Monday, May 30, 2016

ပြည်ထောင်စုဝန်ကြီး ဒေါက်တာအောင်သူ ဧရာဝတီတိုင်းဒေသကြီးအတွင်း လယ်ယာနှင့် သားငါးထုတ်လုပ်မှု ပိုမိုဖွံ့ဖြိုးရေး ကွင်းဆင်းဆွေးနွေး


နေပြည်တော် မေ ၃၀
လယ်ယာကဏ္ဍနှင့် သားငါးကဏ္ဍတို့မှ ထုတ်လုပ်မှုများသည် စားနပ်ရိက္ခာဖူလုံပိုလျှံ ရေးသာမက အာဟာရပြည့်ဝသော စားသောက်မှုစနစ်သစ် ထူထောင်နိုင်ရေးအတွက် အလွန်အရေးပါသော ကဏ္ဍကြီးဖြစ်ပါကြောင်း၊ နိုင်ငံတကာစံချိန်စံညွှန်းမီ ဈေးကွက်ဝင်သော ထုတ်ကုန်များအဖြစ် ရေရှည်တည်တံ့သော လုပ်ငန်းစဉ်များဖြစ်ပေါ်လာရေးနှင့် ကဏ္ဍပေါင်းစုံမှ တစ်ပြိုင်တည်းဖွံ့ဖြိုး တိုးတက်လာရေးတို့အတွက် ပညာရှင်များ၊ လုပ်ငန်းရှင်များနှင့် တောင်သူများအနေဖြင့် ညီညီ ညွတ်ညွတ်ဖြင့် ပူးပေါင်းဆောင်ရွက် ကြစေလိုကြောင်းဖြင့် ဧရာဝတီတိုင်းဒေသကြီးအတွင်း လယ်ယာနှင့် သားငါး ထုတ်လုပ်မှု ပိုမိုဖွံ့ဖြိုးရေးဆိုင်ရာများ ကွင်းဆင်းဆောင်ရွက်စဉ် ပြည်ထောင်စုဝန်ကြီး ဒေါက်တာအောင်သူက ဆွေးနွေး ပြောကြားသည်။

စိုက်ပျိုးရေး၊မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး ဒေါက်တာအောင်သူသည် မေလ(၂၉)ရက် နံနက်(၁၀)နာရီအချိန်တွင် ဖျာပုံမြို့နယ်၊ ဆည်မြောင်း နှင့် ရေအသုံးချမှုစီမံ ခန့်ခွဲရေးဦးစီးဌာနရုံး ဇင်းဘောင်ရိပ်သာခန်းမ၌ ဌာနဆိုင်ရာ တာဝန်ရှိသူများနှင့်တွေ့ဆုံ၍  ဧရာဝတီတိုင်းဒေသကြီးအတွင်းရှိ ရေပေးမြောင်း၊ ရေနုတ်မြောင်းများ ရေစီး ရေလာကောင်းမွန်ရေး၊ ရေတံခါးများနှင့် ရေဘေးကာကွယ်ရေး တာတမံများအား မိုးမကျမီ ပြုပြင်မှုများပြီးစီးရေးနှင့် ကြိုတင်မမျှော်မှန်းနိုင်သော သဘာဝဘေးအန္တရာယ်များ ကျရောက်လာပါက ဒေသအတွက် ထိခိုက်မှုအနည်းဆုံး အခြေအနေဖြင့် ရင်ဆိုင်ကျော်လွှားနိုင်ရေး အစီအမံများ ဆောင်ရွက်ထားရှိရေး၊ နိုင်ငံတော်၏ ရက်(၁၀၀)စီမံချက်ကို အကောင်အထည်ဖော်ရာတွင် ဦးစားပေးလုပ်ငန်းများအလိုက် ဆောင်ရွက်ကြရမည်ဖြစ်သကဲ့သို့ စီမံချက်ကာလအတွက် သာမက နောင်ရေရှည် အကျိုးဖြစ်ထွန်းရေး အတွက်ပါ မျှော်မှန်းဆောင်ရွက်ကြစေလိုကြောင်း၊ ကာလအပိုင်းအခြားတစ်ခု သတ်မှတ်ပေးခြင်းသည် လုပ်ငန်းများ အရှိန်အဟုန်ကောင်းကောင်းဖြင့် ထိရောက်အောင်မြင်စွာ ဆောင်ရွက်နိုင်ရေး အတွက် တွန်းအား တစ်ခုအဖြစ် ခံယူဆောင်ရွက်ကြစေလိုပါကြောင်းဖြင့် ဆွေးနွေးမှာကြားသည်။
ထိုမှတဆင့် ဘိုကလေးမြို့နယ် သကံဝကျေးရွာ တောင်သူပညာပေးစခန်း၌ ဒေသနေ တောင်သူလယ်သမားများနှင့် ခင်မင်ရင်းနှီးစွာ တွေ့ဆုံပြီး လယ်ယာနှင့်သားငါးထုတ်လုပ်မှု ပိုမိုဖွံ့ဖြိုးရေးဆိုင်ရာများကို ဆွေးနွေးသည်။

