နေပြည်တော် သြဂုတ် ၃
ဒုတိယအကြိမ် အမျိုးသားလွှတ်တော် န၀မ ပုံမှန်အစည်းအဝေး ပဉ္စမနေ့ကို ယနေ့နံနက် ၁၀နာရီတွင် နေပြည်တော်ရှိ အမျိုးသားလွှတ်တော် အစည်းအဝေးခန်းမ၌ ကျင်းပရာ ကြယ်ပွင့်ပြမေးခွန်းများ မေးမြန်းခြင်းနှင့် ဖြေကြားခြင်း၊ ဥပဒေကြမ်း ၁ခု ဆွေးနွေးခြင်းနှင့် အစီရင်ခံစာ ၁ခု ဖတ်ကြားခြင်းတို့ကို ဆောင်ရွက်ကြသည်။
အစည်းအဝေးတွင် စစ်ကိုင်းတိုင်းဒေသကြီး မဲဆန္ဒနယ်အမှတ်(၁၂)မှ ဦးမင်းနိုင်၏ စစ်ကိုင်းတိုင်းဒေသကြီး၊ နာဂကိုယ်ပိုင်အုပ်ချုပ်ခွင့်ရဒေသ၊ လဟယ်မြို့နယ်၊ အိန္ဒိယ နယ်စပ်လမ်းတွင် လုံဝသိင်္ခနှင့် ဂမ်းညကြားရှိ ၀ါးချောင်းကိုလည်းကောင်း၊ ဂမ်းညနှင့် ယမ်းကြုန်းကြားရှိ ယမ်းကြုန်းချောင်းကိုလည်းကောင်း ပေ(၁၀၀)ရှိ ဘေလီတံတားနှစ်စင်း တည်ဆောက်ပေးရန် အစီအစဉ် ရှိ/မရှိ မေးခွန်းနှင့် စပ်လျဉ်း၍ နယ်စပ်ရေးရာဝန်ကြီးဌာန ဒုတိယ၀န်ကြီး ဗိုလ်ချုပ်သန်းထွဋ်က ၀န်ကြီးဌာနအနေဖြင့် နာဂဒေသအတွက် ၂၀၁၇-၂၀၁၈ ဘဏ္ဍာရေး နှစ်တွင် ငွေကျပ် (၃၂၀၄ ဒသမ ၈၅၇)သန်းဖြင့် ဒေသဖွံ့ဖြိုးရေးလုပ်ငန်းများကို အကောင်အထည်ဖော် ဆောင်ရွက်ပေးခဲ့ပါကြောင်း၊ ထို့ပြင် နာဂဒေသအတွက် အိန္ဒိယနိုင်ငံမှ ထောက်ပံ့ပေးအပ်သည့် ပထမအကြိမ် ထောက်ပံ့ငွေကျပ် (၁၇၄၈ ဒသမ ၈၄၉၂)သန်း၊ ဒုတိယအကြိမ် ထောက်ပံ့ငွေကျပ် (၂၃၁၁ ဒသမ ၃၃)သန်း၊ တတိယအကြိမ် ထောက်ပံ့ငွေကျပ် (၂၈၇၉ ဒသမ ၁၅၁) သန်းတို့ဖြင့် ဒေသဖွံ့ဖြိုးရေးလုပ်ငန်းများကို အကောင် အထည်ဖော် ဆောင်ရွက်ပေးလျက်ရှိပါကြောင်း။
လွှတ်တော်ကိုယ်စားလှယ်မေးမြန်းသည့် နာဂကိုယ်ပိုင်အုပ်ချုပ်ခွင့်ရဒေသ၊ လဟယ်မြို့နယ်၊ အိန္ဒိယနယ်စပ် လမ်းတွင်ရှိသည့် ယမ်းကြုန်းချောင်းတို့တွင် ပေ ၁၀၀ရှိ ဘေလီတံတား ၂စင်း တည်ဆောက်ပေးရန်နှင့် ပတ်သက်၍ မြေပြင်ကွင်းဆင်းစစ်ဆေးခဲ့ရာ တင်ပြထားသကဲ့သို့ ပေ၁၀၀ မရှိဘဲ ပေ ၆၀သာ ရှိသည့်တံတား ၂စင်းဖြစ် သည်ကို တွေ့ရှိရပါကြောင်း၊ အဆိုပါ တံတား ၂ စင်းကို အိန္ဒိယနိုင်ငံမှ ပေးအပ်သည့် စတုတ္ထ အကြိမ်မြောက် အထောက်အပံ့လုပ်ငန်းစာရင်းတွင် လျာထားပြီး ဖြစ်ပါကြောင်း ဖြေကြားသည်။
