏီကတည်းကပင် ကိုယ့်ထီး၊ ကိုယ့်နန်း၊ ကိုယ့်ကြငှန်းဖြင့် မားမားမတ်မတ် ရပ်တည်ခဲ့သည့် သမိုင်းအထောက်အထားများ ခိုင်လုံစွာရှိနေသည်။ မြန်မာအစတကောင်းကဟု ဆိုရိုးစကား ရှိခဲ့သည်။ လွန်ခဲ့သော ဘီစီ ၆ဝဝ ခန့်က ဧရာဝတီမြစ်အရှေ့ဘက်ကပ်လျက်ရှိသော သပိတ် ကျင်း နေရာတစ်ဝိုက် တွင် တကောင်းမြို့ကို စတင်တည်ခဲ့သည် ဟု မှတ်သားဖူး ပါသည်။ ထို့နောက် သရေခေတ္တရာ၊ ဗိဿနိုး၊ ဟန်လင်းမြို့ ပြနိုင်ငံများကို ခံ့ညားထည်ဝါစွာ ထူထောင်နိုင် ခဲ့သည်။ 

ထို့အပြင် ထင်ရှားသော နိုင်ငံတော်ကြီးသုံးခုလည်း ပေါ်ထွန်းခဲ့ပြန် သည်။ အနော်ရထာမင်းကြီးသည် အေဒီ ၁ဝ၄၄ မှ ၁ဝ၇၇ အတွင်း ပထမမြန်မာနိုင်ငံတော်ကြီးကို တည်ထောင် နိုင်ခဲ့ပြီး မြောက်ဘက် တွင် တရုတ်ပြည်၊ အရှေ့မြောက်ဘက်တွင် ရှမ်းပြည်နယ်၊ တောင်ဘက်တွင် မလေးကျွန်းဆွယ် အထိကျန်ပြန့်ခဲ့သည်။

ဒုတိယမြန်မာနိုင်ငံတော်ကြီးကိုမူ ဘုရင့်နောင်မင်းတရားကြီးက အေဒီ ၁၅၅၁ - ၁၅၈၁ ခုနှစ် တွင်လည်းကောင်း တည်ထောင်နိုင်ခဲ့ပြီး နိုင်ငံအကျယ် အဝန်းသည် ပထမမြန်မာနိုင်ငံတော်ထက်ကျယ်ဝန်း ကာ ဇင်းမယ်၊အယုဒ္ဓယနှင့် လင်းဇင်းနယ်တို့အထိ ပါဝင်ခဲ့သည်။

ထို့နောက် အလောင်းမင်းတရားကြီးသည် အေဒီ ၁၇၅၂ မှ ၁၇၆ဝ ပြည့်နှစ် အတွင်း တတိယမြန်မာနိုင်ငံတော်ကြီးကို ကျယ်ပြောစွာ ထူထောင်ခဲ့သည်။

ထိုစဉ်က ကာကွယ်ရေး အင်အားကို ကျောထောက် နောက်ခံပြုလျက် သုံးကြိမ်တိုင်တိုင် စည်းလုံး ညီညွတ်သော မြန်မာနိုင်ငံ တော်ကြီးများ အဖြစ် ခံ့ညားထည်ဝါစွာတည် ထောင်နိုင်ခဲ့ခြင်းဖြစ်သည်။ ထိုခေတ်ကာလများတွင် ဒေသ တွင်းသာမက ကမ္ဘာ့အဆင့်အထိပါ နိုင်ငံရေး၊ စစ်ရေး၊ စီးပွားရေး၊ လူမှုရေးနယ်ပယ်ပေါင်းစုံတွင် ဂုဏ်ရှိန်ရောင်ဝါထွန်း ပြောင်နိုင်ခဲ့ သည်။ ကျူးကျော်စော်ကားလာ သူများကိုလည်း စည်းလုံးညီညွတ်မှုစွမ်းအား၊ ကာကွယ်ရေးစွမ်းအား တို့ဖြင့် တိုက်ထုတ်နိုင်ခဲ့သည်။ ထိုနိုင်ငံကြီးများသည် အင်အားတောင့် တင်းပြီး စွမ်းရည်ထက်မြက်သော တပ်မတော်များ ဖွဲ့စည်း ထူထောင်ခဲ့ မှုကြောင့်သာ ခိုင်မာစွာရပ်တည်နိုင်ခဲ့သည်ဆို သော သက်သေသာဓက သမိုင်းဖြစ်စဉ်များပင် ဖြစ်သည်။

