ဒုတိယအကြိမ် ပြည်ထောင်စုလွှတ်တော် (၁၂)ကြိမ်မြောက် ပုံမှန်အစည်းအဝေး အောင်မြင်စွာ ကျင်းပပြီးစီး

နေပြည်တော်၊ ဇွန် ၇

ဒုတိယအကြိမ် ပြည်ထောင်စုလွှတ်တော် (၁၂)ကြိမ်မြောက် ပုံမှန်အစည်းအဝေး (၁၄)ရက်မြောက်နေ့ ကို ယနေ့နံနက် ၁၀နာရီတွင် နေပြည်တော်ရှိ ပြည်ထောင်စု လွှတ်တော် အစည်းအဝေးခန်းမ၌ ကျင်းပ သည်။

အစည်းအဝေးတွင် ပြည်ထောင်စုလွှတ်တော်နာယက ဦးတီခွန်မြတ်က ပြည်ထောင်စု လွှတ်တော်က အတည်ပြုသည်ဟု မှတ်ယူရမည့် မြန်မာနိုင်ငံ ရင်းနှီးမြှုပ်နှံမှု ဥပဒေကို ပြင်ဆင်သည့် ဥပဒေကြမ်းကို လွှတ်တော်က မှတ်တမ်းတင်ကြောင်း ကြေညာသည်။

ထို့နောက် နိုင်ငံတော်သမ္မတထံမှ သဘောထားမှတ်ချက်ဖြင့် ပြန်လည်ပေးပို့ထား သော တရားလွှတ်တော်ရှေ့နေများ ကောင်စီအက်ဥပဒေကို ပြင်ဆင်သည့် ဥပဒေကြမ်းနှင့် စပ်လျဉ်း၍ ပြည်ထောင်စု လွှတ်တော် ဥပဒေကြမ်းပူးပေါင်းကော်မတီ အတွင်းရေးမှူး ဒေါက်တာမြတ်ဉာဏစိုးက တစ်ပိုဒ်ချင်းစီ အလိုက် အဆိုပြုတင်ပြ၍ ပြည်ထောင်စု လွှတ်တော်နာယကက လွှတ်တော်၏ သဘောထား မေးမြန်း ရယူ အတည်ပြုသည်။

ဆက်လက်၍ ပြည်ထောင်စုလွှတ်တော် နာယကက ယင်းပြင်ဆင်သည့် ဥပဒေ ကြမ်းနှင့် စပ်လျဉ်း၍ နိုင်ငံတော်သမ္မတ၏ သဘောထားမှတ်ချက်များကို လွှတ်တော်က ဆုံးဖြတ်ထားသည့်အတိုင်း ပြင်ဆင်ပြီး ပြည်ထောင်စုလွှတ်တော်ဆိုင်ရာ နည်းဥပဒေ ၁၀၉ နှင့်အညီ နိုင်ငံတော်သမ္မတထံသို့ ပြန်လည်ပေးပို့သွားမည် ဖြစ်ကြောင်း အသိပေးကြေညာသည်။

ယင်းနောက် နိုင်ငံတော်သမ္မတထံမှ ပေးပို့ထားသော မန္တလေးတိုင်းဒေသကြီး၊ ပြည်ကြီးတံခွန်မြို့နယ် ရေပေးဝေရေးစီမံကိန်း ဆောင်ရွက်ရန် နယ်သာလန်နိုင်ငံ၊ FMOနှင့် ING Bank ထံမှ ယူရို ၂၉ ဒသမ ၉၆ သန်းချေးငွေရယူရေးနှင့် စပ်လျဉ်း၍ စီမံကိန်းနှင့် ဘဏ္ဍာရေးဝန်ကြီးဌာန ဒုတိယ၀န်ကြီး ဦးမောင်မောင်ဝင်းက ပြန်လည်ရှင်းလင်း ဆွေးနွေးရာတွင် ချေးငွေစနစ်တကျ ပြန်လည်ပေးနိုင်ရန် မန္တလေးမြို့တော် စည်ပင်သာယာရေးကော်မတီအနေဖြင့် စီမံကိန်း အကောင်အထည်ဖော် ဆောင်ရွက်ခြင်းမပြုမီနှင့် အကောင်အထည်ဖော်ပြီးသည့် အချိန်တို့တွင် အခွန်အရပ်ရပ်ကို စနစ်တကျကောက်ခံရန် စီမံကိန်း ချမှတ်ဆောင်ရွက် သင့်သည်ဟု လွှတ်တော်ကိုယ်စားလှယ် ဒေါက်တာလှမိုးက အကြံပြုထားပါကြောင်း၊ မန္တလေးမြို့တော်စည်ပင်သာယာရေး ကော်မတီအနေဖြင့် လွှတ်တော်ကိုယ်စားလှယ် ဆွေးနွေးအကြံ ပြုထားသည့်အတိုင်း စီမံကိန်းများ ချမှတ်ဆောင်ရွက် လျက် ရှိပါကြောင်း။