ဆွေးနွေးပွဲတွင် တောင်သူလယ်သမားများက လယ်ယာကဏ္ဍလုပ်ငန်းများအတွက် လိုအပ်ချက်များ၊ အခက်အခဲများနှင့် အကြံပြုချက်များ တင်ပြဆွေးနွေးကြရာ ပြည်ထောင်စုဝန်ကြီးက ပြန်လည်ဆွေးနွေးရာ၌ စိုက်ပျိုးစရိတ်ချေးငွေများ ထုတ်ချေးရာတွင်  မိမိတို့နိုင်ငံ၏ အဓိကသီးနှံ ဖြစ်သော ဆန်စပါးစိုက်ပျိုးထုတ်လုပ်မှုကို ဦးစားပေးဆောင်ရွက် ခဲ့ရသကဲ့သို့ ပြည်ထောင်စုရံပုံငွေ မူဘောင်အတွင်းမှလည်း ထည့်သွင်းစဉ်းစားခဲ့ပါကြောင်း၊ အခြားသီးနှံများ အတွက်စိုက်ပျိုးစရိတ် ချေးငွေ တိုးမြှင့်ထုတ်ချေးနိုင်ရေးကိုလည်း တာဝန်ရှိသူများအနေဖြင့် ချင့်ချိန်တွက်ဆလျက်ရှိနေပါကြောင်း၊  နိုင်ငံတော် အပိုင်းမှ စိုက်ပျိုးစရိတ်ထုတ်ချေးပေးနိုင်ရေးသာမက နည်းပညာပံ့ပိုး ရေး၊ ဒေသ ရေ မြေ ရာသီဥတုနှင့် ကိုက်ညီသော သီးနှံပုံစံများ ချမှတ်ပေးခြင်း၊ လယ်ယာလုပ်ငန်းသုံး စက်ကရိယာများကို တောင်သူတိုင်း လက်လှမ်းတမီ သုံးစွဲနိုင်ရေး၊ စနစ်ကျ လယ်ယာမြေများ ဖော်ထုတ်ပေးရေး၊ ထွက်ကုန်များကို စားသုံးသူဈေးကွက်အရောက် တိုက်ရိုက်တင်ပို့ ရောင်းချနိုင်ရေး အပါအဝင် လယ်ယာကဏ္ဍဖွံ့ဖြိုးပြီး ကျေးလက်နေပြည်သူများ၏ လူမှုစီးပွားဘ၀ တိုးတက်ရေး အစီအမံများကို အကောင်အထည်ဖော် ဆောင်ရွက်ပေးလျက်ရှိရာ တောင်သူလယ်သမားကြီးများ အနေဖြင့် ပူးပေါင်းပါဝင် ကြိုးပမ်းပေးကြစေလိုကြောင်း မှာကြားခဲ့ကြောင်း သတင်းရရှိသည်။  

No comments:

Post a Comment