သူ့ကျွန်ဘဝကျရောက်ခဲ့

သို့ရာတွင် အင်္ဂလိပ်နယ်ချဲ့တို့က ဘကြီးတော်ဘုရား လက်ထက် ၁၈၂၄ ခုနှစ်တွင် တစ်ကြိမ်၊ ပုဂံမင်းလက်ထက် ၁၈၅၂ ခုနှစ်တွင် တစ်ကြိမ်၊ သီပေါမင်းလက်ထက် ၁၈၈၅ ခုနှစ်တွင် တစ်ကြိမ် ခေတ်မီစစ်လက်နက်များဖြင့် ကျူးကျော် စစ်သုံးကြိမ်တိုင်တိုင် တိုက်ခိုက်ခဲ့ကြသည်။ ထို့ကြောင့် ၁၈၈၆ ခုနှစ် ဇန်နဝါရီလ ၁ ရက်နေ့ တွင် ထီးကျိုးစည်ပေါက် တစ်နိုင်ငံလုံး သူ့ကျွန်ဘဝ ကျရောက်ခဲ့ရ သည်။ ထိုသို့ သူ့ကျွန် ဘဝ ကျရောက်ပြီးနောက် တိုင်းရင်းသား ညီအစ်ကိုများသည်ရရာ လက်နက်စွဲကိုင်လျက် နယ်ချဲ့တို့အား တွန်းလှန်တိုက် ခိုက်ခဲ့ကြသည်။ မည်သို့ပင်အသက်ပေး တိုက်ခိုက်စေကာမူအားမတန်၍မာန်လျှော့ခဲ့ရသည်။ ၁၉ဝဝ ပြည့်လွန်နှစ်များ တွင် အမျိုးသားရေးစိတ်ဓာတ် အနည်းငယ်မှေးမှိန် သွားခဲ့ရသည်။ ထိုကာလများသည် ပြည်ထောင်စုဖွား တိုင်းရင်းသား အားလုံးအတွက် နယ်ချဲ့တို့၏ ညှဉ်းပန်းနှိပ်စက် ကုပ်သွေးစုပ်မှု ဒဏ်များကို ခါးစည်းခံခဲ့ရသည့် ပင်ပန်းကြမ်းတမ်း သော နေ့ရက်များပင်ဖြစ်သည်။

ကျွန်သက်ရှည်ရန်ကြံစည်

နယ်ချဲ့တို့၏အကောင်းဆုံးလက်နက်သည် ကိုလိုနီနိုင်ငံရှိ ပြည်သူများကို ပညာရည်အဆင့်အတန်း နိမ့်ပါးအောင် ဆောင်ရွက်ခြင်းဖြစ်သည်။ မြန်မာနိုင်ငံအား ကိုလိုနီတို့သိမ်း ပိုက်ပြီးစအချိန်တွင် မြန်မာလူမျိုးတို့၏ စာတတ်မြောက် မှုနှုန်းသည် ၈၅ ရာခိုင်နှုန်းခန့်ရှိခဲ့သည်။ သို့သော်နှစ်ပေါင်း ၃၅ နှစ်ခန့်ကြာပြီး နောက် စာတတ်မြောက်မှုနှုန်းသည် ၃၅ ရာခိုင် နှုန်းအထိ သိသိသာသာ ကျဆင်းသွားသည်။ ထိုစဉ်ကမြန်မာ နိုင်ငံတွင် သီးခြား တက္ကသိုလ်မရှိဘဲ အိန္ဒိယနိုင်ငံ ကာလ ကတ္တားတက္ကသိုလ် လက်အောက်ခံ ရန်ကုန်ကောလိပ်နှင့် ဂျပ်ဆင်ကောလိပ်နှစ်ခု သာရှိခဲ့သည်။