ထို့ပြင် ယခင်ဆောင်ရွက်ခဲ့သည့် မြစ်ရေတင်စီမံကိန်းကဲ့သို့ နည်းပညာနှင့် ဒီဇိုင်း လိုအပ်ချက်များ မရှိစေရန် Feasibility Study ကိုစနစ်တကျ ဆောင်ရွက်ခဲ့ပြီး နယ်သာလန်နိုင်ငံအခြေစိုက် Royal Haskoning DHV က Project Design ကို စီမံကိန်း ဆောင်ရွက်မည့် မြေမျက်နှာသွင်ပြင် အနေအထား၊ မိုးလေ၀သနှင့် ဇလဗေဒဆိုင်ရာ (၁၀)နှစ်စာအချက်အလက်များ၊ မြစ်ရေအတက်အကျ နှစ်စဉ် မှတ်တမ်းများ၊ ငလျင်ဆိုင်ရာ အချက်အလက်များ၊ ဒုဋ္ဌ၀တီမြစ်၏ ရေအရည်အသွေးနှင့် စီမံကိန်း ဧရိယာနှင့် အနီးပတ်ဝန်းကျင်နေ ပြည်သူတို့၏ သောက်သုံးရေလိုအပ်မှု ဆန်းစစ်ချက်တို့ကိုပါ ထည့်သွင်းတွက်ချက်၍ ရေးဆွဲထားပြီး စနစ်တကျ အကောင်အထည်ဖော် ဆောင်ရွက်သွားမည် ဖြစ်ပါကြောင်း။

မန္တလေးမြို့တော်စည်ပင်သာယာရေးကော်မတီအနေဖြင့် စီမံကိန်း၏ ဆောင်ရွက်ပြီးစီးမှု အခြေအနေ တို့ကို သက်ဆိုင်ရာလွှတ်တော်ရေးရာ ကော်မတီသို့ ပုံမှန်ရှင်းလင်း တင်ပြသွားမည် ဖြစ်ပါကြောင်း၊ ချေးငွေကို ယူသင့်/မသင့် စဉ်းစားသုံးသပ်ရာတွင် ဆောင်ရွက်မည့် စီမံကိန်း၏ လိုအပ်ချက်၊ ချေးငွေပေးမည့်နိုင်ငံ၏ လိုလားချက်၊ စီမံကိန်းတန်ဖိုး တွက်ချက်မှု၊ ဒီဇိုင်းနှင့် အရည်အသွေး ကောင်းမွန်မှု စသည့်အချက်များအပေါ် မူတည်၍ ဆုံးဖြတ်ရခြင်း ဖြစ်သဖြင့် အချို့စီမံကိန်းများတွင် အတိုးနှုန်းအသင့်အတင့် များနေသော်လည်း ရယူရခြင်းဖြစ်ပါကြောင်း၊ ယခုစီမံကိန်းကို သတ်မှတ် ကာလ (၂)နှစ်နှင့် (၆)လခန့်အတွင်း အချိန်မီပြီးစီးနိုင်ရေးအတွက် တည်ဆောက်ရေးဆိုင်ရာ လုပ်ငန်းများဖြစ်သည့် ရေယူအဆောက်အဦ၊ ရေသန့်စင်စက်ရုံ၊ ရေသိုလှောင်ကန်၊ ရေတွန်းစက်ရုံ၊ ရေဖြန့်ဝေပိုက်လိုင်း စသည့် တည်ဆောက်ရေးလုပ်ငန်းများကို တစ်ပြိုင်တည်း တည်ဆောက်သွားမည် ဖြစ်သဖြင့် အချိန်မီပြီးစီးနိုင်မည် ဖြစ်ပါကြောင်း။

ထို့ပြင် သန့်စင်သော ရေရရှိရန် ရေပိုက်လိုင်းသွယ်တန်းရာတွင် စနစ်တကျ ဆောင်ရွက်သွားရေး ကိစ္စကိုလည်း သတိပြုဆောင်ရွက်သွားမည် ဖြစ်ပါကြောင်း၊ ဒုဋ္ဌ၀တီ မြစ်တစ်လျှောက်ရှိ အပန်းဖြေ စခန်းများနှင့် ကျေးရွာများမှ ထွက်ရှိသည့် စွန့်ပစ်အမှိုက်နှင့် စွန့်ပစ်ရေဆိုးတို့အတွက်လည်း မန္တလေးတိုင်းဒေသကြီး စည်ပင်သာယာရေးအဖွဲ့နှင့် မန္တလေးမြို့တော် စည်ပင်သာယာရေး ကော်မတီ တို့ ပူးပေါင်းညှိနှိုင်း၍ လိုအပ်သော အစီအမံများ ချမှတ်ဆောင်ရွက်သွားမည် ဖြစ်ပါကြောင်း။

