ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ (UPDJC) စုံညီအစည်းဝေးတွင် နိုင်ငံရေးပါတီအစုအဖွဲ့မှ ရွေးချယ် ရန်ကျန်ရှိနေသေးသည့် ဒုတိယဥက္ကဋ္ဌအတွင်းရေးမှူး တို့အားရွေးချယ်

ရန်ကုန် ၊ နိုဝင်ဘာ ၂၄

သတင်း..ရဲခေါင်ညွန့်၊ မြတ်သန္တာမောင် ဓါတ်ပုံ..ဖိုးထောင်

ပြည်ထောင်စုသမ္မတ မြန်မာနိုင်ငံတော်အစိုးရ၊ တိုင်းရင်းသားလက်နက်ကိုင်အဖွဲ့အစည်းများနှင့် နိုင်ငံရေး ပါတီများပါဝင်သည့် ပြည်ထောင်စုငြိမ်းချမ်းရေး ဆွေးနွေးမှု ပူးတွဲကော်မတီ (UPDJC) စုံညီအစည်းဝေးတွင် နိုင်ငံရေးပါတီ အစုအဖွဲ့မှရွေးချယ် ရန်ကျန်ရှိနေသေးသည့် UPDJC ဒုတိယဥက္ကဋ္ဌအဖြစ် ဦးသုဝေ (ဒီမိုကရက်တစ်ပါတီ-မြန်မာ) နှင့် အတွင်းရေးမှူးအဖြစ် စိုင်းကျော်ညွှန့် (ရှမ်းတိုင်းရင်းသားများ ဒီမိုကရေစီ အဖွဲ့ချုပ်) တို့ကို ရွေးချယ်ခဲ့ကြသည်။

ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ (UPDJC) စုံညီအစည်းဝေးကို ယနေ့နံနက်  ၉ နာရီမှ စတင်၍ မြန်မာနိုင်ငံ ငြိမ်းချမ်းရေး ပြန်လည်ထူထောင်ရေးလုပ်ငန်းဗဟိုဌာန (MPC) တွင် ကျင်းပခဲ့ ခြင်း ဖြစ်သည်။

အစည်းအဝေးတွင် ပြည်ထောင်စုဝန်ကြီးဦးအောင်မင်းနှင့်တိုင်းရင်းသားလက်နက်ကိုင်အဖွဲ့အစည်းများ ကိုယ်စား ကရင်အမျိုးသား အစည်းအရုံး အထွေထွေအတွင်းရေးမှူး(KNU) ပဒိုစောကွယ်ထူးဝင်းတို့က နှုတ်ခွန်းဆက် ပြောကြားခဲ့ကြသည်။

ပြည်ထောင်စုဝန်ကြီးဦးအောင်မင်းက ပြည်ထောင်စုငြိမ်းချမ်းရေးဆွေးနွေးမှုပူးတွဲကော်မတီ (UPDJC) တွင် နိုင်ငံရေးပါတီများပါဝင်နိုင်ရန်အတွက်ပြီးခဲ့သည့် နိုဝင် ဘာ (၂၁) ရက်က နိုင်ငံရေးပါတီ (၉၁) ပါတီ၏ ကိုယ်စားလှယ်အဖြစ် ကိုယ်စားလှယ်(၁၆) ဦးကိုရွေးချယ် နိုင်ခဲ့ကြောင်း၊ နိုင်ငံရေးပါတီများ၏ ကိုယ်စားလှယ်များကို မရွေးနိုင်ခဲ့ပါက နိုင်ငံရေးမူဘောင် ရေးဆွဲရေးနှင့် နိုင်ငံရေးဆွေးနွေးပွဲများ အချိန်မီစတင်နိုင်ရေး အတွက် နှောင့်နှေးနိုင်ပြီး  NCA စာချုပ်ကိုချိုးဖောက် သကဲ့သို့ဖြစ်သွားနိုင် ကြောင်း၊