ထို့အပြင် ဗြိတိသျှနယ်ချဲ့တို့သည် ၁၉၂ဝ ပြည့်နှစ် ဇွန်လ တွင် ပညာရေးစနစ်သစ် တက္ကသိုလ် အက်ဥပဒေကြမ်းကို ထုတ်ပြန်ကြေညာ ခဲ့သည်။ ထိုဥပဒေတွင် အဓိကအချက် ခြောက်ချက်ပါရှိသည်။ ထိုအချက် အားလုံးသည် မြန်မာ ကျောင်းသားများကို ကန့်သတ်ချုပ်ချယ်ပြီး အဆင့်အတန်း ခွဲခြားထားသည်။ ကျွန်သက်ရှည်စေရန် ရည်ရွယ်ရေးဆွဲထားခြင်း ဖြစ်သည်။ ဆိုရလျှင် ထိုဥပဒေသည် ငွေကြေးတတ်နိုင်သူ လူနည်းစုကိုသာ တက္ကသိုလ် ပညာ သင်ကြားခွင့်ရရှိစေပြီး ပညာထူးချွန်သော်လည်း ငွေကြေးမတတ်နိုင်သည့် တောင်သူ လယ်သမားများ၊ အလုပ်သမားများနှင့် လက်လုပ်လက်စား အောက်ခြေ လူတန်းစားများ၏ သား၊ သမီးများကို ပညာ ဆက်လက်သင်ကြား ခွင့်မရရှိနိုင်အောင် ချုပ်ချယ်ကန့်သတ် ပြဋ္ဌာန်းထားခြင်းဖြစ်သည်။ အဆင့်အတန်း ခွဲခြားထားသည့် ထိုဥပဒေကို ကောလိပ်ကျောင်းသားများ အပါအဝင် ပြည်သူ အားလုံးက အပြင်းအထန် ကန့်ကွက်ခဲ့ကြသည်။ မည်သို့ပင် ကန့်ကွက်နေစေကာမူ မြန်မာပြည်ဘုရင်ခံ ဆာရယ်ဂျီနယ် ခရက်ဒေါက်က မြန်မာများသည် ပညာရေးအကြောင်း နားမလည်ဟုဆိုပြီး တောင်းဆိုချက်များကို လျစ်လျူရှုကာ ထိုနှစ် ဒီဇင်ဘာလ ၂ ရက်နေ့မှစ၍ တက္ကသိုလ်အက်ဥပဒေကို အတည်ပြုကြောင်း ကြေညာခဲ့သည်။

ကန့်ကွက်သပိတ်မှောက်

ထို့ကြောင့် ကောလိပ်ကျောင်းသားများသည် ဒီဇင်ဘာလ ၂ ရက်နေ့ တွင် ရွှေတိဂုံရင်ပြင်၌ တိုင်ပင်ဆွေးနွေးကြပြီး ရန်ကုန် တက္ကသိုလ် အက်ဥပဒေကို ကန့်ကွက်သည့်အနေဖြင့် ကောလိပ် နှစ်ခုစလုံးက သပိတ်မှောက်သွားရန် ဆုံးဖြတ်ခဲ့ကြသည်။ ထို့နောက် ဒီဇင်ဘာလ ၄ ရက်နေ့တွင် ရန်ကုန်မြို့ ဗဟန်းမြို့နယ် ရှိ ရွှေကျင်တိုက် ဆရာတော် ဦးအရိယကျောင်းတိုက်၌ ကျောင်းသား အစည်းအဝေး ပွဲကြီး ပြုလုပ်ခဲ့သည်။ ထိုအစည်းအဝေး၌ ဒီဇင်ဘာလ ၇ ရက်နေ့တွင် တက္ကသိုလ်ကိုသပိတ်မှောက်ရန်၊ ပညာရေးဥပဒေပြုပြင်ပေးရေး အတွက် တောင်းဆိုသွားရန်နှင့် တောင်းဆိုချက်များ မပေးသမျှ ကာလပတ်လုံး ကျောင်းပြန် မတက်ရန်တို့ကို ဆုံးဖြတ်ခဲ့ကြသည်။ မူလက ဒီဇင်ဘာလ ၇ ရက်နေ့တွင် သပိတ်မှောက်ရန် စီစဉ် ထားသော်လည်း အခြေအနေ ပြောင်းလဲသွားသဖြင့် ဒီဇင်ဘာ လ ၅ ရက် (တန်ဆောင်မုန်းလပြည့်ကျော် ၁ဝ ရက်နေ့)တွင် ကျောင်းသားများ သပိတ်မှောက်ခဲ့ကြသည်။ ထိုစဉ်က ကျောင်းသားခေါင်းဆောင် ကိုဘဦး ကိုယ်တိုင်လက်မှတ်ထိုး၍ ကျောင်းသားကြေညာချက်ကို ဘုရင်ခံထံ ပေးပို့ခဲ့သည်။ ထိုကြေညာချက်သည် ရန်ကုန်တက္ကသိုလ် အက်ဥပဒေပါ အချက် များကို ကန့်ကွက်ထားသည့် စာဖြစ်သည်။ ဘုရင်ခံထံမှအကြောင်း ပြန်ကြားခြင်းမပြုသဖြင့် ကျောင်းသားများသည် သပိတ်စခန်း တွင် အမျိုးသားကျောင်းများ တည်ထောင်ရန် ဂျီစီဘီအေ ခေါင်းဆောင်များနှင့် တိုင်ပင်ဆွေးနွေးခဲ့ကြသည်။

