“သိပ္ပံ၊ နည်းပညာနှင့် ဆန်းသစ် တီထွင်မှု ဥပဒေကြမ်း” အား လွှတ်တော် ကိုယ်စားလှယ်များ ဆွေးနွေး

နေပြည်တော်  သြဂုတ် ၂၄

ဥပဒေကြမ်း တစ်ခုလုံးကို အသေးစိတ် လေ့လာသည့် အခါ အခြေခံကျပြီး အရေးကြီးသည့်  အခြေခံနည်းပညာ နားလည် တတ်ကျွမ်းသည့် သုတေသန ၀န်ထမ်းများနှင့် သုတေသန ပညာရှင်များ ရွေးချယ် ခန့်ထား တာဝန် ပေးမှုများ မပါရှိသည့် အပြင် ဆန်းသစ် တီထွင်မှုများ ဆောင်ရွက်ရန်သာ ဦးတည် ရေးဆွဲ ထားသည်ကို တွေ့ရှိရသော ကြောင့် အခြေခံ အုတ်မြစ် မခိုင်မာဘဲ လေထဲ တိုက်အိမ် ဆောက်သည့် ဥပဒေဖြစ်နေ သည်ကို တွေ့ရပါကြောင်း ရန်ကုန် တိုင်းဒေသကြီး မဲဆန္ဒနယ် အမှတ်(၁၂)မှ ဦးကျော်နိုင် က ပြောကြားသည်။

ဦးကျော်နိုင်က သိပ္ပံနှင့် နည်းပညာ ဆန်းသစ် တီထွင်မှု လုပ်ငန်းများ အောင်မြင်စွာ အကောင် အထည်ဖော် ဆောင်နိုင်ရန် အတွက် တက္ကသိုလ်၊ ကောလိပ် အဆင့်မြင့် ပညာရေး၏ သင်ရိုး ညွှန်းတမ်းနှင့် ဆရာ ဆရာမများ၏ အရည် အသွေးကို မြှင့်တင်ပေး ခြင်း၊ အရည်အသွေး နိမ့်ကျခြင်း အကြောင်းရင်းကို ဖော်ထုတ်လက်ခံပြီး နိုင်ငံတကာ အဆင့်မီစေရန် စီစဉ် ဆောင်ရွက်ခြင်း၊ အရည် အသွေးမြင့် တက္ကသိုလ်၊ ကောလိပ်များမှ အတော်ဆုံး ကျောင်းသားများကို ဆက်သွယ် ခေါ်ယူ၍ သက်ဆိုင်ရာ နယ်ပယ်အလိုက် သုတေသန၀န်ထမ်းများကို ပညာရှင်များ ဖြစ်စေရန် ပြုစု ပျိုးထောင်ခြင်း တို့ကို ထပ်မံ ဖြည့်စွက်ရန် လိုအပ်ပါကြောင်း ပြောကြားသည်။

ယနေ့ ကျင်းပသည့် ဒုတိယအကြိမ် အမျိုးသား လွှတ်တော် ဒုတိယ ပုံမှန် အစည်းအဝေး ၁၉ ရက်မြောက်နေ့တွင် လွှတ်တော်က လက်ခံ ဆွေးနွေးရန် တင်သွင်း ထားသည့် “သိပ္ပံ၊ နည်းပညာနှင့် ဆန်းသစ်တီထွင်မှု ဥပဒေကြမ်း”နှင့် စပ်လျဉ်း၍  ဦးကျော်နိုင်က ဆွေးနွေးရာတွင် ထိုသို့ ပြောကြားခဲ့ခြင်း ဖြစ်သည်။