မိမိတို့အနေဖြင့် စုပေါင်းမူဘောင်ရေးဆွဲနိုင်ရန်နှင့် နိုင်ငံရေးဆွေးနွေးပွဲများစတင်နိုင်ရန် လုပ်ဆောင် စရာများ ရှိနေသေးကြောင်း၊  နိုင်ငံရေးဆွေးနွေးပွဲများ စတင်နိုင်ရန် ယနေ့မှစတင်ရေတွက် ပါကဇန်နဝါရီ (၁၄)ရက်နေ့အထိ ရက်ပေါင်း(၅၀)ခန့်သာ ကျန်ရှိကြောင်း၊ ထို့ကြောင့်သတ်မှတ်ထားသည့် လုပ်ငန်းစဉ် များအချိန်မီပြီးစီးစေရန် မိမိတို့အားလုံး ပိုမိုအားစိုက်ရမည်ဖြစ်ကြောင်း၊ မိမိတို့ ဆောင်ရွက်နေသည့် ငြိမ်းချမ်းရေး လုပ်ငန်းစဉ်သည်အခက်အခဲများနှင့်  အချိန်ကန့်သတ်ချက်များရှိနေသည့်အတွက် အားနည်းမှုနှင့် မပြည့်စုံမှုများ ရှိနိုင်၍ နားလည်မှုများဖြင့် ပူးပေါင်းဆောင်ရွက်စေလိုကြောင်း၊ 

မိမိတို့အနေဖြင့် မည့်သည့်အရာကိုမျှ ပိတ်ပင်ထားခြင်းမရှိသကဲ့သို့ NCA တွင်ပါဝင်သည့် NCA Timeline အားမဖောက်ဖျက်ဘဲ အများစု လက်ခံနိုင်ပြီး ရှေ့ဆက်သွားနိုင်သည့် အခြေအနေမျိုးကို ဝိုင်းဝန်းဆောင်ရွက်ရန် လိုကြောင်း၊ နောင်လာမည့်အစိုးရအဆင်ပြေစေရန်အတွက် နိုင်ငံရေးမူဘောင်အား ပြောင်းလွယ် ပြင်လွယ် ဖြစ်အောင် ဆောင်ရွက်စေလိုကြောင်း၊ NCA သည် အလွယ်တကူ ရရှိခဲ့ခြင်း မဟုတ်ပါကြောင်း၊ မိမိတို့နိုင်ငံ၏ ငြိမ်းချမ်းရေးအတွက် အားလုံးစုပေါင်း၍ နားလည် မှုများဖြင့် ငြိမ်းချမ်းရေးလုပ်ငန်းစဉ် အားဘုံပိုင်အဖြစ် သဘောထား လုပ်ကိုင်ခဲ့ကြခြင်း ဖြစ်ကြောင်း ပြောကြားသည်။

