Wednesday, December 31, 2014

ပြည်ထောင်စု လွှတ်တော် နာယက ပြည်သူ့ လွှတ်တော် ဥက္ကဋ္ဌ သူရဦးရွှေမန်း ရန်ကုန်မြို့မှ လူမှု အဖွဲ့အစည်းများအား တွေ့ဆုံ အမှာစကား ပြောကြား


ရန်ကုန် ဒီဇင်ဘာ(၃၀)
ဥပဒေပြုရေး၊ အုပ်ချုပ်ရေး၊ တရားစီရင်ရေး အဖွဲ့အစည်းများ အနေဖြင့်‌ မိမိတို့ သက်ဆိုင်ရာ ကဏ္ဍအလိုက် တာဝန်ယူ၊ တာဝန်ခံ ဆောင်ရွက်ရမည် ဖြစ်ပြီး ပွင့်လင်း မြင်သာမှု ရှိမှသာ ဒီမိုကရေစီ အနှစ်သာရ ရှိမည် ဖြစ်ကြောင်းဖြင့်‌  ပြည်ထောင်စု လွှတ်တော် နာယက ပြည်သူ့လွှတ်တော် ဥက္ကဋ္ဌ သူရဦးရွှေမန်းက ယနေ့ မွန်းလွဲ(၁) နာရီတွင် ရန်ကုန်တိုင်း ဒေသကြီး အစိုးရအဖွဲ့ရုံး ဧည့်ခံခန်းမကြီး၌ ကျင်းပသည့် ရန်ကုန်မြို့မှ လူမှု အဖွဲ့အစည်းများနှင့်‌ တွေ့ဆုံပွဲ အခမ်းအနားတွင် ပြောကြားသည်။



အဆိုပါ တွေ့ဆုံပွဲသို့ ပြည်ထောင်စု လွှတ်တော် ဒုတိယနာယက ပြည်သူ့လွှတ်တော် ဒုတိယဥက္ကဋ္ဌ ဦးနန္ဒကျော်စွာ၊ ရန်ကုန် တိုင်းဒေသကြီး ဝန်ကြီးချုပ် ဦးမြင့်‌ဆွေ၊ ရန်ကုန်တိုင်း ဒေသကြီး လွှတ်တော် ဥက္ကဋ္ဌ ဦးစိန်တင်ဝင်း၊ ပြည်သူ့လွှတ်တော် ကော်မတီ ဥက္ကဋ္ဌများ၊ ပြည်ထောင်စု လွှတ်တော် ကိုယ်စားလှယ်များ၊ ပြည်သူ့လွှတ်တော် ဥပဒေရေးရာနှင့် အထူး ကိစ္စရပ်များ လေ့လာ ဆန်းစစ် သုံးသပ်ရေး ကော်မရှင် အဖွဲ့ဝင်များ၊ တိုင်းဒေသကြီး အစိုးရ အဖွဲ့ဝင်များ၊ တိုင်းဒေသကြီး လွှတ်တော် ကိုယ်စားလှယ်များ၊ မြို့နယ်ဖွံ့ဖြိုး တိုးတက်ရေး အထောက်အကူပြု ကော်မတီဝင်များ၊ ဌာနဆိုင်ရာ တာဝန်ရှိသူများ၊ နိုင်ငံရေး၊ စီးပွားရေးဆိုင်ရာ ကိုယ်စားလှယ်များ၊ လူမှုရေး အသင်းအဖွဲ့များမှ ကိုယ်စားလှယ်များ၊ လူမှုအဖွဲ့ အစည်းများမှ ကိုယ်စားလှယ်များ၊ ပြည်သူ့ လွှတ်တော်ရုံးမှ တာဝန်ရှိသူများနှင့်‌ ဖိတ်ကြား ထားသူများ တက်ရောက်ကြသည်။