ချင်းပြည်နယ် မဲဆန္ဒနယ်အမှတ်(၄)မှ ဦးဇုန်လှယ်ထန်း၏ ကလေးလေဆိပ် အဆောက်အအုံနှင့် လေဆိပ်၏ ပရ၀ဏ်အား အဆင့်မြှင့်တင်ပေးရန် အစီအစဉ် ရှိ/မရှိ မေးခွန်းနှင့် စပ်လျဉ်း၍ ပို့ဆောင်ရေးနှင့် ဆက်သွယ်ရေး ၀န်ကြီးဌာန ဒုတိယ၀န်ကြီး ဦးကျော်မျိုး က လေကြောင်းပို့ဆောင်ရေးညွှန်ကြားမှုဦးစီးဌာန အနေဖြင့် နှစ်စဉ် ခွင့်ပြုရရှိသည့် ရန်ပုံငွေအပေါ်မူတည်၍ လေယာဉ်စီးခရီးသည် အ၀င်/အထွက်များသည့် အခြားပြည်တွင်း လေဆိပ်များ အဆင့်မြှင့်တင်ပြုပြင်ခြင်းလုပ်ငန်းများကို ဦးစားပေးဆောင်ရွက်နေရခြင်းကြောင့်လည်းကောင်း၊ ကလေးလေဆိပ်အတွက် အသုံးပြု ဆင်း/တက်နေသည့် လေယာဉ်နှင့်ခရီးသည်များ ဘေးကင်းလုံခြုံရေးကို ဦးစားပေး ဆောင်ရွက်လျက်ရှိခြင်းကြောင့် လည်းကောင်း၊ ၂၀၀၇ - ၂၀၀၈ ဘဏ္ဍာရေးနှစ်မှ ၂၀၁၇ - ၂၀၁၈ ဘဏ္ဍာရေးနှစ်အထိ (၁၁)နှစ် ကာလအတွင်း ကလေးလေဆိပ် ခရီးသည် အဆောက်အဦ ပြုပြင်ထိန်းသိမ်းခြင်း အတွက် သာမန်အသုံးစရိတ် စုစုပေါင်း ငွေကျပ် ၁၁ သန်းသာ သုံးစွဲနိုင်ခဲ့ပါကြောင်း။
လွှတ်တော်ကိုယ်စားလှယ်၏ တင်ပြချက်အရ လေဆိပ်အဆောက်အဦ၏ အထွက်ခရီးသည်များ စောင့်ဆိုင်း နားနေခန်းတွင် ဌာနရှိ ပြုပြင်ပြီး လေအေးပေးစက် ၁လုံးကို အမြန်ဆုံး တပ်ဆင်ပေးသွားမည် ဖြစ်သည့်အပြင် ကလေးလေဆိပ်သို့ တိုးချဲ့ပျံသန်းမည့် လေယာဉ်ခရီးစဉ်များနှင့် နှစ်စဉ်တိုးတက်လာမည့် ခရီးသည် ဦးရေကို မျှော်မှန်း၍ လက်ရှိလေဆိပ် အဆောက်အဦ (ပေ ၁၂၀ x ပေ ၆၀) ကို (ပေ ၁၂၀ x ပေ ၁၀၀) ရရှိသည်အထိ တိုးချဲ့ခြင်းနှင့် အဆောက်အဦ ပြုပြင်ခြင်း လုပ်ငန်းများအတွက် ၂၀၁၉ - ၂၀၂၀ ဘဏ္ဍာရေးနှစ်တွင် ငွေကျပ် သန်း ၄၀၀နှင့် ၂၀၂၀-၂၀၂၁ ဘဏ္ဍာရေးနှစ်တွင် ငွေကျပ်သန်း ၃၀၀ လျာထားမှုရှိပါကြောင်းနှင့် ရန်ပုံငွေ ရရှိမှုအပေါ် မူတည်၍ ဆောင်ရွက်ပေးသွားမည် ဖြစ်ပါကြောင်း ဖြေကြားသည်။