ဆက်လက်၍ တိုင်းရင်းသားလက်နက်ကိုင် အဖွဲ့အစည်းများကိုယ်စား ကရင်အမျိုးသားအစည်းအရုံး အထွေထွေအတွင်းရေးမှူး  ပဒိုစောကွယ်ထူးဝင်းက မိမိတို့သည် NCA ၏ တာဝန်တစ်ရပ်ဖြစ်သည့်အပစ်အခတ် ရပ်စဲရေးကိုခိုင်မာအောင် ပြုလုပ်ရမည်ဖြစ်ပြီး တစ်ချိန်တည်းမှာပင် နိုင်ငံရေးဆွေးနွေးပွဲများ ဖြစ်ပေါ်လာအောင် လုပ်ဆောင်ရမည်ဖြစ်ကြောင်း၊ UPDJC တွင်ပါဝင်ရမည့်အစုအဖွဲ့များတွင် နိုင်ငံရေးပါတီအစုအဖွဲ့များသည် မပါဖြစ်ပါရမည်ဖြစ်ပါကြောင်း၊ မိမိတို့လက်နက်ကိုင် တိုင်းရင်းသားများအနေဖြင့် နိုင်ငံရေးပြသနာများကို နိုင်ငံရေးအရတွေ့ဆုံဆွေးနွေးခြင်းဖြင့်သာအဖြေရှာရကြမည်ဟုလက်ခံယုံကြည်ထားကြောင်း၊ယခုအခါတွင်UPDJC ဟုခေါ်သည့် ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ၏ဖွဲ့စည်းပုံ၊ လုပ်ငန်းတာဝန်နှင့် လုပ်ငန်းလမ်းညွှန်များလည်းအတည်ပြုနိုင်ခဲ့ပြီဖြစ်ကြောင်း၊ UPDJC ၏အဓိ ကတာဝန်သည် နိုင်ငံရေးပြသနာများအားနိုင်ငံရေးနည်းဖြင့်ဖြေရှင်းနိုင်ရန်နှင့် နိုင်ငံရေးတွေ့ဆုံဆွေးနွေးမှု ဖြစ်ပေါ်လာနိုင်ရန် အတွက်ဖြစ်ကြောင်း၊

UPDJC သည် အစုအဖွဲ့ သုံးဖွဲ့ပါဝင်သော်လည်း တစ်သင်းတစ်ဖွဲ့တည်း ဖြစ်သည် ဆိုသောစိတ်ဓါတ်မျိုးကို နှလုံးသွင်းရမည် ဖြစ်ကြောင်း၊  UPDJC၏ တာဝန်တစ်ရပ်သည် ရက်ပေါင်း (၆၀) အတွင်း နိုင်ငံရေး ဆွေးနွေးပွဲတစ်ရပ်လုံးကို စနစ်တကျဖြင့် ထိန်းကျောင်းသွားနိုင်မည့် နိုင်ငံရေးမူဘောင် တစ်ရပ်ကို ရေးဆွဲရမည် ဖြစ်ကြောင်း၊ နိုင်ငံရေးဆွေးနွေးပွဲများမှတစ်ဆင့် မိမိတို့ နိုင်ငံနှင့် သင့်တော်သည့် ဒီမိုကရက်တစ် ဖက်ဒရယ် ပြည်ထောင်စုကို တည်ဆောက်နိုင်မည် ဖြစ်ကြောင်း ပြောကြားသည်။

ယနေ့ပြုလုပ်သည့်အစည်းအဝေးတွင် ရွေးချယ်ပေးရန် ကျန်ရှိသည့် နိုင်ငံရေးပါတီအစုအဖွဲ့မှ UPDJC အတွက် ဒုတိယဥက္ကဌနှင့် အတွင်းရေးမှူး တစ်ဦးတို့အားရွေးချယ်ခြင်း၊ ပြည်ထောင်စု ငြိမ်းချမ်းရေးဆွေးနွေးမှု ပူးတွဲကော်မတီ (UPDJC) ၏ လုပ်ငန်းလမ်းညွှန်ကိုရှင်းလင်း၊ သုံးသပ်၊ ဖြည့်စွက်ခြင်း၊ UPDJC ၏ အစုအဖွဲ့တစ်ခုစီမှ အကျိုးဆောင်တစ်ဦးစီနှင့်အရံ အကျိုးဆောင် တစ်ဦးစီတို့၏ အမည်စာရင်းများကို အတည်ပြုခြင်း၊ UPDJC အစည်းအဝေးသို့ အကြံပေးများအဖြစ်အစုအဖွဲ့တစ်ခုစီမှ တက်ရောက်ခွင့်ရရှိသူ အရေအတွက်ကို သတ်မှတ်အတည်ပြုခြင်းနှင့် နိုင်ငံရေးဆွေးနွေးမှုဆိုင်ရာ မူဘောင်မူကြမ်းရေးဆွဲရေး ကော်မတီအတွက် အစုအဖွဲ့ တစ်ခုစီမှ ကိုယ်စားလှယ်များရွေးချယ် အတည်ပြုခြင်းများ ဆောင်ရွက်ခဲ့ကြသည်။

