နယ်စပ်ဒေသနှင့် တိုင်းရင်းသားလူမျိုးများ ဖွံ့ဖြိုးတိုးတက်ရေး ဗဟိုကော်မတီဥက္ကဋ္ဌ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကျိုင်းတုံ၊ မိုင်းတုံ၊ မိုင်းဆတ်မြို့နယ်တို့မှ ဒေသခံပြည်သူလူထုနှင့် တွေ့ဆုံ ငြိမ်းချမ်းရေး၊ တရားဥပဒေစိုးမိုးရေးနှင့် ဒေသဖွံ့ဖြိုးရေး ကိစ္စရပ်များ ဆွေးနွေးမှာကြား

ကျိုင်းတုံ ဖေဖော်ဝါရီ  ၆

ရှမ်းပြည်နယ်(အရှေ့ပိုင်း) ကျိုင်းတုံမြို့၌ ရောက်ရှိနေသော နယ်စပ်ဒေသနှင့် တိုင်းရင်းသားလူမျိုးများ ဖွံ့ဖြိုးတိုးတက်ရေး ဗဟိုကော်မတီဥက္ကဋ္ဌ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် ယနေ့ နံနက်ပိုင်းတွင် ကျိုင်းတုံမြို့ မြို့တော်ခန်းမ၌ ကျင်းပသည့် ဒေသခံပြည်သူလူထုနှင့် တွေ့ဆုံပွဲသို့ တက်ရောက်သည်။

တွေ့ဆုံပွဲတွင် နိုင်ငံတော်၏အတိုင်ပင်ခံပုဂ္ဂိုလ်က တာဝန်ဆိုသည်မှာ လူ့ဘ၀တွင် အရေးအကြီးဆုံး ကိစ္စတစ်ခုဖြစ်သကဲ့သို့ နိုင်ငံတစ်နိုင်ငံအတွက်လည်း အရေးကြီးဆုံးကိစ္စ တစ်ခုဖြစ်ပါကြောင်း၊ အားလုံး တာဝန်ကျေကြမည် ဆိုပါက နိုင်ငံအတွက် ပူစရာမရှိတော့ပါကြောင်း၊ နိုင်ငံအတွက် တာဝန်ယူကြရာတွင် အစိုးရ၌ အဓိက တာဝန်ရှိသည်ဟု ထင်မြင်ကြပါကြောင်း၊ ဒီမိုကရေစီအစိုးရသည် ပြည်သူလူထုက ရွေးချယ်တင်မြှောက်လိုက်သည့် အစိုးရဖြစ်သည့်အတွက် ပြည်သူနှင့်အစိုးရကြားတွင် တန်းတူညီတူ သူ့နည်းသူ့ဟန်နှင့်သူ တာဝန်ရှိကြပါကြောင်း၊ ယင်းတာဝန်များကို မေတ္တာစေတနာဖြင့် တစ်ဦးနှင့်တစ်ဦး ယုံကြည်မှုဖြင့် တည်ဆောက်ပြီး ထမ်းဆောင်သွားကြမည်ဆိုပါက အားလုံး အောင်မြင်မည့် အခြေအနေကို ရောက်ရှိမည်ဟု ယုံကြည်ပါကြောင်း၊ အစိုးရအနေဖြင့် တစ်တိုင်းပြည်လုံး၏ လိုအပ်ချက်များကို စဉ်းစားရပါကြောင်း၊ ဒေသတစ်ခုတည်း၏ လိုအပ်ချက်ကို ကွက်ပြီးစဉ်းစား၍ မရပါကြောင်း၊ ထို့ကြောင့် မိမိတို့အနေဖြင့် မျှမျှတတ ဆောင်ရွက်နိုင်ရန် ကြိုးစားရပါကြောင်း၊ ထိုသို့ ကြိုစားရာတွင် စံနှုန်းများ သတ်မှတ်ထားပါကြောင်း၊ ဥပမာ- စာသင်ကျောင်း၊ ဆေးရုံတို့နှင့် ပတ်သက်၍ မည်သည့် အချက်အလက်များအပေါ် အခြေခံပြီး စာသင်ကျောင်းများကို အဆင့်မြှင့်မည်၊ ဆေးရုံများကို အဆင့်မြှင့်မည်ကို ပြည်ထောင်စုအစိုးရက သတ်မှတ်ထားပါကြောင်း၊ ယင်းသတ်မှတ်ချက်များကို တိုင်းဒေသကြီးနှင့် ပြည်နယ်အစိုးရများက ပြည်သူလူထု သိရှိအောင် တစိုက်မတ်မတ် အသိပေး ရှင်းပြနေရမည်ဖြစ်ပါကြောင်း။