ယခု ပြည်ကြီးတံခွန်မြို့နယ် ရေပေးဝေရေးစီမံကိန်းသည် မြို့သစ်တည်ဆောက်ပြီး (၂၅)နှစ်ကျော် ကြာသည်အထိ ရေကောင်းရေသန့် သုံးစွဲခွင့်မရသော ပြည်သူများကို သန့်စင်သည့် သောက်သုံးရေ ဖြန့်ဝေမည့် ပြည်သူ့ဝန်ဆောင်မှု ဖြည့်ဆည်းပေးသည့် လုပ်ငန်းတစ်ခုအဖြစ် ဆောင်ရွက်မည် ဖြစ်ပါကြောင်း၊ ပြည်ထောင်စုလွှတ်တော်၏ အတည်ပြုချက် ရရှိသည့်အခါ စီမံကိန်းနှင့် ဘဏ္ဍာရေး ၀န်ကြီးဌာနနှင့် နယ်သာလန် နိုင်ငံ၊ FMO နှင့် ING Bank တို့နှင့် ညှိနှိုင်း၍ ချေးငွေစာချုပ် ချုပ်ဆိုနိုင်ရန် ဆက်လက် ဆောင်ရွက်ပြီး စီမံကိန်းနှင့် ဘဏ္ဍာရေးဝန်ကြီးဌာနနှင့် မန္တလေးမြို့တော်စည်ပင် သာယာ ရေးကော်မတီတို့အကြား လုပ်ထုံးလုပ်နည်းများနှင့်အညီ ထပ်ဆင့်ချေးငွေ စာချုပ်ကို ချုပ်ဆိုသွားမည် ဖြစ်ပါကြောင်း၊ သို့ဖြစ်ပါ၍ ချေးငွေယူရို ၂၉ ဒသမ ၉၆သန်း ရယူနိုင်ရေးကိစ္စအပေါ် ပြည်ထောင်စု လွှတ်တော်၏ အတည်ပြုချက် ရယူပေးပါရန် တင်ပြအပ်ပါကြောင်း ရှင်းလင်းပြောကြားသည်။

ထို့နောက် ပြည်ထောင်စုလွှတ်တော် နာယကက အဆိုပါ ချေးငွေရယူရေးကိစ္စနှင့် စပ်လျဉ်း၍ အတည်ပြုရန် စက်ခလုတ်အသုံးပြု၍ လွှတ်တော်၏ အဆုံးအဖြတ် ရယူရာ ထောက်ခံမဲ ၅၄၇ မဲ၊ ကန့်ကွက်မဲ ၅ မဲ၊ ကြားနေမဲ ၁မဲ ဖြစ်၍ ထောက်ခံမဲများသဖြင့် လွှတ်တော်က သဘောတူ အတည်ပြုကြောင်း ကြေညာသည်။

ဆက်လက်၍ နိုင်ငံတော်သမ္မတထံမှ ပေးပို့ထားသော ရပ်ဝန်းနှင့် ပိုးလမ်းမစီမံ ကိန်း၏ အခွန်စီမံခန့်ခွဲမှု ပူးပေါင်းဆောင်ရွက်ခြင်းစနစ် တည်ထောင်သည့် နားလည်မှု စာချွန်လွှာတွင် လေ့လာသူအဖွဲ့ဝင်အဖြစ် ပါဝင်လက်မှတ်ရေးထိုးရန် ကိစ္စနှင့် စပ်လျဉ်း၍ လွှတ်တော်ကိုယ်စားလှယ်များက ဆွေးနွေးကြသည်။

ပန်းတောင်း မဲဆန္ဒနယ်မှ ဒေါ်ခင်နှင်းသစ်က ပထဝီအနေအထားအရ အိမ်နီးချင်း နိုင်ငံဖြစ်လာခြင်းမှာ သီးခြားလုပ်ယူ၍ မရသကဲ့သို့ ရှိပြီးသား အနေအထားကိုလည်း ပြောင်းလဲ၍ မရပါကြောင်း၊ ထို့ကြောင့် တည်ရှိနေမှု၏ အခွင့်အလမ်းကောင်းကို အရယူနိုင်ရန် ဖြစ်ပါကြောင်း၊ မြန်မာနိုင်ငံ၏ နိုင်ငံခြား ရင်းနှီးမြှုပ်နှံမှု ၃၀ ရာခိုင်နှုန်း သည်အိမ်နီးချင်းတရုတ်နှင့်ပင် ဖြစ်ပါကြောင်း၊ ထို့ကြောင့် မြန်မာနိုင်ငံ သည် ဒီမိုကရေစီ အသွင်သစ်ဖြင့် ဖွံ့ဖြိုးတိုးတက်မှုကို ရှေးရှုနေသောနိုင်ငံ ဖြစ်သောကြောင့် မိမိနိုင်ငံ၏ မူဝါဒ၊ အမျိုးသားအကျိုးစီးပွားတို့နှင့် ကိုက်ညီမည်ဆိုပါက နိုင်ငံတကာနှင့် ပူးပေါင်း ဆောင်ရွက်ရမည် ဖြစ်ပါကြောင်း၊ ထို့ကြောင့် ရပ်ဝန်းနှင့် ပိုးလမ်းမစီမံကိန်း၏ အခွန်စီမံ ခန့်ခွဲမှု ပူးပေါင်းဆောင်ရွက်ခြင်း စနစ် (BRITACON) တည်ထောင်သည့် နားလည်မှု စာချွန်လွှာတွင် မြန်မာနိင်ငံမှ ပါဝင်သင့်ပါကြောင်း ဆွေးနွေးသည်။