ညနေပိုင်းတွင် တိုင်းရင်းသားလက်နက်ကိုင်အဖွဲ့အစည်းများကိုယ်စား ပအိုဝ်းအမျိုးသား လွတ်မြောက်ရေး အဖွဲ့ချုပ်မှ ဦးခွန်မြင့်ထွန်း၊ နိုင်ငံရေးပါတီများ ကိုယ်စား ဒီမိုကရက်တစ်ပါတီ-မြန်မာမှ ဦးသုဝေနှင့် အစိုးရ ကိုယ်စား ပြည်ထောင်စုဝန်ကြီး ဦးအောင်မင်းတို့က နိဂုံးချုပ် ပြောကြားခဲ့ကြသည်။

အစည်းအဝေးအပြီးညနေ ၅ နာရီတွင် ယနေ့ပြုလုပ်သည့် UPDJC အစည်းအဝေးနှင့်ပတ်သက်၍ သတင်းစာရှင်းလင်းပွဲ ပြုလုပ်ခဲ့ရာ ပြည်တွင်း ပြည်ပမီဒီယာများ၏ မေးမြန်းမှုများကို ဦးခွန်မြင့်ထွန်း (PNLO)၊ ဦးလှမောင်ရွှေ (MPC)၊ ဦးသုဝေ(NDF) နှင့်   ဦးစိုင်းကျော်ညွှန့် (SNLD) တို့ကပြန်လည် ဖြေကြားခဲ့သည်။

ယနေ့ပြုလုပ်သည် အစည်းအဝေးသည် UPDJC ၏ ဒုတိယအကြိမ် အစည်းအဝေးဖြစ်ပြီးပထမအကြိမ် UPDJC အစည်းအဝေးကို အောက်တိုဘာ ၁၆ ရက်က နေပြည်တော်၌ နိုင်ငံတော်အစိုးရအစုအဖွဲ့နှင့် တိုင်းရင်းသား လက်နက်ကိုင်အစုအဖွဲ့တို့ တွေ့ဆုံဆွေးနွေးခဲ့ကြသည်။ ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ (UPDJC)အားအစိုးရဘက်မှ(၁၆) ဦး၊ (NCA) လက်မှတ်ရေးထိုးထားသည့် တိုင်းရင်းသား လက်နက်ကိုင် အဖွဲ့အစည်းများမှ (၁၆)ဦး နှင့် နိုင်ငံရေးပါတီများမှ (၁၆)ဦးတို့ဖြင့် ပါဝင်ဖွဲ့စည်းထားခြင်း ဖြစ်သည်။

ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ (UPDJC)၏အဓိကဦးစားပေးလုပ်ဆောင်ရမည့် ကိစ္စများမှာ နိုင်ငံရေးမူဘောင်ရေးဆွဲရေးကော်မတီအားဖွဲ့စည်းရန်၊ NCA စာချုပ်ပါ အချိန်သတ်မှတ်ချက်အရ လက်မှတ်ရေးထိုးထားပြီး နောက်ပိုင်းရက်ပေါင်း (၆၀) မတိုင်မီမူဘောင်ဆွေးနွေးပွဲများ တရားဝင် စတင်နိုင်ရန်အတွက် လိုအပ်သည့် ညှိနှိုင်းမှုများ ပြုလုပ်သွားရန်၊ ရက်ပေါင်း (၉၀) ပြည့်မည့် ဇန်န၀ါရီ (၁၄) ရက်မတိုင်မီ နိုင်ငံရေးဆွေးနွေးပွဲများစတင်နိုင်ရေး ဆောင်ရွက်ရန် တို့ဖြစ်ကြောင်းသိရသည်။