နိုင်ငံတစ်နိုင်ငံ ဖွံ့ဖြိုးတိုးတက်ရေးအတွက် ပြည်သူလူထုနှင့် အစိုးရကြားတွင် အဆက်မပြတ် ဆက်သွယ်မှုရှိရန် လိုအပ်ပါကြောင်း၊ ထိုသို့ ဆက်သွယ်မှုများရှိမှသာ တစ်ဦးနှင့်တစ်ဦး အခက်အခဲများကို သိရှိမည်ဖြစ်ပါကြောင်း၊ အစိုးရက ပြည်သူလူထု၏ အခက်အခဲနှင့် လိုအပ်ချက်များကို သိသလို ပြည်သူလူထုကလည်း အစိုးရ၏ အခက်အခဲများကို သိရှိရန် လိုပါကြောင်း၊ သို့မှသာ ထိထိရောက်ရောက် လက်တွဲပြီး ပူးပေါင်း ဆောင်ရွက်နိုင်မည်ဖြစ်ပါကြောင်း၊ တစ်နိုင်ငံလုံး၏ ဓာတ်အားလိုချက်ကို ဖြည့်ဆည်းပေးနိုင်ရန် အဓိကထား ကြိုးစားဆောင်ရွက်လျက် ရှိပါကြောင်း၊ ပြီးခဲ့သည့်နှစ်တွင် ဓာတ်အားလိုအပ်ချက်ကို ပိုမိုတိုးတက်ပြီး ဖြည့်ဆည်းပေးနိုင်ခဲ့ ပါကြောင်း၊ ပြည်သူလူထု၏ ဓာတ်အားလို အပ်ချက်များကို မိမိတို့ နိုင်ငံတွင်ရှိသည့် သဘာဝ အရင်းအမြစ်များကို အသုံးပြု၍ အတတ်နိုင်ဆုံး ဖြည့်ဆည်းဆောင်ရွက်ပေးသွားမည် ဖြစ်ပါကြောင်း။

အစိုးရအနေဖြင့် လမ်းပန်းဆက်သွယ်ရေး၊ လျှပ်စစ်ဓာတ်အား ရရှိရေးနှင့် ပညာရေး၊ ကျန်းမာရေး မြှင့်တင်ရေး ကိစ္စရပ်များကို အဓိကထား လုပ်ဆောင်နေပါကြောင်း၊ မိမိတို့နိုင်ငံ တိုးတက်ရန်အတွက် ဖွံ့ဖြိုးတိုးတက်မှုနှင့် ငြိမ်းချမ်းရေးရှိရန် လိုအပ်ပါကြောင်း၊ ယင်းနှစ်ခုမှာ ဆက်စပ်နေပါကြောင်း၊  ငြိမ်းချမ်းရေး တည်တံ့ခိုင်မြဲရန်အတွက် ဖွံ့ဖြိုး တိုးတက်ရေး လိုအပ်ပါကြောင်း၊ ထို့အတူ ဖွံ့ဖြိုးရေး တည်တံ့ခိုင်မြဲရန်အတွက် ငြိမ်းချမ်းရေး လိုအပ်ပါကြောင်း၊ ငြိမ်းချမ်းရေးမရှိဘဲနှင့် ဖွံ့ဖြိုးတိုးတက်မှုကို ရေရှည်ထိန်းသိမ်းထားနိုင်မည် မဟုတ်ပါကြောင်း၊ ဖွံ့ဖြိုးတိုးတက်မှု မရှိဘဲနှင့်လည်း ငြိမ်းချမ်းရေးကို ရေရှည် ထိန်းသိမ်းထားနိုင်မည် မဟုတ်ပါကြောင်း။

မိမိတို့နိုင်ငံအတွင်းတွင်ရှိသည့် ပြဿနာများကို မိမိတို့ အချင်းချင်း ပြေလည်အောင် လုပ်ဆောင်ရေးသည် အရေးအကြီးဆုံးဖြစ်ပါကြောင်း၊ မိမိတို့နိုင်ငံတွင် ငြိမ်းချမ်းရေး ရရှိပြီး တည်ငြိမ်ရေး စိတ်ချရသည်ဆိုပါက လုံခြုံရေး ကိစ္စရပ်များကို တစ်ချိန်လုံး စဉ်းစားနေရတော့မည် မဟုတ်ပါကြောင်း၊ လုံခြုံရေးကိစ္စများအပေါ် အခြေခံပြီး လမ်းဖွင့်ရေး၊ ပိတ်ရေး ကိစ္စများကို ဆုံးဖြတ်နေရခြင်းမှာ မိမိတို့နိုင်ငံ၏ လိုအပ်ချက်ကြီး တစ်ခုကို ထောက်ပြနေခြင်းဖြစ်ပါကြောင်း၊ ထို့ကြောင့် ပြည်သူလူထု အားလုံးက ငြိမ်းချမ်းရေး ရရှိရန်အတွက် တတ်နိုင်သမျှ ၀ိုင်းဝန်းကူညီ ပေးကြရန်နှင့် ဖွံ့ဖြိုးတိုးတက်မှု ခိုင်မာရေးအတွက်လည်း တစ်ဦးချင်း တစ်ဦးချင်းက မိမိတို့၏ အစွမ်းအစ ရှိသရွေ့ ကူညီပေးကြရန် မေတ္တာရပ်ခံပါကြောင်း။