မွန်ပြည်နယ် မဲဆန္ဒနယ်အမှတ်(၂)မှ ဒေါ်နွယ်နွယ်အောင်က ရပ်ဝန်းနှင့် ပိုးလမ်းမကို ဖော်ဆောင်သည့် နေရာတွင် မြန်မာနိုင်ငံကဲ့သို့ ဖွံ့ဖြိုးဆဲ နိုင်ငံအနေဖြင့် အလုပ်အကိုင်၊ ပညာရေး၊ စီးပွားရေး တိုးတက် ကောင်းမွန်စေနိုင်သကဲ့သို့ စိုက်ပျိုးရေးနှင့် စက်မှုလုပ်ငန်းများ တိုးပွားလာစေရန် ထောက်ပံ့ပေးခြင်း စသည့် အကျိုးကျေးဇူးများကို ဖြစ်ထွန်းစေနိုင်မည်ဖြစ်ပါကြောင်း၊ တစ်ဖက်ကလည်း မြို့ရွာများကို ဖြတ်၍ လမ်းဖောက်လုပ်ပါက သဘာဝပတ်ဝန်းကျင်ထိခိုက်မှုနှင့် လူမှုရေးထိခိုက်နစ်နာမှုများ ရှိနိုင် သည်ဟုလည်း ဝေဖန်ကြပါကြောင်း။

မြန်မာနိုင်ငံအနေဖြင့် ပထဝီအနေအထားအရ ငြင်းပယ်၍ မရသည့်အခြေအနေတွင် ထိုစီမံကိန်းမှ မိမိတို့နိုင်ငံအတွက် မည်သို့ အကျိုးရှိစေရန် အသုံးချမည်ကို ကြိုတင် ပြင်ဆင်မှုများ လုပ်ဆောင်ထားရန် လိုအပ်ပါကြောင်း၊ ပိုးလမ်းမစီမံကိန်းကို ပြည်သူအများ ပူးပေါင်းပါဝင်လာရန်အတွက် ပွင့်လင်း မြင်သာစွာချပြရန် လိုအပ် ပါကြောင်း၊ ဖွံ့ဖြိုးတိုးတက်မှု လိုအပ်ချက်များသည့် မြန်မာနိုင်ငံအတွက် နည်းပညာနှင့် ရင်းနှီးမြှုပ်နှံမှုများ ၀င်လာသည့်အခါ နိုင်ငံတကာစံနှုန်းနှင့် ကိုက်ညီ သည့် စည်းမျဉ်း မူဘောင်များ ရေးဆွဲထားရန် လိုအပ်ကြောင်းကို အကြံပြုလိုပါကြောင်း၊ နားလည်မှုစာချွန်လွှာတွင် အဖွဲ့ဝင်အဖြစ် ပါဝင်လက်မှတ်ရေးထိုးရန်အတွက် ထောက်ခံပါကြောင်း ဆွေးနွေးသည်။

ယင်းကိစ္စနှင့် စပ်လျဉ်း၍ တာမွေမဲဆန္ဒနယ်မှ ဦးတိုးဝင်း၊ ရှမ်းပြည်နယ် မဲဆန္ဒနယ်အမှတ်(၁၁)မှ ဦးကျော်နီနိုင်၊ ဖာပွန်မဲဆန္ဒနယ်မှ ဦးစောထွန်းမြအောင်၊ မကွေးတိုင်းဒေသကြီး မဲဆန္ဒနယ်အမှတ်(၆)မှ ဦးဝင်းမောင်၊ တွံ တေးမဲဆန္ဒနယ်မှ ဦးမြင့်လွင်၊ ဧရာဝတီတိုင်းဒေသကြီး မဲဆန္ဒနယ်အမှတ်(၃)မှ ဦးဆန်းမြင့်၊ ဧရာဝတီတိုင်းဒေသကြီး မဲဆန္ဒနယ်အမှတ်(၂)မှ ဦးစခင်ဇော်လင်း၊ ရန်ကုန်တိုင်း ဒေသကြီး မဲဆန္ဒနယ်အမှတ်(၄)မှ ဦးသန်းစိုး (ခေါ်) သန်းစိုး(ဘောဂဗေဒ)၊ အလုံမဲဆန္ဒနယ်မှ ဦးရဲလွင်၊ ဧရာဝတီ တိုင်းဒေသကြီးမဲဆန္ဒနယ်အမှတ်(၇)မှ ဒေါက်တာပြည့်ဖြိုးနှင့် ကချင်ပြည်နယ်မဲဆန္ဒနယ်အမှတ်(၁၁)မှ ဒေါက်တာခွန်ဝင်းသောင်းတို့က ဆက်လက်ဆွေးနွေးကြသည်။