အလားတူ ကချင်ပြည်နယ် မဲဆန္ဒနယ်အမှတ်(၃)မှ ဦးဇယ်ခေါင်၊ ရှမ်းပြည်နယ် မဲဆန္ဒနယ်အမှတ်(၈)မှ ဒေါ်မမလေးနှင့် ဧရာဝတီတိုင်းဒေသကြီး မဲဆန္ဒနယ်အမှတ်(၄) မှ ဦးထိန်ဝင်းတို့၏ မေးခွန်းများနှင့် စပ်လျဉ်း၍ ဒုတိယ၀န်ကြီး ဗိုလ်ချုပ်သန်းထွဋ်နှင့် ဦးကျော်မျိုးတို့က ပြန်လည်ရှင်းလင်းဖြေကြားကြသည်။
ထို့နောက် မြန်မာနိုင်ငံ တိုင်းရင်းဆေးကောင်စီ ဥပဒေကြမ်းနှင့် စပ်လျဉ်း၍ လွှတ်တော်ကိုယ်စားလှယ်များက ဆွေးနွေးကြသည်။
မန္တလေးတိုင်းဒေသကြီး မဲဆန္ဒနယ်အမှတ်(၁)မှ ဒေါက်တာသန်းဝင်းက မြန်မာ့တိုင်းရင်းဆေးပညာ၏ အဆင့်အတန်း၊ စံသတ်မှတ်ထိန်းသိမ်းရန်နှင့် ပြည်သူများ စနစ်တကျ ယုံကြည်လက်ခံကျင့်သုံးစေရန်မှာ တိုင်းရင်းဆေးဆရာများ၏ ပညာအဆင့်အတန်း သတ်မှတ်ခြင်းအပေါ်တွင် များစွာမူတည်နေပါကြောင်း၊ ၁၉၆၂ ခုနှစ် ကတည်းက နိုင်ငံတ၀န်း တိုင်းရင်းဆေးဆရာများကို စနစ်တကျသင်ကြားလေ့ကျင့် မွေးထုတ်ပေးခဲ့ရာ ၇၅၀၀ ခန့် ရှိပြီဖြစ်ပါကြောင်း၊ ထို့ပြင် တိုင်းရင်းဆေးဆရာ မှတ်ပုံတင် စတင်ပြုလုပ်စဉ်အချိန်က ရိုးရာ တိုင်းရင်းဆေးဆရာများကိုလည်း စီစစ်ကာ မှတ်ပုံတင်ပေးခဲ့ပြီး ဖြစ်ပါကြောင်း။
ယခု ၂၁ရာစု ဒုတိယ ၁၀ စုနှစ် အရောက်တွင် တိုင်းရင်းဆေးတက္ကသိုလ်အဆင့်အထိ သင်ကြားရေးဌာနများက တိုင်းရင်းဆေးပညာရှင် ဆေးဆရာများ မွေးထုတ်ပေးနေသော်လည်း ဥပဒေကြမ်း ပုဒ်မ ၁၅ (စ)အရ ဘွဲ့၊ ဒီပလိုမာ မရှိဘဲ တိုင်းရင်းဆေးပညာဖြင့် အသက်မွေးလျက်ရှိသူများကို ကောင်စီက သတ်မှတ်သည့် အရည်အချင်းအရ တိုင်းရင်းဆေးဆရာ မှတ်ပုံတင်လက်မှတ်ထုတ်ပေးရန် ထည့်သွင်းထားခြင်းသည် မဖြစ် သင့်ပါကြောင်း၊ နိုင်ငံတကာပညာရှင်ဆိုင်ရာ ကောင်စီများက