ယင်းဥပဒေကြမ်းနှင့် စပ်လျဉ်း၍ မွန်ပြည်နယ် မဲဆန္ဒနယ် အမှတ် (၈)မှ ဦးမျိုးဝင်းက ဤဥပဒေသည် နိုင်ငံသား တစ်ဦးချင်း၊ တစ်စု တစ်ဖွဲ့ချင်း၏ တီထွင် ဖန်တီးမှုကို ထောက်ပံ့ အားပေးပြီး နိုင်ငံ၏ နည်းပညာ တိုးတက် ဖွံ့ဖြိုးရေးကို ဦးတည်ခြင်းထက် ဥပဒေအရ ဖွဲ့စည်းထားသည့် ကော်မတီ အဆင့်ဆင့်၏ လုပ်ပိုင်ခွင့်၊ တာဝန်နှင့် လုပ်ထုံးလုပ်နည်း များကိုပြဋ္ဌာန်းပြီး ခေတ်အဆက်ဆက် ပြဋ္ဌာန်းနေကျ ဥပဒေများ အတိုင်း တီထွင်သူ များကို လွှမ်းမိုးနိုင်ရေး  ရည်ရွယ် ရေးဆွဲထားသည်ဟု ခံစားရပါကြောင်း။

ဥပဒေတွင် သိပ္ပံနှင့် နည်းပညာ ဆိုင်ရာ ဆန်းသစ် တီထွင်မှုများမှ တစ်ဆင့် နိုင်ငံတော်နှင့် လူ့စွမ်းအား အရင်းအမြစ်များ တိုးတက် ဖွံ့ဖြိုးရန်၊ ထူးချွန်သူများကို ဂုဏ်ပြု ချီးမြှင့်ပြီး အကျိုး ခံစားခွင့် ပေးရန်နှင့် မူပိုင်ခွင့်များကို အကာ အကွယ်ပေးရန် စသည့် ကောင်းမွန်သော ရည်ရွယ်ချက်များ ပါဝင်သော်လည်း ရည်ရွယ်ချက်များကို ထင်ဟပ် ပေါ်လွင်စေသည့် အချက်များသည် ခေါင်းစဉ်တွင် တစ်ခုမှ မပါဝင်သည့် အပြင် ပုဒ်မများထဲတွင်လည်း ပါဝင်မှု နည်းပါးသည်ကို တွေ့ရပါကြောင်း ဆွေးနွေးသည်။

ထို့ပြင် ဦးမျိုးဝင်းက မိမ်ိတို့နိုင်ငံကို နည်းပညာဖြင့် ဖွံ့ဖြိုး တိုးတက်ရန် ရှေးရှုပါက ပုဂ္ဂလ တီထွင်သူများကို အားပေး ချီးမြှောက်ပြီး ၎င်းတို့၏ တီထွင်မှုများ အခိုး မခံရစေရန် အပြည့်အ၀ ကာကွယ် ပေးထားသည့် ဥပဒေမျိုး ပြဋ္ဌာန်းပေးရန် လိုအပ်ပါကြောင်း၊ ထို့ပြင် တီထွင်သူများကို ဆွဲဆောင်နိုင်မည့် မက်လုံးများ ပါဝင်သည့် ခေါင်းစီးများ၏ အောက်တွင် ၎င်းတို့ စိတ်ဝင်စားမည့် အချက်များ ပါဝင်သည့် ပုဒ်မများကို စုစည်း ဖေါ်ပြရေးဆွဲ သင့်ပါကြောင်း၊ မူပိုင်ခွင့် ဥပဒေ ပြဋ္ဌာန်းနိုင်ခြင်း မရှိသေးသဖြင့် ဤဥပဒေထဲတွင် တီထွင်သူများ၏ တီထွင်မှုများကို အကာ အကွယ် ပေးထားသည့် ပုဒ်မများကိုလည်း မဖြစ်မနေ ထည့်သွင်း ရေးဆွဲသင့် ပါကြောင်း ဆွေးနွေးသည်။