ထို့နောက် ရန်ကုန်ကောလိပ်နှင့် ဂျပ်ဆင်ကောလိပ်ကျောင်း သားများသည် ၁၉၂ဝ ပြည့်နှစ် ဒီဇင်ဘာလ ၅ ရက်နေ့ မြန်မာ သက္ကရာဇ် ၁၂၈၂ ခုနှစ် တန်ဆောင်မုန်းလပြည့်ကျော် ၁ဝ ရက် နေ့တွင် ရန်ကုန်တက္ကသိုလ်အက်ဥပဒေကို ကန့်ကွက်သည့် အနေဖြင့် သပိတ်မှောက်ခဲ့ကြသည်။ ထိုသပိတ်သည် ဗြိတိသျှ နယ်ချဲ့တို့က မြန်မာနိုင်ငံအား မတရားသိမ်းပိုက်ပြီးနောက် လွတ်လပ်ရေးအတွက် အမျိုးသားတော်လှန်ရေးကြီးကို စတင် လိုက်ခြင်းပင် ဖြစ်သည်။ ထိုကျောင်းသားသပိတ်သည်တစ်နိုင်ငံ လုံးသို့ တစ်မုဟုတ်ချင်း ပျံ့နှံ့သွားခဲ့သည်။ ထို့အပြင် ထိုသပိတ်ကို အခြေခံပြီးထွက်ပေါ်လာသည့် မျိုးချစ်စိတ်ဓာတ်ဖြင့် တိုင်းရင်း သားစည်းလုံးညီညွတ်မှုကို ရယူတည်ဆောက်ကာ လွတ်လပ် ရေးတိုက်ပွဲကိုလည်း အောင်မြင်အောင် ဆင်နွှဲနိုင်ခဲ့သည်။

အမျိုးသားကျောင်းများပေါ်ထွန်းခဲ့

ထိုစဉ်က တက္ကသိုလ်သပိတ်ကို တစ်နိုင်ငံလုံးကထောက်ခံ ခဲ့ကြသည်။ ထိုအက်ဥပဒေသည် တက္ကသိုလ်ကျောင်းသားများအပြင် တက္ကသိုလ်တက်မည့်ကျောင်းသားများကိုပါ ထိခိုက်သဖြင့် အထက်တန်းကျောင်းသား များကလည်း သပိတ်မှောက်ခဲ့ကြသည်။ ထို့နောက် တက္ကသိုလ်ကို ရာသက်ပန်သပိတ်မှောက် ရန်ဆုံးဖြတ်ခဲ့ကြ သည်။ ၁၉၂၁ ခုနှစ် သြဂုတ်လတွင် ရန်ကုန်မြို့ ဗဟန်းမြို့နယ် ရွှေကျင်ကျောင်းတိုက်ကြီးတွင် အမျိုးသား ကောလိပ် ကို ဖွင့်လှစ်ခဲ့သည်။ အမျိုးသားပညာရေးကောင်စီကို လည်း ဖွဲ့စည်းနိုင်ခဲ့သည်။ အောင်မြင်မှုအနေဖြင့် မြန်မာတစ်နိုင်ငံလုံးတွင် အမျိုးသားကျောင်းများ ပေါ်ထွန်းလာခဲ့သည်။