ကျင့်သုံးနေသည့် ပညာရှင်အဖြစ် သတ်မှတ် ထားသည့် စံ၊ စနစ်တို့ဖြင့် မကိုက်ညီပါကြောင်း၊ မြန်မာတိုင်းရင်းဆေးပညာရပ်နှင့် ပညာရှင်တို့၏ အဆင့် အတန်းကို နိမ့်ပါးလျော့ကျစေမည်ဖြစ်ပါကြောင်း၊ ထို့ကြောင့် မြန်မာတိုင်းရင်းဆေးကောင်စီ ဥပဒေကြမ်းအား ပုဒ်မ ၁၅(စ)နှင့် ၃၁ (ဂ)တို့ကို ပယ်ဖျက်ပေးပါရန် ဆွေးနွေးအပ်ပါကြောင်း ရှင်းလင်းပြောကြားသည်။
အဆိုပါ ဥပဒေကြမ်းနှင့် စပ်လျဉ်း၍ တနင်္သာရီတိုင်းဒေသကြီး မဲဆန္ဒနယ်အမှတ် (၁၀)မှ ဦးစိုးသိန်း (ခ) ဦးမောင်စိုး က ဆက်လက်ဆွေးနွေးသည်။
ယင်းနောက် အမျိုးသားလွှတ်တော် ဥပဒေကြမ်းကော်မတီဝင် ဒေါ်အုန်းကြည် က ပြည်သူ့လွှတ်တော်က ပြင်ဆင် ချက်ဖြင့် အတည်ပြုပြီး ပေးပို့လာသော မြန်မာနိုင်ငံ မိခင်နှင့်ကလေးစောင့်ရှောက်ရေးအသင်း ဥပဒေကြမ်းကို အမျိုးသားလွှတ်တော်က ဆွေးနွေးနိုင်ရန် ဥပဒေကြမ်း ကော်မတီ၏ အစီရင်ခံစာကို ဖတ်ကြားရှင်းလင်းရာတွင် ကော်မတီသည် ယင်းဥပဒေကြမ်းနှင့် စပ်လျဉ်း၍ သက်ဆိုင်ရာဝန်ကြီးဌာန၊ မြန်မာနိုင်ငံမိခင်နှင့် ကလေး စောင့်ရှောက်ရေးအသင်း၊ ပြည်ထောင်စုရှေ့နေချုပ်ရုံးတို့မှ တာဝန်ရှိပုဂ္ဂိုလ်များ၊ ပြည်ထောင်စုလွှတ်တော် ဥပဒေရေးရာနှင့် အထူးကိစ္စရပ်များ လေ့လာဆန်းစစ်သုံးသပ်ရေးကော်မရှင်မှ ပညာရှင်များနှင့်အသေးစိတ် ညှိနှိုင်းဆွေးနွေးခဲ့ပြီး ဖြစ်ပါသဖြင့် အမျိုးသားလွှတ်တော်က ဆက်လက်အတည်ပြု ဆောင်ရွက်နိုင်ပါရန် အစီရင်ခံတင်ပြအပ်ပါကြောင်း ရှင်းလင်းပြောကြားသည်။
ဆက်လက်၍ အမျိုးသားလွှတ်တော် ဥက္ကဋ္ဌ မန်းဝင်းခိုင်သန်း က အဆိုပါ ဥပဒေကြမ်းကို ဆွေးနွေးလိုသည့် လွှတ်တော်ကိုယ်စားလှယ်များရှိပါက အမည်စာရင်း တင်သွင်းနိုင်ကြောင်း ကြေညာသည်။
ဒုတိယအကြိမ် အမျိုးသားလွှတ်တော် န၀မပုံမှန်အစည်းအဝေး ဆဋ္ဌမနေ့ကို သြဂုတ် ၆ ရက်တွင် ဆက်လက် ကျင်းပသွားမည်ဖြစ်ကြောင်း သိရသည်။
အောင်ရဲသွင်
No comments:
Post a Comment