မန္တလေး တိုင်းဒေသကြီး မဲဆန္ဒနယ် အမှတ်(၃)မှ ဒေါက်တာ ကျော်သန်းထွန်း (ကန်တုန်) က သိပ္ပံပိုင်းဆိုင်ရာ နည်းပညာ တီထွင် ကြံဆမှုများကို ခိုးယူနေသူများ ကမ္ဘာပေါ်တွင် တစ်ဦးချင်းမှအစ အသင်းအဖွဲ့အလိုက် အထိ ရှိနေပါကြောင်း၊ ထို့ကြောင့်  မသမာသူများအန္တရာယ်မှ ကင်းဝေးစေရန် ပြစ်မှုပြစ်ဒဏ် ရုပ်သိမ်း ပယ်ဖျက်ခြင်းကို မပြုသင့်ပါကြောင်း၊ ပြစ်မှုပြစ်ဒဏ်ဖော်ပြရာတွင်လည်း တစ်နှစ်ထက် မပိုသော ပြစ်ဒဏ်နှင့် ငွေဒဏ် သိန်းနှစ်ရာ၊ သိန်းသုံးရာ သတ်မှတ်ခြင်းအစား ထောင်ဒဏ်နှင့် ငွေဒဏ်ကို တိုးမြှင့်သတ်မှတ်ရန်လိုအပ်ပါကြောင်း ဆွေးနွေးသည်။

ထို့ပြင် ပညာရှင်တစ်ဦး၏ ဘ၀နှင့်ရင်းနှီးပြီး အချိန်အတိုင်းအတာများစွာ ကြိုတင် အားထုတ်မှု၏ အသီးအပွင့်ကို နိုင်ငံတော်က မိမ်ိနိုင်ငံ သားတစ်ဦးအား တန်ဖိုးထား လေးစားပြီး အကာအကွယ်ပေးခြင်းအားဖြင့် ချီးမြှင့် မြှောက်စားခြင်း စသည်တို့ကို လုပ်ဆောင်ပေးရန်လိုအပ်ပြီး လုံလောက်သော ပြစ်မှုပြစ်ဒဏ်များဖြင့် ကြိုတင် ကာကွယ် ပြဋ္ဌာန်းထားရှိရန် လိုအပ်ပါကြောင်း ဒေါက်တာကျော်သန်းထွန်းက ဆွေးနွေးသည်။

မကွေးတိုင်းဒေသကြီး မဲဆန္ဒနယ်အမှတ်(၈)မှ ဦးဝင်းမြင့်က ခေတ်မီဖွံ့ဖြိုးတိုး တက်သည့်နိုင်ငံတော်ကြီး တည်ဆောက်ရန်အတွက် ကျောင်းသားလူငယ် စွမ်းအား အရင်းအမြစ်များသည် အနာဂတ်အတွက် အခြေခံအကျဆုံး အရင်းအမြစ်များဖြစ်သော ကြောင့် ဤဥပဒေကို အခြေခံပညာအထက်တန်းကျောင်း အဆင့်အထိ နှိုးဆော် ဆက်စပ် ပေးပါက ပိုမိုကျယ်ပြန့်ပြီး ထိထိရောက်ရောက်ဖြစ်မည်ဟု ယုံကြည်ပါကြောင်း။

အစဉ်လေ့လာ သင်ယူနေသည့် လူ့အဖွဲ့အစည်းတစ်ရပ် ဖြစ်ထွန်းရေးဆိုသည့် ပညာရေးရည်မှန်းချက် အရ ကျောင်းသားလူငယ် တစ်ဦးချင်းဖြစ်စေ၊ အဖွဲ့လိုက်ဖြစ်စေ ဆန်းသစ် တီထွင်မှုပြပွဲများကို နိုင်ငံတော်က ဖော်ထုတ်ပေးခြင်းအားဖြင့်  ကျောင်းသား လူငယ်များ စဉ်ဆက်မပြတ် ဆန်းသစ် တီထွင်လိုစိတ်များ တစ်နေ့တစ်ခြား မြင့်မား လာမည်ဟု ယုံကြည်ပါကြောင်း ဆွေးနွေးသည်။

“သိပ္ပံ၊ နည်းပညာနှင့် ဆန်းသစ် တီထွင်မှု ဥပဒေကြမ်း” နှင့်စပ်လျဉ်း၍ ကိုယ်စား လှယ်များ၏ ဆွေးနွေးချက်များပေါ်  အမျိုးသား လွှတ်တော် ဥပဒေကြမ်း ကော်မတီက ပြန်လည် ကြားနာ ဆောင်ရွက် သွားမည် ဖြစ်သည်။