ပြည်နယ်အစိုးရနှင့် ပြည်သူလူထုကြားတွင် ရှိသင့်သည့် ဆက်သွယ်မှုမျိုး မရှိသည်ကို သတိထားမိပါကြောင်း၊ ပြည်သူလူထုနှင့် ပြည်နယ်အစိုးရ အကြားတွင် နီးနီးစပ်စပ် ဆက်သွယ်မှုမျိုး ရှိရန် လိုအပ်ပါကြောင်း၊ မိမိထံ တင်ပြသည့် ကိစ္စတော်တော် များများသည် ပြည်နယ်အစိုးရနှင့် ပြည်နယ်လူထု အကြားတွင် ဖြေရှင်းရမည့်ကိစ္စများ ဖြစ်သည်ကို တွေ့ရပါကြောင်း၊ ပြည်နယ်အစိုးရ အနေဖြင့် ပြည်နယ်လူထုနှင့် ထိတွေ့မှုကို မြှင့်တင်ရန်၊ မကြာခဏ ထိတွေ့ရန်နှင့် လိုအပ်သည့် ကိစ္စရပ်များကို ကိုယ်တိုင်ဖြေရှင်းပေးရန် တိုက်တွန်းပါကြောင်း ပြောကြားသည်။

ထို့နောက် ဒေသခံများက ပညာရေး၊ ကျန်းမာရေး၊ လမ်းပန်းဆက်သွယ်ရေး၊ လျှပ်စစ်မီးရရှိရေး၊ အခြေခံ အဆောက်အုံ လိုအပ်ချက်နှင့် ဒေသဖွံ့ဖြိုးရေး ကိစ္စရပ်များကို တင်ပြကြရာ နိုင်ငံတော်၏ အတိုင်ပင်ခံပုဂ္ဂိုလ်က ပြည်နယ်အစိုးရ၏ ဖြေကြားချက်များနှင့် နိုင်ငံတော်၏ မူဝါဒ၊ လုပ်ထုံးလုပ်နည်း များကို ပြန်လည်ရှင်းလင်း ဖြေကြားပေးပြီး တာဝန်ရှိသူများနှင့် ပေါင်းစပ်ညှိနှိုင်းပေးသည်။

တွေ့ဆုံပွဲအပြီးအတွင် နိုင်ငံတော်၏အတိုင်ပင်ခံပုဂ္ဂိုလ်သည် ဒေသခံတိုင်းရင်းသား အဖွဲ့များက ဂါရ၀ပြု ပေးအပ်သည့် ရိုးရာဓလေ့ အသုံးအဆောင်ပစ္စည်းများကို လက်ခံပြီး ဒေသခံတိုင်းရင်းသား လူငယ်များနှင့် စုပေါင်းမှတ်တမ်းတင် ဓာတ်ပုံ ရိုက်သည်။

မွန်းလွဲပိုင်းတွင် နိုင်ငံတော်၏အတိုင်ပင်ခံပုဂ္ဂိုလ်နှင့်အဖွဲ့သည် တပ်မတော်ရဟတ်ယာဉ်ဖြင့် မိုင်းတုံမြို့သို့ ရောက်ရှိကြရာ လွှတ်တော်ကိုယ်စားလှယ်များ၊  ဌာနဆိုင်ရာတာဝန် ရှိသူများနှင့် ဒေသခံတိုင်းရင်းသားများက ကြိုဆိုနှုတ်ဆက်ကြသည်။

ယင်းနောက် နိုင်ငံတော်၏အတိုင်ပင်ခံပုဂ္ဂိုလ်သည် မိုင်းတုံမြို့နယ် အထွေထွေအုပ်ချုပ်ရေး ဦးစီးဌာန အစည်းအဝေးခန်း၌ ကျင်းပသည့် ဒေသခံပြည်သူလူထုနှင့် တွေ့ဆုံပွဲသို့ တက်ရောက်သည်။