ယင်းကိစ္စနှင့် စပ်လျဉ်း၍ စီမံကိန်းနှင့် ဘဏ္ဍာရေးဝန်ကြီးဌာန ဒုတိယ၀န်ကြီး ဦးမောင်မောင်ဝင်းက ပြန်လည်ရှင်းလင်းဆွေးနွေးသည်။

ထို့နောက် ပြည်ထောင်စုလွှတ်တော် နာယက က ယင်းကိစ္စနှင့် စပ်လျဉ်း၍ အတည်ပြုရန် လွှတ်တော် ၏ အဆုံးအဖြတ်ရယူရာ လွှတ်တော်က သဘောတူ အတည်ပြုကြောင်း ကြေညာသည်။

ယင်းနောက် နိုင်ငံတော်သမ္မတထံမှ ပေးပို့ထားသော လူမှုဝန်ထမ်း၊ ကယ်ဆယ်ရေးနှင့် ပြန်လည် နေရာချထားရေးဝန်ကြီးဌာနက ဆောင်ရွက်မည့် ကိုယ်ဝန်ဆောင်မိခင်များနှင့် အသက်၂နှစ်အောက် ကလေးသူငယ်များအား ငွေကြေးထောက်ပံ့ခြင်း အစီအစဉ်အတွက် ကမ္ဘာ့ဘဏ်၏ အပြည်ပြည် ဆိုင်ရာဖွံ့ဖြိုးရေးအဖွဲ့ (IDA) ထံမှ အမေရိကန် ဒေါ်လာသန်း ၁၀၀ ချေးငွေရယူရေးနှင့် စပ်လျဉ်း၍ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ဒုတိယ၀န်ကြီး ဦးစိုးအောင် နှင့် စီမံကိန်းနှင့် ဘဏ္ဍာရေးဝန်ကြီးဌာန ဒုတိယ၀န်ကြီး ဦးမောင်မောင်ဝင်းတို့က ရှင်းလင်းဆွေးနွေး ကြသည်။

ဒုတိယ၀န်ကြီး ဦးစိုးအောင်က ယခုအစီအစဉ် အကောင်အထည်ဖော်မှုကို ရပ်ရွာလူထုအား အသိပေး ခြင်း၊ တိုင်ကြားမှုများ လက်ခံဆောင်ရွက်ပေးခြင်းနှင့် စောင့်ကြည့်ကြီးကြပ်ခြင်း အဆင့်များတွင် သက်ဆိုင်ရာ အစီအစဉ် အကောင်အထည် ဖော်ရာ ဒေသများရှိ လွှတ်တော်ကိုယ်စားလှယ်များကို မြို့နယ်အဆင့် လူမှုကာကွယ်စောင့်ရှောက်ရေး ကော်မတီများ ဖွဲ့စည်းရာတွင် နာယကအဖြစ် ထည့်သွင်းဖွဲ့စည်းသွားရန် စီစဉ်လျာထားပြီး ဖြစ်ပါကြောင်း၊ မြို့နယ်အဆင့်တွင် လူမှုဝန်ထမ်း ဦးစီးဌာန၏ ရုံးခွဲများဖွင့်လှစ်ပြီး ၀န်ထမ်းများ ခန့်ထားရေး အတွက်ကို လည်း အစီအစဉ် အကောင် အထည်ဖော်မှု မစတင်မီ အပြီးဆောင်ရွက်နိုင်ရေး ကိုလည်း ပြင်ဆင်ဆောင်ရွက်လျက် ရှိပါကြောင်း၊ အစီအစဉ်ကို ပူးပေါင်းအကောင်အထည် ဖော်မည့် ၀န်ကြီးဌာနများနှင့် အဖွဲ့အစည်းများအကြား ပူး ပေါင်းဆောင်ရွက်နိုင်မှုကို အထူးအလေးထားဆောင်ရွက်သွားမည် ဖြစ်ပါကြောင်း။

ထို့ပြင် အစီအစဉ်ကို အကောင်အထည်ဖော်မည့် လူသားအရင်းအမြစ်များနှင့် ပတ်သက်၍ မြို့နယ် တစ်မြို့နယ်ချင်းတွင် ဌာန၀န်ထမ်းအဖြစ် ကနဦးအနည်းဆုံး သုံးဦးစီခန့်အပ် လေ့ကျင့်တာဝန် ပေးအပ်သွားမည် ဖြစ်ပါကြောင်း၊ အကျိုးခံစားခွင့် ငွေကြေးမှန်မှန်ကန်ကန် ရရှိရေးနှင့် အကျိုးခံစားခွင့် ရှိသူများ အနေဖြင့်ငွေကြေးထောက်ပံ့မှုကို အကျိုးရှိစွာ သုံးစွဲနိုင်ရေးအတွက် ပညာပေးအစီအစဉ်ကို ထုတ်ပြန်ထားသည့် လုပ်ငန်းလက်စွဲစာအုပ်အတိုင်း စနစ်တကျဆောင်ရွက်သွားမည် ဖြစ်ပါကြောင်း။