လွတ်လပ်ရေး အတွက် ရောင်ခြည်သမ်း

မည်သို့ပင်ဆို စေကာမူ ၁၉၂ဝ ပြည့်နှစ်ကျောင်းသား သပိတ် ကြောင့် ပညာရေးအမြတ်များပေါ် ထွက်လာခဲ့သည်။ ထို့အပြင် ပြည်သူလူထုအတွင်း၌ နယ်ချဲ့ဆန့်ကျင်ရေး အမျိုးသားစိတ်ဓာတ် များ တစ်ဟုန်ထိုးပေါ်ပေါက် လာခဲ့သည်။ ထို့ကြောင့် ကျောင်းသား သပိတ်သည် မြန်မာတို့၏ နယ်ချဲ့ဆန့်ကျင်ရေး စိတ်ဓာတ် တော်လှန်ရေး အောင်ပွဲဟုလည်း ဆိုနိုင်ပေသည်။ ထိုသပိတ် ကြီးက မွေးထုတ်ပေးလိုက်သော အမျိုးသားအောင်ပွဲနေ့ စိတ်ဓာတ်ကြောင့် နယ်ချဲ့ဆန့်ကျင်ရေးကို အတိအလင်း ဖော်ပြသည့် တောင်သူ လယ်သမား၊ အလုပ်သမား သပိတ်များနှင့် ၁၃ဝဝ ပြည့် အရေးတော်ပုံများ ဆက်တိုက်ပေါ်ထွက်ခဲ့သည်။

ထို့နောက် မျိုးချစ်စိတ်ဓာတ်ပြင်းထန်သော တိုင်းရင်းသား သူရဲကောင်းများသည် ရရာလက်နက်စွဲကိုင်၍ နယ်ချဲ့တို့အား နည်းလမ်းပေါင်းစုံဖြင့် တွန်းလှန်တိုက်ခိုက်ခဲ့ကြသည်။မည်သို့ပင် ဆိုစေကာမူ တိုင်းရင်းသားများ အကြား မျိုးချစ် စိတ်ဓာတ်နိုးကြား လာသဖြင့် ဝိုင်အမ်ဘီအေ၊ ဂျီစီဘီအေ၊ တို့ဗမာအစည်းအရုံး၊ ဗမာ့ထွက်ရပ်ဂိုဏ်း စသည့်အဖွဲ့အစည်းများ ဖွဲ့စည်း၍ နယ်ချဲ့ ဆန့်ကျင်ရေးလုပ်ငန်းများ အရှိန်မြှင့်တင် လှုပ်ရှားဆောင်ရွက် လာခဲ့ရာ မြန်မာ့လွတ်လပ်ရေးအတွက် ရောင်ခြည်သမ်း လာခဲ့ပါသည်။