တွေ့ဆုံပွဲတွင် နိုင်ငံတော်၏အတိုင်ပင်ခံပုဂ္ဂိုလ်က မိမိတို့နိုင်ငံသည် ဒီမိုကရေစီ ဖက်ဒရယ် ပြည်ထောင်စုဖြစ်ရန် ဦးတည်နေသည့် နိုင်ငံဖြစ်ပါကြောင်း၊ ဒီမိုကရေစီ ဖက်ဒရယ်ပြည်ထောင်စုဖြစ်ရန် ဆိုလျှင် ပြည်နယ်များသည် အခွင့်အရေးများ ရှိသလို၊ တာဝန်များရှိပါကြောင်း၊ အခွင့်အရေးကို လိုချင်ပြီး တာဝန်ကို မထမ်းဆောင်နိုင်ဘူးဆိုလျှင် မိမိတို့နိုင်ငံ တိုးတက်မည် မဟုတ်ပါကြောင်း၊ ပြည်နယ်နှင့်မြို့နယ်များတွင် တာဝန်ယူရသည့် ပုဂ္ဂိုလ်များအနေဖြင့် ပြည်သူလူထု သိချင်သည်များနှင့် ဖြစ်စေချင်သည်များကို ပွင့်ပွင့်လင်းလင်း ဆွေးနွေးပြီး အဖြေရှာကြရမည်ဖြစ်ပါကြောင်း၊ ရေတိုတွင် ချွေးသိပ်သည့်အနေဖြင့် မလုပ်ပေးနိုင်သည့် ကိစ္စကို လုပ်ပေးမည်ဟု အုပ်ချုပ်ရေးက မည်သည့်အခါမှ မပြောကြရန် မှာကြားလိုပါကြောင်း၊ ပြည်သူလူထုအနေဖြင့်လည်း နားလည်မှုပေးနိုင်ရန် လိုပါကြောင်း၊ နှစ်ဦးနှစ်ဖက် နားလည်မှုရှိရန် လိုပါကြောင်း၊ နားလည်မှုသည် ယုံကြည်မှုအပေါ်တွင် အခြေခံသလို ယုံကြည်မှုသည်လည်း နားလည် မှုအပေါ်တွင် အခြေခံပါကြောင်း၊ တစ်ယောက်နှင့် တစ်ယောက် နားမလည်ဘဲနှင့် ယုံကြည်ရန် မလွယ်ပါကြောင်း၊ ထို့အတူ တစ်ယောက်နှင့် တစ်ယောက် မယုံကြည်ဘဲ နားလည်မှုယူရန်လည်း မလွယ်ပါကြောင်း၊ အုပ်ချုပ်ရေး တာဝန်များကို ယူထားသည့် အဖွဲ့အစည်းများ အနေဖြင့် ပြည်သူလူထုအကြားတွင် ပိုမိုနီးကပ်ပွင့်လင်းပြီး ဖြောင့်မတ် မှန်ကန်သည့် ဆက်ဆံမှုမျိုး ရှိရန် လိုအပ်ပါကြောင်း။

နိုင်ငံတစ်နိုင်ငံ တည်ငြိမ်ရန်၊ ပြည်သူလူထု၏ ရုပ်ပိုင်းဆိုင်ရာ၊ စိတ်ပိုင်းဆိုင်ရာ လုံခြုံရန်၊ စိတ်ချရရန် ဆိုလျှင် တရားဥပဒေစိုးမိုးရေးသည် အဓိကဖြစ်ပါကြောင်း၊ တရားဥပဒေ စိုးမိုးရေးသည် ဥပဒေ အပေါ်တွင် အခြေခံပါကြောင်း၊ မှန်ကန်သည့် ဥပဒေများ ဖြစ်ရမည်၊ ယင်းဥပဒေများကို ကျွမ်းကျင်သည့် နားလည်သည့် ပညာရှင်များ မိမိတို့နိုင်ငံတွင် လိုအပ်ပါကြောင်း၊ တစ်ကမ္ဘာလုံးတွင် ဥပဒေပညာရှင်များ၏ အဆင့်သည် ဖွံ့ဖြိုးတိုးတက်သည့် နိုင်ငံများတွင် အလွန်မြင့်မားပါကြောင်း၊ အသက်မွေးဝမ်းကျောင်း ပညာရေးသည် အင်မတန် အရေးကြီးပါကြောင်း၊ ထို့ကြောင့် အသက်မွေးဝမ်းကျောင်း ပညာသင်ကျောင်းများ ဖွံ့ဖြိုးတိုးတက်ပြန့်ပွားရေးအတွက် ကူညီ လုပ်ဆောင်သွားမည်ဖြစ်ပါကြောင်း ပြောကြားသည်။