လက်ရှိဆောင်ရွက်ပေးနေသော တိုင်းဒေသကြီး/ ပြည်နယ်များနောက်တွင် ဆက်လက်ဆောင်ရွက် ပေးရန် လျာထားမှုအနေဖြင့် ၂၀၂၀ - ၂၀၂၁ ဘဏ္ဍာရေးနှစ်တွင် ကချင်ပြည်နယ်၊ မွန်ပြည်နယ်နှင့် စစ်ကိုင်းတိုင်းဒေသကြီး တို့တွင်လည်းကောင်း၊ ၂၀၂၁ - ၂၀၂၂ဘဏ္ဍာရေးနှစ်တွင် မန္တလေး တိုင်းဒေသ ကြီးနှင့် မကွေးတိုင်းဒေသကြီးတို့တွင် လည်းကောင်း၊ ၂၀၂၂ - ၂၀၂၃ဘဏ္ဍာရေးနှစ်တွင် တနင်္သာရီ တိုင်းဒေသကြီးတို့တွင် လည်းကောင်း တိုးချဲ့အကောင်အထည်ဖော် ဆောင်ရွက်သွားရန် ကာလလတ် အစီအစဉ်ဖြင့် (၅)နှစ်စီမံကိန်း ရေးဆွဲလျာထားပြီး ဖြစ်ပါကြောင်း၊ ကျန်ပြည်နယ်နှင့် တိုင်းဒေသကြီးများ ကိုလည်း (၅)နှစ်တာကာလ နောက်ပိုင်းဘဏ္ဍာရေးနှစ်များတွင် ကျန်းမာရေးနှင့်အားကစား ၀န်ကြီးဌာန က သုတေသနပြုထားသော လူဦးရေနှင့် ကျန်းမာရေးဆိုင်ရာစစ်တမ်း ၂၀၁၅ - ၂၀၁၆ ပါ ပုညှက်မှု နှုန်းများအရ တိုးချဲ့ဆောင်ရွက်သွားမည် ဖြစ်ပါကြောင်း။

စာရင်းဇယားများ တိကျမှန်ကန်စေရေးအတွက်လည်း ရပ်ကွက်နှင့်ကျေးရွာအဆင့် လူမှုကာကွယ် စောင့်ရှောက်ရေးကော်မတီများ ခိုင်ခိုင်မာမာပေါ်ထွန်းရေးကိုလည်း အဓိကအလေးထား ဆောင်ရွက် သွားမည်ဖြစ်ပါကြောင်း၊ ကျန်းမာရေးဝန်ထမ်းများကို လေ့ကျင့်သင်တန်းပေးခြင်းနှင့် ပတ်သက်၍ ကျန်းမာရေးနှင့် အားကစားဝန်ကြီးဌာနနှင့် ညှိနှိုင်းဆောင်ရွက်သွားမည် ဖြစ်ပါကြောင်း၊ အကျိုးခံစားခွင့် ငွေကြေးအနေဖြင့် မိခင်အတွက် ငွေကျပ် ၁၅၀၀၀ နှင့် ကလေးအတွက် ငွေကျပ် ၁၅၀၀၀ တစ်ပြိုင်နက် တည်းခံစားရမည်မဟုတ်ဘဲ ကိုယ်ဝန်ဆောင်စဉ်တွင် မိခင်ကိုပေးခြင်းဖြစ်ပြီး မွေးဖွားပြီး သောအခါတွင် ကလေးအတွက်ပေးခြင်းဖြစ်သည့်အတွက် တစ်လလျှင် ၄င်းတို့နှစ်ဦးအတွက် ငွေကျပ် ၁၅၀၀၀ သာရရှိမည်ဖြစ်ပါကြောင်း၊ ရရှိလာမည့် အကျိုးခံစားခွင့် ငွေကြေးကို အာဟာရနှင့် ကျန်းမာရေးဆိုင်ရာ ကိစ္စရပ်များတွင် အကျိုးရှိစွာ သုံးစွဲနိုင်ရေး အသိပညာပေးလုပ်ငန်းများကို ထိရောက်စွာ ဆောင်ရွက် သွားမည်ဖြစ်ပါကြောင်း။

ယခု ငွေကြေးထောက်ပံ့သည့် စီမံကိန်းအား လူဦးရေနှင့် ကျန်းမာရေးဆိုင်ရာစစ်တမ်း ၂၀၁၅ - ၂၀၁၆ အရ ပုညှက်မှုနှုန်း မြင့်မားလျက်ရှိသည့် ဧရာဝတီတိုင်းဒေသကြီးနှင့် ရှမ်းပြည်နယ်တို့တွင် အကောင် အထည်ဖော်ဆောင်ရွက်မည် ဖြစ်ပြီးနိုင်ငံတော်၏ အနာဂတ်ဖြစ်သည့် ကလေးသူငယ်များ၏ ဘ၀အစ ရက်(၁၀၀၀)အတွင်း အာဟာရ နှင့် ကျန်းမာရေးဆိုင်ရာ လိုအပ်ချက်များကို ပြည့်မီမှုရှိစေရန် ဆောင်ရွက် သည့် အစီအစဉ်ဖြစ်သည့်အတွက် ချေးငွေရယူရေးကိစ္စအပေါ် ပြည်ထောင်စု လွှတ်တော် က အတည်ပြု ပေးနိုင်ပါရန် တင်ပြအပ်ပါကြောင်း ရှင်းလင်းဆွေးနွေးသည်။

