(၂၆)ကြိမ်မြောက် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲ အောင်မြင်စွာ ဝင်ရောက်ယှဉ်ပြိုင်နိုင်ရေး လုပ်ငန်းညှိနှိုင်းအစည်းအဝေး ကျင်းပပြုလုပ်

ပဲခူး ဩဂုတ် ၂၉

ပဲခူးတိုင်းဒေသကြီးအစိုးရအဖွဲ့ရုံး၊ တော်ဝင်ဟံသာအစည်းအဝေးခန်းမ၌ ဩဂုတ်လ(၂၈)ရက်နေ့၊ မွန်းလွဲပိုင်းက (၂၆)ကြိမ်မြောက်မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲအောင်မြင်စွာဝင်ရောက်ယှဉ်ပြိုင်နိုင်ရေးလုပ်ငန်းညှိနှိုင်းအစည်းအဝေး ကျင်းပပြုလုပ်သည်။

ရှေးဦးစွာ ပဲခူးတိုင်းဒေသကြီးအစိုးရအဖွဲ့၊ ဝန်ကြီးချုပ်ဦးမျိုးဆွေဝင်းက အဆို၊ အက၊ အရေး၊ အတီး ပြိုင်ပွဲသည် ဒေသမျိုးစုံမှရွက်ပုန်းသီးအနုပညာရှင်များ၊ အတတ်ပညာရှင်များကိုပြန်လည်ဖော်ထုတ်ခြင်း၊ ချီးမြှောက်ခြင်းအပြင် မြန်မာတို့၏ရိုးရာယဉ်ကျေးမှုအနုပညာစရိုက်လက္ခဏာများကို မျိုးဆက်သစ်လူငယ်များထံလက်ဆင့်ကမ်းပေးသည့် ပွဲတော်ကြီးတစ်ခုဖြစ်၍ဖွဲ့စည်းပေးထားသည့် ကော်မတီများအနေဖြင့် လုပ်ငန်းတာဝန်များအလိုက် အောင်မြင်အောင်ကြိုးစားသွားရမှာဖြစ်ကြောင်း၊ ယခုနှစ်သည် လူငယ်လူရွယ်အသက်အပိုင်းအခြားသာ ယှဉ်ပြိုင် ရမှာဖြစ်၍ လူရွေးချယ်သည့်အပိုင်းအားစနစ်တကျဖြစ်စေရန်နှင့် စခန်းသွင်းလေ့ကျင့်မှုအပိုင်းများကိုလည်း ကြို တင်ပြင်ဆင်ထားရမှာဖြစ်ကြောင်း၊ ယခင်နှစ်၏အားနည်းချက်များအပေါ်ပြန်လည်သုံးသပ်၍ အကောင်းဆုံးယှဉ် ပြိုင်နိုင်ရေးနှင့် နည်းပြများမှလည်း မိမိတို့၏တိုင်းဒေသကြီး၏ဂုဏ်ကိုမြှင့်တင်ပေးနိုင်မည့်မျိုးဆက်သစ်အနုပညာရှင်များအား စနစ်တကျ ရွေးချယ်၍ လေ့ကျင့်သင်ကြားပေးစေလိုကြောင်းနှင့်လိုအပ်သည်များကိုလည်း ဘက်ပေါင်းစုံမှ ဖြည့်ဆည်းဆောင်ရွက်ပေးသွားမှာဖြစ်ကြောင်း ပြောကြားခဲ့သည်။

ထို့နောက် ပဲခူးတိုင်းဒေသကြီးအစိုးရအဖွဲ့၊ တိုင်းရင်းသားရေးရာဝန်ကြီးဦးစောလင်းအောင်က တိုင်းဒေသကြီးအဆင့် (၂၆)ကြိမ်မြောက်မြန်မာ့ရိုးရာယဉ်ကျေးမှုအဆို၊ အက၊ အရေး၊ အတီးပြိုင်ပွဲ အောင်မြင်စွာကျင်းပနိုင်ရေးဆောင်ရွက်ထားရှိမှုနှင့် တိုင်းဒေသကြီးဥပဒေချုပ်ဦးခင်မောင်တင့်က ပြိုင်ပွဲဝင်မျိုးဆက်သစ်အနုပညာရှင်များ ရွေးချယ်သွားမည့်အစီအမံများအား ရှင်းလင်းတင်ပြခဲ့ ကြသည်။

ယင်းနောက်တက်ရောက်လာသည့်လုပ်ငန်းကော်မတီဥက္ကဋ္ဌ၊ တိုင်းဒေသကြီးဦးစီးမှူးများက တိုင်းဒေသကြီးအဆင့်(၂၆)ကြိမ်မြောက်မြန်မာ့ရိုးရာယဉ်ကျေးမှုအဆို၊ အက၊ အရေး၊ အတီးပြိုင်ပွဲ အောင်မြင်စွာကျင်းပနိုင်ရေး ကဏ္ဍအလိုက်ရှင်းလင်းတင်ပြခဲ့ရာ အဆို၊ အက၊ အရေး၊ အတီးပညာရှင်နည်းပြများက ဘာသာရပ်အလိုက်လူရွေးချယ်မှုနှင့် စခန်းသွင်းလေ့ကျင့်သွားမည့် အစီအစဉ်များအား အသီးသီးရှင်းလင်းတင်ပြခဲ့ကြရာ တိုင်းဒေသကြီးဝန်ကြီးချုပ်က လိုအပ်သည်များ ဖြည့်စွက်လမ်းညွှန်မှာကြားခဲ့ကြောင်းသတင်းရရှိသည်။

သက်ဖြိုးကြိုင်(ပြန်/ဆက်)