ယင်းနောက် ဒေသခံများက လမ်း၊ တံတား၊ ပညာရေး၊ ကျန်းမာရေး၊ လျှပ်စစ် မီးရရှိရေးနှင့် အခြေခံအဆောက်အအုံ လိုအပ်ချက် ကိစ္စရပ်များကို တင်ပြကြရာ နိုင်ငံတော်၏အတိုင်ပင်ခံပုဂ္ဂိုလ်က ပြည်နယ်အစိုးရ၏ ဖြေကြားချက်များနှင့် အစိုးရ၏ မူဝါဒလုပ်ငန်းစဉ်များကို ရှင်းလင်းပြောကြားပြီး တာဝန်ရှိသူများနှင့် ပေါင်းစပ်ညှိနှိုင်းပေးသည်။

ထို့နောက် နိုင်ငံတော်၏အတိုင်ပင်ခံပုဂ္ဂိုလ်သည် ဒေသခံပြည်သူများအတွက် စားနပ်ရိက္ခာ ထောက်ပံ့ ပစ္စည်းများကို ပေးအပ်ရာ ဒေသခံပြည်သူများ ကိုယ်စား တိုင်းရင်းသား ကိုယ်စားလှယ်များက လက်ခံရယူကြသည်။

တွေ့ဆုံပွဲအပြီးအတွင် နိုင်ငံတော်၏အတိုင်ပင်ခံပုဂ္ဂိုလ်သည် ဒေသခံတိုင်းရင်းသား အဖွဲ့များက ဂါရ၀ပြုပေးအပ်သည့် ရိုးရာဓလေ့ အသုံးအဆောင်ပစ္စည်းများကို လက်ခံပြီး ဒေသခံတိုင်းရင်းသား လူငယ်များနှင့် စုပေါင်းမှတ်တမ်းတင် ဓာတ်ပုံ ရိုက်သည်။

ဆက်လက်၍ နိုင်ငံတော်၏အတိုင်ပင်ခံပုဂ္ဂိုလ်နှင့်အဖွဲ့သည် တပ်မတော် ရဟတ်ယာဉ်ဖြင့် ထွက်ခွာရာ မိုင်းဆတ်မြို့သို့ ရောက်ရှိကြသည်။

နိုင်ငံတော်၏အတိုင်ပင်ခံပုဂ္ဂိုလ်နှင့် အဖွဲ့အား လွှတ်တော်ကိုယ်စားလှယ်များ၊ ဌာနဆိုင်ရာ တာဝန် ရှိသူများနှင့် ဒေသခံတိုင်းရင်းသားများက ကြိုဆိုနှုတ်ဆက်ကြသည်။

ယင်းနောက် နိုင်ငံတော်၏အတိုင်ပင်ခံပုဂ္ဂိုလ်သည် မိုင်းဆတ်မြို့ မိုးလုံလေလုံ အားကစားခန်းမ၌ ကျင်းပသည့် ဒေသခံပြည်သူလူထုနှင့် တွေ့ဆုံပွဲသို့ တက်ရောက်သည်။

တွေ့ဆုံပွဲတွင် နိုင်ငံတော်၏အတိုင်ပင်ခံပုဂ္ဂိုလ်က ပြည်သူပြည်သားများ အားလုံး နိုင်ငံရေးကို စိတ်ဝင်စားစေချင်ပါကြောင်း၊ နိုင်ငံရေးဆိုသည်မှာ ပါတီထောင်ပြီး ရွေးကောက်ပွဲဝင်သည့် နိုင်ငံရေးမျိုးကို ပြောခြင်း မဟုတ်ပါကြောင်း၊ နိုင်ငံရေးဆိုသည်မှာ နိုင်ငံအတွက် အရေး၊ နိုင်ငံ့အတွက် လုပ်ဆောင်ခြင်းများ အားလုံးကို နိုင်ငံ့အရေးဟု ခေါ်ပါကြောင်း၊ နိုင်ငံရေးသည် လူတိုင်းလူတိုင်းနှင့် ပတ်သက်နေပါကြောင်း၊ နိုင်ငံသူနိုင်ငံသားများ အားလုံး ကမ္ဘာ့အလယ်တွင် တင့်တင့်တယ်တယ်ဖြင့် ရပ်တည်နိုင်ရန် ခေတ်နှင့်လျော်ညီသည့် ပညာများတတ်ရန် လိုအပ်ပါကြောင်း၊ မိမိပတ်ဝန်းကျင် တောင့်တင်းရေး၊ ခိုင်မာရေး၊ တိုးတက်ရေးသည် မိမိအတွက် မိမိလုပ်ရာလည်း ကျပါကြောင်း၊ အများအကျိုးဆောင် ကိုယ့်အကျိုးအောင်ဆိုသည့်အတိုင်း ဖြစ်ပါကြောင်း၊ ထို့ကြောင့် ကလေးသူငယ် များကို ငယ်ငယ်ကတည်းက ယခုလို စိတ်ဓာတ်မျိုး သွင်းပေးရမည်ဖြစ်ပါကြောင်း၊