ဒုတိယ၀န်ကြီး ဦးမောင်မောင်ဝင်းက ကိုယ်ဝန်ဆောင်မိခင်များနှင့် ၄င်းတို့မှ မွေးဖွားလာသည့် အသက် (၂)နှစ်အောက် ကလေးသူငယ်များအား ငွေကြေးထောက်ပံ့ပေးခြင်း အစီအစဉ် ဆောင်ရွက်ရန် အတွက် ကမ္ဘာ့ဘဏ်၊ အပြည်ပြည် ဆိုင်ရာ ဖွံ့ဖြိုးရေးအဖွဲ့၏ (၁၈)ကြိမ်မြောက် ရန်ပုံငွေဖြည့်တင်းမှု အစီအစဉ် (IDA-18) အောက်မှချေးငွေ အမေရိကန်ဒေါ်လာသန်း ၁၀၀ ရယူနိုင်ရေး ကိစ္စ အပေါ် ပြည်ထောင်စုလွှတ်တော်၏ အတည်ပြုချက် ရယူပေးပါရန် တင်ပြအပ်ပါကြောင်း ရှင်းလင်းပြောကြား သည်။

ဆက်လက်၍ ပြည်ထောင်စုလွှတ်တော်နာယကက အဆိုပါ ချေးငွေရယူရေးကိစ္စနှင့် စပ်လျဉ်း၍ အတည်ပြုရန် စက်ခလုတ်အသုံးပြု၍ လွှတ်တော်၏ အဆုံးအဖြတ် ရယူရာ ထောက်ခံမဲ ၃၀၂ မဲ၊ ကန့်ကွက်မဲ ၁၆၇မဲ၊ ကြားနေမဲ ၁မဲ ဖြစ်၍ ထောက်ခံမဲများသဖြင့် လွှတ်တော်က သဘောတူ အတည်ပြုကြောင်း ကြေညာသည်။

ထို့နောက် လွှတ်တော်နှစ်ရပ်သဘောကွဲလွဲသော ကလေးသူငယ်အခွင့်အရေး များဆိုင်ရာ ဥပဒေကြမ်း နှင့် စပ်လျဉ်း၍ ပြည်ထောင်စုလွှတ်တော် ဥပဒေကြမ်း ပူးပေါင်းကော်မတီ အတွင်းရေးမှူး ဒေါက်တာ မြတ်ဉာဏစိုးက တစ်ပိုဒ်ချင်းစီအလိုက် အဆိုပြု တင်ပြ၍ လွှတ်တော်ကိုယ်စားလှယ်များက ဆွေးနွေး ကြပြီး လွှတ်တော်၏ အဆုံးအဖြတ် ရယူအတည်ပြုသည်။

ဆက်လက်၍ ပြည်ထောင်စုလွှတ်တော် နာယကက အထက်ပါ ဥပဒေကြမ်း နှင့်စပ်လျဉ်း၍ ပြည်သူ့ လွှတ်တော်နှင့် အမျိုးသားလွှတ်တော်တို့က အတည်ပြုခဲ့သည့် အပိုဒ်၊ အပိုဒ်ခွဲများကို လွှတ်တော် နှစ်ရပ် အတည်ပြုချက်အတိုင်း လည်းကောင်း၊ လွှတ်တော်နှစ်ရပ်သဘောကွဲလွဲသည့် အပိုဒ်၊ အပိုဒ်ခွဲများကို ပြည်ထောင်စုလွှတ်တော် ၏ အတည်ပြုချက်များ အတိုင်းလည်းကောင်း ပြန်လည် ပြင်ဆင်၍ ပြည်ထောင်စု လွှတ်တော် ဆိုင်ရာ ဥပဒေ၊ နည်းဥပဒေများနှင့်အညီ ဆက်လက်ဆောင်ရွက် သွားမည် ဖြစ်ကြောင်း ကြေညာသည်။

ယင်းနောက် ပြည်ထောင်စုလွှတ်တော် နာယကက ဒုတိယအကြိမ် ပြည်ထောင်စု လွှတ်တော် (၁၂)ကြိမ်မြောက် ပုံမှန်အစည်းအဝေးကာလ နိဂုံးချုပ်အမှာစကား ပြောကြားရာတွင် ၂၀၁၉ ခုနှစ် ဧပြီ ၂၉ ရက်မှ ယနေ့အထိ အစည်းအဝေးကာလ ရက်ပေါင်း ၄၀ အတွင်း ပြည်ထောင်စုလွှတ်တော် အစည်းအဝေးကို ၁၄ ရက် ကျင်းပခဲ့ ပါကြောင်း။

