ရွေးကောက်ပွဲ ကာလ နိုင်ငံတကာ စောင့်ကြည့် လေ့လာသူများသည် ၁၉၆၁ ဗီယင်နာ ကွန်ဗင်းရှင်းပါ အိမ်ရှင်နိုင်ငံ ပြည်တွင်းရေးနှင့် စပ်လျဉ်းသည့် ပြဋ္ဌာန်းချက်များကို လေးစား လိုက်နာရန် လိုအပ်

နေပြည်တော် အောက်တိုဘာ ၂၃

ပြည်ထောင်စု ရွေးကောက်ပွဲ ကော်မရှင် ဥက္ကဋ္ဌ ဦးတင်အေးနှင့် နိုင်ငံခြားရေး ဝန်ကြီးဌာန ပြည်ထောင်စုဝန်ကြီး ဦးဝဏ္ဏမောင်လွင်တို့သည် ရန်ကုန်အခြေစိုက်နှင့် မြန်မာနိုင်ငံ၌ သံတမန်ပူးတွဲ တာဝန် ထမ်းဆောင်လျက် ရှိသော သံတမန်အဖွဲ့၊ မြန်မာနိုင်ငံ၌ ရောက်ရှိနေသည့် နိုင်ငံတကာမှ ရွေးကောက်ပွဲ ကော်မရှင်အဖွဲ့ ကိုယ်စားလှယ် များအား ယနေ့မွန်းလွဲ ၂ နာရီတွင် နေပြည်တော်ရှိ Kempinski Hotel ၌ တွေ့ဆုံ သည်။

တွေ့ဆုံစဉ် ပြည်ထောင်စု ရွေးကောက်ပွဲ ကော်မရှင် ဥက္ကဋ္ဌက မြန်မာနိုင်ငံ လွတ်လပ်ရေး ရရှိပြီးနောက်  ယခုကျင်းပမည့် ရွေးကောက်ပွဲသည် (၆) ကြိမ်မြောက် ဖြစ်ကြောင်း၊ ရွေးကောက်ပွဲအား အောင်မြင်စွာ ကျင်းပနိုင်ရန် အတွက် မဟာဗျူဟာ စီမံကိန်းကို ရေးဆွဲ ဆောင်ရွက်ခဲ့ကြောင်း၊ လွတ်လပ်၍ တရား မျှတသော ရွေးကောက်ပွဲကို ဘက်လိုက်ခြင်း မရှိဘဲ ပွင့်လင်း မြင်သာစွာ ကျင်းပဆောင်ရွက် သွားမည် ဖြစ်ကြောင်း။

ရွေးကောက်ပွဲ အတွက် မဲစာရင်းကို စက်တင်ဘာ ၁၄ ရက် မှ ၁၇ ရက်ထိ ထုတ်ပြန် ကြေညာခဲ့ကြောင်း၊ ပြည်တွင်း ရွေးကောက်ပွဲ လေ့လာ စောင့်ကြည့်ရေး အဖွဲ့များ၏ သတင်း ထုတ်ပြန်ချက် အရ လာရောက် ကြည့်သူ နည်းကြောင်း၊ မဲစာရင်းသည် အရေးကြီးပြီး မဲစာရင်းတွင် ပါဝင်မှသာ မဲပေးနိုင်မှာ ဖြစ်သကဲ့သို့ ရွေးကောက် တင်မြှောက် ခံပိုင်ခွင့်ရှိမှာ ဖြစ်ကြောင်း။

ပြည်သူ့ လွှတ်တော် မဲဆန္ဒနယ်ကို မြို့နယ် (၃၃၀) အား တစ်မြို့နယ်လျှင် မဲဆန္ဒနယ်တစ်နယ်စီ အဖြစ် သတ်မှတ် ပါကြောင်း၊ အမျိုးသား လွှတ်တော် မဲဆန္ဒနယ်ကို တိုင်းဒေသကြီး သို့မဟုတ် ပြည်နယ် တစ်ခုစီတွင် မဲဆန္ဒနယ် (၁၂)နယ်စီ သတ်မှတ်ပါကြောင်း၊ တိုင်းဒေသကြီး သို့မဟုတ် ပြည်နယ် လွှတ်တော် မဲဆန္ဒနယ်ကို မြို့နယ် တစ်မြို့နယ်စီတွင် မဲဆန္ဒနယ် နှစ်နယ်စီ သတ်မှတ်ပါကြောင်း၊ မဲဆန္ဒ နယ်မြေ သတ်မှတ်ရာတွင် မဲဆန္ဒရှင်ဦးရေကို အခြေခံ၍ သတ်မှတ်ခြင်း မဟုတ်ဘဲ တိုင်းရင်းသား လူမျိုးများ အခွင့်အရေး တန်းတူညီမျှစွာ ရရှိစေရန် မြို့နယ်ကို အခြေခံ၍ သတ်မှတ်ခြင်း ဖြစ်ကြောင်း။