တစ်ဦးနှင့်တစ်ဦး ယုံကြည်မှုရှိအောင်၊ နားလည်နိုင်အောင် လုပ်ဆောင်ကြရမည် ဖြစ်ပါကြောင်း၊ တစ်နိုင်ငံလုံး လှည့်လည်သွားလာသည့်အခါ ပြည်သူလူထုနှင့် တွေ့ဆုံသည့် ကိစ္စထက် အရေးကြီးသည့် ကိစ္စမရှိပါကြောင်း၊ အစိုးရ၏ တာဝန်ကို ထမ်းဆောင်နေသည့် အဖွဲ့အစည်းများနှင့် ပြည်သူလူထုကြားတွင် ယုံကြည်မှု၊ ချစ်ခင်မှု၊ နားလည်မှု ရှိရေးသည် နိုင်ငံတစ်နိုင်ငံ၏ အဓိက လိုအပ်ချက်ဖြစ်ပါကြောင်း၊ မိမိတို့၏ အဓိကကျသော ရည်ရွယ်ချက်မှာ မြန်မာနိုင်ငံကို စစ်မှန်သည့် ဖက်ဒရယ်ပြည်ထောင်စု နိုင်ငံတစ်ခုအဖြစ် ထူထောင်ရန်ဖြစ်ပါကြောင်း၊ ထိုသို့ ထူထောင်မှသာ မိမိတို့နိုင်ငံအတွက် ငြိမ်းချမ်းရေး၊ တည်ငြိမ်ရေး၊ ဖွံ့ဖြိုးတိုးတက်ရေး ရရှိမည်ဟု ယုံကြည်ပါကြောင်း၊ မိမိတို့၏ တိုင်းရင်းသား အားလုံးသည် အေးအေးချမ်းချမ်းဖြင့် နေထိုင်ချင်ကြသည်ဟု ယုံကြည်ပါကြောင်း၊ ရှမ်းပြည်နယ်အတွင်းရှိ မြို့လေးများထဲတွင် တိုင်းရင်းသားပေါင်းစုံ အားလုံး ပူးပေါင်းပြီး အေးအေးချမ်းချမ်း နေထိုင်နေသည်ကို တွေ့ရသည့်အခါ မိမိတို့နိုင်ငံတွင် ငြိမ်းချမ်းရေး မရစရာ အကြောင်းမရှိဘူးဟု စိတ်ထဲတွင် ဖြစ်မိပါကြောင်း၊ ဆန္ဒသာလိုအပ်ပါကြောင်း၊ ပါဝင် ပတ်သက်သည့်သူ အားလုံးက ငြိမ်းချမ်းရေး တကယ်လိုချင်သည်ဆိုပါက ငြိမ်းချမ်းရေး ရဖို့သည် သေချာပေါက်ဖြစ်ပါကြောင်း။

မိမိတို့နိုင်ငံတွင် လိုအပ်ချက်ပေါင်းများစွာ ရှိပါကြောင်း၊ ယင်းလိုအပ်ချက်များ၊ ပြဿနာများရှိ၍ မိမိတို့အနေဖြင့် အားငယ်စရာမလိုပါကြောင်း၊ တနည်းအားဖြင့် ပြောရလျှင် ပြဿနာများရှိနေခြင်းသည် မိမိတို့၏ အရည်အချင်းများ မြှင့်တင်ပေးရန် တွန်းအားပေးနေခြင်းသာ ဖြစ်ပါကြောင်း၊ မည်သည့် ပြဿနာမှ မဖြေရှင်းနိုင်ဘူးဆိုတာ မရှိပါကြောင်း၊ ဖြေရှင်းရန် ကြိုးစားသည့်နေရာတွင် ၀ီရိယ၊ ပညာ၊ သတ္တိ၊ စေတနာ ရှိရမည်ဖြစ်ပြီး စစ်မှန်သည့် စိတ်ထားများဖြင့် ပြဿနာများကို ရင်ဆိုင်နိုင်အောင် ကြိုးစား ရမည်ဖြစ်ပါကြောင်း၊ အားလုံးအတူ ရင်ဆိုင်သွားနိုင်ပါက အားလုံးအတူ ဖြေရှင်းနိုင်မည် ဟု ယုံကြည်ပါကြောင်း ပြောကြားသည်။