အမျိုးသားအောင်ပွဲနေ့

၁၉၂၁ ခုနှစ် ဒီဇင်ဘာလအတွင်း မန္တလေးမြို့၌ ကျင်းပ သည့် ဂျီစီဘီအေပြည်လုံးကျွတ်ညီလာခံကြီး၌ အမျိုးသား နေ့သတ်မှတ်ရန် ဆွေးနွေးတိုင်ပင်ခဲ့ကြသည်။ ထိုညီလာခံတွင် တချို့က သီပေါဘုရင် ပါတော်မူသော တန် ဆောင်မုန်းလပြည့်ကျော် ၈ ရက်နေ့ကို အကြံပေးခဲ့ကြသည်။ တချို့က ဦးဥတ္တမအဖမ်းခံ ရသောနေ့ကို အကြံပေးကြ သည်။ ၁၉၂ဝ ပြည့်နှစ်သပိတ် ၁၁ ဦး ကော်မတီတွင် ပါဝင်ခဲ့သော ဦးမြင့် က နယ်ချဲ့ကို ပထမဆုံးတော်လှန် သပိတ်မှောက် ခဲ့သည့် တန်ဆောင်မုန်းလပြည့်ကျော် ၁ဝ ရက်နေ့ကို အမျိုးသား နေ့အဖြစ် သတ်မှတ်ရန် အကြံပြုခဲ့သည်။
ထို့နောက် ဂျီစီဘီအေအသင်းကြီးသည် ၁၉၂၂ ခုနှစ် ဇွန်လ ၁၇ ရက်နေ့တွင် ရန်ကုန်မြို့ ဂျူဗလီဟော၌ ပြုလုပ်သည့်အထူး အစည်းအဝေးကြီး၌ ကောလိပ်ကျောင်းသားများက ရန်ကုန် တက္ကသိုလ်အက်ဥပဒေကို ဆန့်ကျင်ကန့်ကွက်သပိတ် မှောက်ခဲ့သည့် တန်ဆောင်မုန်းလပြည့်ကျော် ၁ဝ ရက်နေ့ကို အမျိုးသားနေ့ (National Day) အဖြစ် တညီတညွတ်တည်း ဆုံးဖြတ်သတ်မှတ်ခဲ့ကြသည်။ ထိုအချိန်မှစ၍ နှစ်စဉ် ထိုနေ့ ထိုရက်ရောက်ရှိလျှင် အမျိုးသားအောင်ပွဲနေ့ အခမ်းအနားများ ကျင်းပလာခဲ့သည်။ ထို့ကြောင့် ၁၃၈ဝ ပြည့်နှစ် တန်ဆောင်မုန်း လပြည့်ကျော် ၁ဝ ရက်နေ့သည် လွတ်လပ်ရေးအတွက် သန္ဓေတည်ပေးခဲ့သော သမိုင်းဝင်(၉၈)နှစ် မြောက် အမျိုးသားအောင်ပွဲနေ့အခါသမယပင် ဖြစ်သည်။

အမျိုးသားရေးစိတ်ဓာတ်သည်သာလျှင်

ဆိုရလျှင် အမျိုးသားရေးစိတ်ဓာတ်သည် တိုင်းပြည်နှင့် လူမျိုးကို ချစ်ခင်သောစိတ်ဓာတ်ပင် ဖြစ်သည်။ တစ်နိုင်ငံ တည်းနေ၊ တစ်မြေတည်းဖွား တိုင်းရင်းသားညီအစ်ကိုများကို ချစ်ခင်ခြင်း၊ စောင့်ရှောက်ခြင်းနှင့် တိုင်းပြည်နှင့် လူမျိုးအကျိုးကိုထာဝစဉ် သယ်ပိုးသွားလိုသည့်စိတ်ဓာတ်ပင်ဖြစ်ပေသည်။ အမှန်စင်စစ်မှာမူ ပြည်ထောင်စုဖွား တိုင်းရင်းသားများသည် ရှေးပဝေသဏီကတည်း ကပင် တစ်မြေတည်းနေ၊ တစ်ရေ တည်းသောက်၊ မရှိအတူရှိ အတူ၊ အေးအတူပူအမျှ၊ ဥမကွဲ သိုက်မပျက်၊ ဆိုးတူကောင်းဖက် လက်တွဲနေထိုင်လာခဲ့ကြ သည်မှာ ငြင်းဆို၍မရသော ပကတိအရှိတရားပင် ဖြစ်သည်။ ထို့ကြောင့် မျိုးဆက်သစ်များသည် တိုင်းပြည်နှင့် လူမျိုးအတွက် အသက်တမျှအရေးပါလှသော ထိုစိတ်ဓာတ်မျိုးကို ဆက်လက်ထိန်းသိမ်းသွားရန် လိုအပ်ပေသည်။

လက်ရှိအချိန်တွင် တိုင်းရင်းသားအားလုံး လိုလား တောင့်တနေသော အန္တိမဆန္ဒသည် ထာဝရငြိမ်းချမ်းရေးပင် ဖြစ်သည်။

ထိုသို့ထာဝရငြိမ်းချမ်းရေးတည်ဆောက်ရာတွင် အမျိုးသားရေး စိတ်ဓာတ် သည် များစွာအရေးပါလျက် ရှိသည်။ ပြည်ထောင်စုကြီးအတွင်း မှီတင်းနေထိုင်လျက်ရှိကြသည့် တိုင်းရင်းသားညီအစ်ကိုများသည် လွတ်လပ်ရေးတိုက်ပွဲ ဝင်ခဲ့သည့် ဘိုးဘွားမိဘများကဲ့သို့ ရင်ထဲအသည်းထဲ၌ အမျိုး သားရေးစိတ်ဓာတ်၊ မျိုးချစ်စိတ်ဓာတ်နှင့်ပြည်ထောင်စုစိတ်ဓာတ်တို့သာ ကိန်းအောင်းနေမည်ဆိုလျှင် တိုင်းပြည်အတွင်း ၌ ထာဝရငြိမ်းချမ်းရေးကို အမှန်တကယ်ဖော်ဆောင်နိုင်မည် ဟု ရိုးသားခိုင်မာစွာ ယုံကြည်မိပါသည်။

ထို့နည်းတူစွာ တိုင်းရင်းအားလုံးလိုလားတောင့်တနေသည့် ဒီမိုကရေစီဖက်ဒရယ်ပြည်ထောင်စုကြီးကိုလည်း မရှိ အတူ ရှိအတူ၊ အေးအတူ ပူအမျှ အတူတကွ နေထိုင်သွားမည်၊ ပြည်ထောင်စုကြီး

အတွင်းမှ မည်သည့် အခါမျှခွဲထွက်သွား မည်မဟုတ်ဆိုသော ခိုင်မာသည့် ပြည်ထောင်စုစိတ်ဓာတ် စစ်စစ်ဖြင့်သာ တည်ဆောက်သွား မည် ဆိုလျှင် မဝေးတော့ သည့် အနာဂတ်တွင် ဒီမိုကရေစီဖက်ဒရယ်ပြည်ထောင်စုကြီးပေါ်ထွန်းလာမည်မှာ မြေကြီးလက်ခတ်မလွဲပင်ဖြစ်သည်။

ဆိုရလျှင် တိုင်းရင်းသားညီအစ်ကိုများသည် နယ်ချဲ့လက်အောက်ရောက်ခဲ့သည့် တိုင်အောင် အမျိုးသားရေး စိတ်ဓာတ်ကို အခြေခံကာလွတ်လပ်ရေးရရှိသည်အထိ တိုက်ပွဲဝင်ခဲ့ကြသည်။ ထိုသို့လွတ်လပ်ရေးအတွက် အရေးပါသည့် အမျိုးသားအောင်ပွဲနေ့၏အနှစ်သာရကို မျိုးဆက်သစ်လူငယ် များအကြား အမှတ်ထင်ထင်ရှိနေရန် လည်း လိုအပ်ပေ သည်။

သို့မှသာလျှင် မိမိတိုင်းပြည်နှင့်လူမျိုးကို ချစ်မြတ်နိုးစိတ် နှင့်အချုပ်အခြာအာဏာ၏အရေးပါမှုတို့ကို တန်ဖိုးထား တတ် လာနိုင်မည်ဖြစ်သည်။ မည်သို့ပင်ဆိုစေကာမူ မျိုးဆက်သစ် တိုင်းရင်းသားညီအစ်ကိုများ အနေဖြင့် မြန်မာတို့၏ ဇာတိ သွေး၊ ဇာတိမာန်၊ မျိုးချစ်စိတ်ဓာတ်ရှင်သန်တက်ကြွလာစေ ရန်နှင့် လွတ်လပ်ရေး အတွက် သန္ဓေတည်ပေးခဲ့သော အမျိုးသားအောင်ပွဲနေ့ကို ထာဝစဉ်သတိရ တန်ဖိုးထားသွား စေလိုပါကြောင်း ဆန္ဒပြုရင်း (၉၈)နှစ်မြောက် အမျိုးသား အောင်ပွဲနေ့ကို ဂုဏ်ပြုရေးသားလိုက်ရပါသည်။ ။

မောင်သောင်းဝင်း (တမန်ဟောင်း)