ထိုအစည်းအဝေး ကာလအတွင်း ၂၀၁၈-၂၀၁၉ ဘဏ္ဍာရေးနှစ်အတွက် ပြည်ထောင်စု ၏ နောက်ထပ် ဘဏ္ဍာငွေခွဲဝေ သုံးစွဲရေးဥပဒေအပါအ၀င် အတည်ပြုထုတ်ပြန်ပြီး ဥပဒေ ၇ခုနှင့် ဆောင်ရွက်ဆဲ ဥပဒေကြမ်း ၃ ခုကို ဆွေးနွေးအတည် ပြုပေးနိုင်ခဲ့ ပါကြောင်း၊ ထို့ပြင် အပြည်ပြည်ဆိုင်ရာ သဘောတူညီချက်များနှင့် သက်ဆိုင်သည့် ကိစ္စရပ် ၇ ခုနှင့် ပြည်ပချေးငွေဆိုင်ရာကိစ္စ ၆ ခု ဆွေးနွေး အတည်ပြုခြင်း၊ အဂတိလိုက်စားမှု တိုက်ဖျက်ရေးကော်မရှင်၏ နှစ်ပတ်လည်လုပ်ငန်း ဆောင်ရွက်မှု အပါအ၀င် အစီရင်ခံစာ ၃ စောင်နှင့် အရေးပေါ်ရန်ပုံငွေ ခွဲဝေသုံး စွဲခြင်းကိစ္စရပ် တစ်ခုတို့ကို ဆွေးနွေး မှတ်တမ်းတင်ခြင်း၊ ဖွဲ့စည်းပုံအခြေခံဥပဒေ ပြင်ဆင်ရေးလုပ်ငန်းစဉ်များကို ဆက်လက်ဆောင်ရွက်ခြင်း တို့ ပြုလုပ်နိုင်ခဲ့ပါကြောင်း။

၂၀၁၈-၂၀၁၉ ဘဏ္ဍာရေးနှစ်အတွက် ပြည်ထောင်စုလွှတ်တော်ဆိုင်ရာ ဖွံ့ဖြိုးရေး ရန်ပုံငွေနှင့် မဲဆန္ဒနယ်မြေအလိုက် ဒေသဖွံ့ဖြိုးရေးလုပ်ငန်းများ ဆောင်ရွက်ကြရာတွင် မြို့နယ်ပေါင်း ၃၂၅ မြို့နယ်အနက် ၈ မြို့နယ်တွင် လုပ်ငန်းများအားလုံးပြီးစီး၍ အစီရင်ခံစာ တင်ပြခဲ့ပြီးဖြစ်ပါကြောင်း၊ ကျန်ရှိသည့် မြို့နယ်များအနေဖြင့်လည်း စနစ်တကျ အချိန်မီပြီးစီးအောင် ဆောင်ရွက်ကြရန်နှင့် လွှတ်တော်အစည်းအဝေးများ ရပ်နားထားစဉ်ကာလတွင် မဲဆန္ဒနယ်မြေအလိုက်ဆောင်ရွက်ရန်ရှိသည့် လွှတ်တော် ဆိုင်ရာ လုပ်ငန်းများအတွက် သက်ဆိုင်ရာများနှင့် ပူးပေါင်းညှိနှိုင်းပြီး ဆောင်ရွက်ခဲ့ကြ ရန် မှာကြားလိုပါကြောင်း။

လာမည့်(၁၃)ကြိမ်မြောက် ပုံမှန်အစည်းအဝေးတွင် ဆောင်ရွက်ဆဲ ဖွဲ့စည်းပုံ အခြေခံ ဥပဒေ ပြင်ဆင် ရေးလုပ်ငန်းစဉ်များ အပါအ၀င် နိုင်ငံတော်အတွက် မဖြစ်မနေ ဆွေးနွေး အတည်ပြုပေးရမည့် ၂၀၁၉-၂၀၂၀ ဘဏ္ဍာရေးနှစ်အတွက် နိုင်ငံတော်၏ အမျိုးသားစီမံကိန်း ဥပဒေကြမ်း၊ ဘဏ္ဍာငွေ အရအသုံး ဆိုင်ရာ ဥပဒေကြမ်း၊ အခွန်အကောက်ဆိုင်ရာ ဥပဒေကြမ်းများနှင့် အခြားလွှတ်တော်ဆိုင်ရာ လုပ်ငန်း များကို ဦးစားပေးအစီအစဉ်အလိုက် ဆက်လက်ဆောင်ရွက် သွားကြရန် ရှိပါကြောင်း ပြောကြား သည်။

ထို့နောက် ပြည်ထောင်စုလွှတ်တော် နာယကက ဒုတိယအကြိမ် ပြည်ထောင်စု လွှတ်တော် (၁၂) ကြိမ်မြောက် ပုံမှန်အစည်းအဝေး (၁၄)ရက်မြောက်နေ့ ကျင်းပ ပြီးစီးကြောင်းနှင့် ဒုတိယအကြိမ် ပြည်ထောင်စုလွှတ်တော် (၁၂)ကြိမ်မြောက် ပုံမှန် အစည်းအဝေး အောင်မြင်စွာ ပြီးစီးကြောင်း ကြေညာ သည်။

အောင်ရဲသွင်၊ အေးအေးသန့်(သတင်းစဉ်)