ယင်းနောက် ဒေသခံများက သောက်သုံးရေ၊ လျှပ်စစ်မီး၊ ပညာရေး၊ ကျန်းမာရေးနှင့် ဒေသ၏ အခြေခံအဆောက်အအုံ လိုအပ်ချက်များကို တင်ပြကြရာ နိုင်ငံတော်၏ အတိုင်ပင်ခံပုဂ္ဂိုလ်က ပြည်နယ်အစိုးရ၏ ဖြေကြားချက်များနှင့် အစိုးရ၏ မူဝါဒနှင့် လုပ်ငန်းစဉ်များကို ရှင်းလင်းပြောကြားပြီး တာဝန်ရှိသူများနှင့် ပေါင်းစပ်ညှိနှိုင်းပေးသည်။

ထို့နောက် နိုင်ငံတော်၏အတိုင်ပင်ခံပုဂ္ဂိုလ်က နိဂုံးချုပ်အမှာစကား ပြောကြားရာတွင် မိမိအားရသော ကိစ္စတစ်ခုမှာ တစ်နေရာနှင့် တစ်နေရာသို့ သွားရာတွင် မေးမြန်းပြောဆိုသည့် ပရိသတ်များ များများလာခြင်း ဖြစ်ပါကြောင်း၊ ၎င်းမှာ ရှေ့မှ မေးမြန်းသူများ ရှိ၍ ပြောရဲ၊ မေးရဲခြင်းလည်း ဖြစ်နိုင်ပါကြောင်း၊ ထို့ပြင် ပြောနိုင်၊ မေးနိုင်သည့် အခွင့်အရေးရှိသည်ကို သဘောပေါက်သွားခြင်းလည်း ဖြစ်နိုင်ပါကြောင်း၊ ယခုကဲ့သို့ ပြည်သူလူထုမှနေပြီး ပွင့်ပွင့်လင်းလင်း ပြောနိုင်၊ မေးနိုင်ခြင်းသည် မိမိတို့အချင်းချင်း နားလည်မှုကို တည်ဆောက်နိုင်၍ဖြစ်ပါကြောင်း၊ တစ်ခါတစ်လေတွင် ကိုယ်ကိုယ်တိုင် မမေးချင်ပါက ပိုပြီး ရဲရဲတင်းတင်းမေးရဲသည့် မိတ်ဆွေများကို မေးခိုင်း၍ ရပါကြောင်း၊ မိမိတို့အနေဖြင့် မေးခွန်းများကို နားထောင်ရသည်မှာများစွာ ပညာရပါကြောင်း၊ နောက်တစ်ခု အားရစရာ ကောင်းသည်မှာ မိမိတို့၏ အမြင်နှင့် ပြည်သူပြည်သားများ၏ အမြင်သည် မကွာခြားပါကြောင်း၊ အင်မတန်မှ နီးစပ်ပါကြောင်း၊ မိမိတို့ မြင်သကဲ့သို့ ပြည်သူပြည်သားများက မြင်ပါကြောင်း၊ မိမိတို့၏ စိုးရိမ်ပူပန်မှုများ အတိုင်းပင် ပြည်သူပြည်သားများက စိုးရိမ်ပူပန်မှုများ ရှိကြပါကြောင်း၊ အုပ်ချုပ်ရေးတာဝန်ကို ယူထားသည့်ပုဂ္ဂိုလ်များနှင့် ပြည်သူပြည်သားများအကြား နီးစပ်မှုရှိခြင်းသည် မိမိတို့၏ ပြဿနာကို ဖြေရှင်းသည့်နေရာတွင် ခက်ခဲမည်မဟုတ် ဆိုသည်ကို ညွှန်ပြနေခြင်း ဖြစ်ပါကြောင်း၊ အဘယ့်ကြောင့်ဆိုသော် မိမိတို့အနေဖြင့် စိတ်တူ၊ သဘောတူနှင့် ကိစ္စများကို ကိုင်တွယ်ရမည်၊ ရင်ဆိုင်ရမည်၊ ကျော်လွှားရမည်ဆိုသည့် အသိများသည် မိမိတို့တွင် ရှိပြီးဖြစ်ပါကြောင်း၊ မိမိတို့၏ ပြည်ထောင်စုစိတ်ဓာတ် ပိုမိုပြီး ခိုင်မာလာရန်၊ နိုင်ငံ၏ ညီညွတ်မှု ပိုပြီးတည်မြဲလာရန် လုပ်နိုင်မည့် အခွင့်အရေးများ ပေါ်လာသည်ဟု မြင်ပါကြောင်း၊ ထို့ကြောင့် ယနေ့ ဆွေးနွေးပွဲတွင် ပါဝင်ပြီး ပြောဆိုပေးကြသည့် မိမိတို့၏ တိုင်းသူပြည်သား များအားလုံးကို ကျေးဇူးတင်ပါကြောင်း၊ မိမိတို့၏ ပြည်ထောင်စုကြီးသည် များမကြာမီကာလ၌ ချမ်းချမ်းသာသာ တည်တည်ငြိမ်ငြိမ် ညီညီညွတ်ညွတ် ငြိမ်းငြိမ်းချမ်းချမ်း ဖြစ်နိုင်ပါစေဟု မိမိနေ့တိုင်း ဆုတောင်းပါကြောင်း၊ ဆုတောင်းကို အမြန်ဆုံးပြည့်နိုင်ပါစေဟု မိမိအနေဖြင့် ပြည်သူပြည်သားများ အတွက် ဆုတောင်းပေးလိုပါကြောင်း ပြောကြားသည်။