လွှတ်တော် ကိုယ်စားလှယ်လောင်း အမည်စာရင်း တင်သွင်းသူပေါင်း ၆၁၈၅ ဦးရှိပြီး အတည် ပြုသူ (၆၀၆၅) ဦး ရှိကြောင်း၊ အမျိုးသား ကိုယ်စားလှယ်လောင်း ၅၂၇၄ ဦး (၈၆.၈%) နှင့် အမျိုးသမီး ကိုယ်စားလှယ်လောင်း  ၈၀၀ ဦး (၁၃.၂%)  ရှိကြောင်း၊ လွှတ်တော် ကိုယ်စားလှယ်လောင်း စိစစ်ခြင်း ကို ဥပဒေနှင့် အညီ ဆောင်ရွက်ခဲ့ကြောင်း၊ ရွေးကောက်ပွဲ ကျင်းပရန် အခြေအနေ မရှိသဖြင့် ကျင်းပခြင်း မပြုနိုင်သည့် နယ်မြေများမှာ မြို့နယ် (၅) မြို့နယ်၊ ရပ်ကွက် (၁၀) ရပ်ကွက်၊ ကျေးရွာအုပ်စု (၅၈၈) အုပ်စု ဖြစ်ပါကြောင်း၊ အစိုးရ၏ ခွင့်ပြုချက်ဖြင့် နိုင်ငံ ပြင်ပရောက် မဲဆန္ဒရှင်များ ကြိုတင် ဆန္ဒမဲပေး နိုင်ရေးအတွက် နိုင်ငံခြားရေး ဝန်ကြီးဌာနနှင့် ပူးပေါင်း ဆောင်ရွက်ခဲ့ပါကြောင်း။

၂၀၁၅ ခုနှစ် အထွေထွေ ရွေးကောက်ပွဲကို မှန်ကန်မျှတပြီး ပွင့်လင်းမြင်သာစွာဖြင့် ဥပဒေနှင့် အညီ အကောင် အထည်ဖော် ကျင်းပနိုင်ရေး ကြိုးပမ်း ဆောင်ရွက်လျက် ရှိကြောင်း၊ လွတ်လပ်၍ တရားမျှတပြီး အများ ယုံကြည် လက်ခံသော ရွေးကောက်ပွဲ ဖြစ်ရန် နိုင်ငံရေးပါတီများ၊ လူမှု အဖွဲ့ အစည်းများ၊ မီဒီယာများ၊ နိုင်ငံတော် အစိုးရနှင့် နိုင်ငံတကာမှ မိတ်ဆွေ အဖွဲ့အစည်း များကလည်း အားပေး ကူညီကြမည်ဟု ယုံကြည် မျှော်လင့်ပါကြောင်း ပြောကြားသည်။

ထို့နောက် နိုင်ငံခြားရေး ဝန်ကြီးဌာန ပြည်ထောင်စုဝန်ကြီးက နိုင်ငံခြားရေးဝန်ကြီးဌာနမှ ပွင့်လင်းမြင်သာသော၊ လွတ်လပ်သော၊ တရား မျှတသော ရွေးကောက်ပွဲများ ကျင်းပနိုင်ရေး အတွက် ကူညီပံ့ပိုး ဆောင်ရွက်လျက် ရှိကြောင်း၊ ထိုသို့ ဆောင်ရွက်ရာတွင် မြန်မာနိုင်ငံအခြေစိုက်နှင့် ပူးတွဲ ထမ်းဆောင်သည့် သံတမန်များအား ရွေးကောက်ပွဲ စောင့်ကြည့် လေ့လာသူများ အဖြစ် ဖိတ်ခေါ် လေ့လာစေသည့် လုပ်ငန်းလည်း ပါရှိကြောင်း၊ သံတမန်များ အနေဖြင့် ရွေးကောက်ပွဲ ကြိုတင် ပြင်ဆင်မှုများကို မြန်မာနိုင်ငံ အနှံ့ သွားရောက် လေ့လာလျက် ရှိပါကြောင်း၊ ထိုသို့ လေ့လာရာတွင် နိုင်ငံရေး ပါတီများ၊ ရွေးကောက်ပွဲ ကော်မရှင် ရုံးခွဲများ၊ မဲဆန္ဒရှင်များနှင့်လည်း တွေ့ဆုံလျက် ရှိကြောင်း၊ ရွေးကောက်ပွဲ ကာလတွင်လည်း နိုင်ငံတကာ စောင့်ကြည့် လေ့လာသူများ အဖြစ် ပါဝင် ဆောင်ရွက်ရာတွင် ရွေးကောက်ပွဲ ကော်မရှင်မှ ထုတ်ပြန် ထားသည့် နိုင်ငံတကာ ရွေးကောက်ပွဲ စောင့်ကြည့် လေ့လာသူများ လိုက်နာရမည့် ကျင့်ဝတ်များ အပြင် သံတမန် ဆက်ဆံရေး ဆိုင်ရာ ၁၉၆၁ ခုနှစ် ဗီယင်နာ ကွန်ဗင်းရှင်းပါ အိမ်ရှင်နိုင်ငံ၏ ပြည်တွင်းရေးနှင့် စပ်လျဉ်းသည့် ပြဌာန်းချက်များကို လေးစား လိုက်နာရန် တာဝန် ဝတ္တရားများ ရှိကြောင်း၊ တရားမျှတပြီး လွတ်လပ်သည့်၊ ထင်သာ မြင်သာ ရှိသည့်၊ ယုံကြည်ရသည့် ရွေးကောက်ပွဲများကို အေးအေး ချမ်းချမ်း အောင်မြင်စွာ ကျင်းပ ပြုလုပ်နိုင်ရေး အတွက် သံတမန်များ အပါအဝင် အားလုံး၏ ပူးပေါင်း ဆောင်ရွက်မှု လိုအပ်ကြောင်း၊ သံတမန်များ၏ လှုပ်ရှားမှု များသည် ရွေးကောက်ပွဲ၏ တရားမျှတမှုကို မထိခိုက်စေရန် လိုအပ်ပါကြောင်း ရှင်းလင်း ပြောကြားသည်။

ယင်းနောက် ရွေးကောက်ပွဲ ကော်မရှင် ဥက္ကဋ္ဌနှင့် ပြည်ထောင်စု ဝန်ကြီးတို့သည့် တက်ရောက် လာသူများ၏ မေးမြန်းမှုများ အပေါ်  ပြန်လည် ရှင်းလင်း ဖြေကြားကြသည်။