ယင်းနောက် နိုင်ငံတော်၏အတိုင်ပင်ခံပုဂ္ဂိုလ်သည် ဒေသခံပြည်သူများအတွက် စားနပ်ရိက္ခာ ထောက်ပံ့ပစ္စည်းများကို ပေးအပ်ရာ ဒေသခံပြည်သူများကိုယ်စား တိုင်းရင်းသားကိုယ်စားလှယ်များက လက်ခံရယူကြသည်။

တွေ့ဆုံပွဲအပြီးတွင် နိုင်ငံတော်၏အတိုင်ပင်ခံပုဂ္ဂိုလ်သည် ဒေသခံတိုင်းရင်းသား အဖွဲ့များက ဂါရ၀ပြု ပေးအပ်သည့် ရိုးရာဓလေ့ အသုံးအဆောင် ပစ္စည်းများကို လက်ခံပြီး ဒေသခံတိုင်းရင်းသား လူငယ်များနှင့် စုပေါင်းမှတ်တမ်းတင်ဓာတ်ပုံ ရိုက်သည်။

အဆိုပါ တွေ့ဆုံပွဲများသို့ ပြည်ထောင်စုဝန်ကြီးများ၊ ရှမ်းပြည်နယ်ဝန်ကြီးချုပ်၊ ပြည်နယ်အစိုးရ အဖွဲ့ဝန်ကြီးများ၊ လွှတ်တော်ကိုယ်စားလှယ်များ၊ ဌာနဆိုင်ရာ တာဝန်ရှိ သူများနှင့် ဒေသခံတိုင်းရင်းသား ပြည်သူများ တက်ရောက်ခဲ့ကြသည်။

ညနေပိုင်းတွင် နိုင်ငံတော်၏အတိုင်ပင်ခံပုဂ္ဂိုလ်နှင့် အဖွဲ့သည် မိုင်းဆတ်မြို့မှ အထူးလေယာဉ်ဖြင့် ဆက်လက်ထွက်ခွာကြပြီး ဟဲဟိုးလေဆိပ်သို့ ရောက်ရှိကြရာ ပြည်နယ်လွှတ်တော်ဥက္ကဋ္ဌ၊ ပြည်နယ်တရားလွှတ်တော် တရားသူကြီးချုပ်၊ ပြည်နယ်အစိုးရအဖွဲ့ဝင် ဝန်ကြီးများ၊ ပြည်နယ် ဥပဒေချုပ်၊ ပြည်နယ်စာရင်းစစ်ချုပ်၊ ဌာနဆိုင်ရာ တာဝန်ရှိသူများနှင့် တိုင်းရင်းသားရိုးရာ ယဉ်ကျေးမှု အဖွဲ့များက လေဆိပ်၌ ကြိုဆိုနှုတ်ဆက်ကြသည်။

ယင်းနောက် နိုင်ငံတော်၏အတိုင်ပင်ခံပုဂ္ဂိုလ်သည် မော်တော်ယာဉ်များဖြင့် ဆက်လက်ထွက်ခွာပြီး တောင်ကြီးမြို့သို့ ရောက်ရှိကြရာ ပြည်နယ်အစိုးရအဖွဲ့ဝင် ဝန်ကြီးများ၊ လွှတ်တော်ကိုယ်စားလှယ် များနှင့် ဒေသခံပြည်သူများက သောင်းသောင်းဖျဖျ ကြိုဆိုနှုတ်ဆက်ကြသည်။

(သတင်းစဉ်)

ဓာတ်ပုံ - သက်အောင်