ရှေးဦးစွာ ပြည်ထောင်စု လွှတ်တော် နာယက ပြည်သူ့လွှတ်တော် ဥက္ကဋ္ဌ သူရဦးရွှေမန်းက ပြည်သူလူထုနှင့်‌ အစိုးရကြား ပေါင်းကူး ဆက်သွယ်ပေးပြီး နိုင်ငံတော် အကျိုး ဖော်ဆောင်ပေးမည့် လူမှု အဖွဲ့အစည်းများနှင့်‌ တွေ့ဆုံခွင့်‌ ရရှိသည့် အတွက် ဝမ်း‌မြောက် ဂုဏ်ယူပါကြောင်း၊ မိမိတို့နိုင်ငံကို ပါတီစုံ ဒီမိုကရေစီနှင့်‌ ဈေးကွက် စီးပွားရေး စနစ်ကျင့်‌သုံးပြီး ခေတ်မီ ဖွံ့ဖြိုး တိုးတက်သော နိုင်ငံတော် ဖြစ်ပေါ်လာရေး တည်ဆောက်နေခြင်း ဖြစ်ပါကြောင်း၊ ယင်းသို့ ဆောင်ရွက်ရာ၌ ဒီမိုကရေစီ စနစ်နှင့်အညီ လူမှု အဖွဲ့အစည်းများသည် နေရာရရှိပြီး နိုင်ငံတော် အကျိုး၊ ဒေသအကျိုး ဆောင်ရွက် နိုင်သည့် အဖွဲ့များ ဖြစ်ပါကြောင်း။
အလျဉ်းသင့်‌၍ လွှတ်တော်များ၏ တာဝန်နှင့် ဆောင်ရွက်ချက်ကို တင်ပြလို ပါကြောင်း၊ လွှတ်တော်များသည် ဥပဒေများ အတည်ပြု ပြဋ္ဌာန်းခြင်း၊ ဥပဒေပြုရေး မဏ္ဍိုင်၊ အုပ်ချုပ်ရေး မဏ္ဍိုင်နှင့်‌ တရားစီရင်ရေး မဏ္ဍိုင်ဆိုသည့် မဏ္ဍိုင်ကြီး (၃)ရပ်အတွင်း ဆောင်ရွက်ချက်များ အပေါ် အပြန်အလှန် ညှိနှိုင်း ထိန်းကျောင်းခြင်း၊ နိုင်ငံတော်၏ အရအသုံး ဘတ်ဂျက်ကို စိစစ် ခွင့်ပြုခြင်းများ ဆောင်ရွက်ရပါကြောင်း၊ လွှတ်တော်က ချမှတ်ထားသော    “ပြည်သူ့အသံ လွှတ်တော် အသံ၊ ပြည်သူ့ဆန္ဒ လွှတ်တော် ဆန္ဒ၊ ပြည်သူတို့ မျှော်လင့်ချက် လွှတ်တော်က ဖော်ဆောင်ရွက်” ဆောင်ပုဒ်သည် လွှတ်တော်၏ မူဝါဒပင် ဖြစ်ကြောင်း၊ လွှတ်တော်၏ မူဝါဒနှင့်အညီ နည်းလမ်း (၃)ခုဖြစ်သည့်‌ ပြည်သူများ၏ လိုအပ်ချက်ကို ဖြည့်ဆည်းပေးရေး အတွက် မေးခွန်းများ မေးမြန်းခြင်း၊ အဆိုများ တင်သွင်း ဆွေးနွေး ဆုံးဖြတ်ခြင်း၊ ဥပဒေ ရေးဆွဲ ပြဋ္ဌာန်းခြင်းများ ဆောင်ရွက်လျက် ရှိပါကြောင်း။
ယင်းလုပ်ငန်းများ ဆောင်ရွက်သည့် နည်းတူ လွှတ်တော် အတွင်း၌ ဦးစားပေး လုပ်ငန်းများ အဖြစ် တိုင်းရင်းသား စည်းလုံး ညီညွတ်ရေး၊ အမျိုးသား ပြန်လည် သင့်‌မြတ်ရေး၊ ပြည်တွင်း ငြိမ်းချမ်းရေး လုပ်ငန်းများကိုလည်း အလေးထား ဆောင်ရွက်လျက် ရှိပါကြောင်း၊ ဥပဒပြုရေးလုပ်ငန်းသည် လွှတ်တော်၏ အဓိက တာဝန် ဖြစ်သည်နှင့်‌အညီ ဥပဒေများ ပြဋ္ဌာန်းရာ၌ ပြည်သူများ၏ အကျိုးစီးပွား မြှင့်‌တင်နိုင်ရေးနှင့်‌ ပြည်သူများ လိုက်နာနိုင်သော ဥပဒေဖြစ်ရေး အလေးထား ဆောင်ရွက်လျက် ရှိပါကြောင်း၊ လွှတ်တော်များကို ပြည်သူ့ ကိုယ်စားလှယ်များဖြင့်‌ ဖွဲ့စည်းထားခြင်း ဖြစ်၍ ပြည်သူ့အကျိုး စီးပွား ဖြစ်ထွန်းစေသော ဥပ‌ဒေများကိုသာ ပြဋ္ဌာန်းပေးရမည် ဖြစ်ကြောင်း။
လွှတ်တော် ရပ်နားထားစဉ် ကာလအတွင်း တိုင်းဒေသကြီးနှင့်‌ ပြည်နယ်များသို့ သွားရောက်၍ ပြည်သူများနှင့်‌ တိုက်ရိုက် တွေ့ဆုံပြီး ပြည်သူ့အသံများကို နားထောင်ကာ လွှတ်တော် အတွင်းသို့ သယ်ဆောင်၍ အဆိုများ၊ ဥပဒေများ ဖြစ်ပေါ်လာသည် အထိ လုပ်ဆောင်လျက် ရှိပါကြောင်း၊ ပြည်သူ့ အကျိုးစီးပွားကို အဓိကထား ဆောင်ရွက် ပေးကြမည့် လူမှု အဖွဲ့အစည်းများ အနေဖြင့်‌ ပြည်သူနှင့်‌ အစိုးရကြား အဆင်ပြေ ချောမွေ့အောင် ပြည်သူ့ အကျိုးအတွက် ဆောင်ရွက်သင့်‌သည့် လုပ်ငန်းများ ရှိပါက ပွင့်ပွင့်လင်းလင်း တင်ပြကြရန် ဖိတ်ခေါ်ပါကြောင်းဖြင့်‌ ပြောကြားသည်။
ထို့နောက် တက်ရောက် လာကြသည့် တိုင်းဒေသကြီး လွှတ်တော် ကိုယ်စားလှယ်များ၊ လူမှု အဖွဲ့အစည်းများမှ တာဝန်ရှိသူများ၊ မြန်မာနိုင်ငံရုပ်ရှင် အစည်းအရုံး၊ မြန်မာနိုင်ငံ သဘင် အစည်းအရုံးနှင့် မြန်မာနိုင်ငံ ကွန်ပျူတာ အသင်းချုပ်တို့မှ ကိုယ်စားလှယ်များက နိုင်ငံရေး၊ စီးပွားရေး၊ ဘဏ္ဍာရေး၊ ဥပဒေပြုရေး ဆိုင်ရာ ကိစ္စရပ်များနှင့်‌ ပြည်သူများ၏ လိုအပ်ချက်များကို ဆွေးနွေး တင်ပြကြသည်။
ဆက်လက်၍ တိုင်းဒေသကြီး ဝန်ကြီးချုပ် ဦးမြင့်‌ဆွေက ယနေ့ တွေ့ဆုံပွဲတွင် ရန်ကုန် တိုင်းဒေသကြီး အတွင်းရှိ လူမှု အဖွဲ့အစည်း အားလုံးနီးပါးကို ဖိတ်ကြားပြီး ဆွေးနွေးခြင်း ဖြစ်သကဲ့သို့ တင်ပြကြသည့် အချက်အလက် များသည်လည်း တိုင်းဒေသကြီး အတွင်း လိုအပ်ချက်များနှင့် ဆက်လက် လုပ်ဆောင်သွားရမည့် လုပ်ငန်းများ ဖြစ်သည်ကို တွေ့ရှိရပါကြောင်း၊ တင်ပြချက်များ အနက် ပြည်ထောင်စု အဆင့်က ဆောင်ရွက်ရမည့် လုပ်ငန်းများ ပါဝင်သကဲ့သို့ အချို့တင်ပြချက်များသည် တိုင်းဒေသကြီးအစိုးရအဖွဲ့က လုပ်ဆောင်ရမည့် အပိုင်းဟူ၍ တွေ့ရှိရပါကြောင်း။
ကျေးရွာချင်းဆက် လမ်းကဲ့သို့သော ဒေသဖွံ့ဖြိုးရေး တင်ပြချက်များသည် တိုင်းဒေသကြီး အစိုးရအဖွဲ့က ဆောင်ရွက်ပေးရမည့် လုပ်ငန်းဖြစ်ပါကြောင်း၊ ကျူးကျော် အိမ်ယာများနှင့် ပတ်သက်၍ ဥပဒေနှင့်အညီ ဆောင်ရွက်နေခြင်း ဖြစ်ပါကြောင်း၊ ဥပဒေနှင့်အညီ ဆောင်ရွက်ရာတွင် သတ်မှတ် ထားသည့် အချိန်အခါအလိုက် ဥပဒေ လုပ်ထုံး လုပ်နည်းနှင့် အညီ ဆောင်ရွက်ခဲ့ခြင်း ဖြစ်ပါကြောင်း၊ ဥပဒေနှင့်အညီ လုပ်ဆောင် ရာတွင်လည်း လုပ်၍ရသည့် အပိုင်းရှိသကဲ့သို့ လုပ်၍ မရသည်များလည်း ရှိပါကြောင်း၊ အချိန်အခါ တစ်ခုကို စောင့်ဆိုင်းပြီး အချို့ကိစ္စရပ်များသည် ညှိနှိုင်း ဆောင်ရွက်ရသကဲ့သို့ အချို့ညှိနှိုင်း၍ မရသည့် ကိစ္စများကို ဥပဒေနှင့်အညီ ဆောင်ရွက်ရပါကြောင်း။
တိုင်းဒေသကြီး အတွင်း တရားဥပဒေ စိုးမိုးရေးနှင့် တည်ငြိမ် အေးချမ်းမှုရှိရေး အတွက် သတ်မှတ် ပြဋ္ဌာန်းထားသည့် ဥပဒေများနှင့်အညီ တစ်ဆင့်ပြီးတစ်ဆင့် ဆောင်ရွက် နေပါကြောင်း၊ ယနေ့ တင်ပြချက်များနှင့် စပ်လျဉ်း၍ ပြည်ထောင်စုအဆင့်က ဆောင်ရွက် ရမည့်ကိစ္စများကို ထုတ်နှုတ်၍ ဆက်လက် တင်ပြပေးသွားမည် ဖြစ်ကြောင်း၊ တိုင်းဒေသကြီး လွှတ်တော် အစည်းအဝေးများတွင်လည်း ကိုယ်စားလှယ်များ၏ တင်ပြချက် များအပေါ် အစည်းအဝေး ကာလအတွင်း ဆောင်ရွက် ပေးနိုင်သည်များကို ဆောင်ရွက် ပေးပြီး အချို့ကိစ္စရပ်များကို အစည်းအဝေး ပြီးသည်နှင့် ဆက်လက် ဆောင်ရွက် ပေးနေပါကြောင်း၊ သို့သော်လည်း ပြည်ထောင်စုအဆင့်သို့ တင်ပြရမည့် လုပ်ငန်းများဆိုလျှင် အချိန်ကာလတစ်ခု စောင့်ဆိုင်းရမည် ဖြစ်ကြောင်း၊ ရရှိသည့် ဘတ်ဂျတ်အပေါ် မူတည်ပြီး ဆောင်ရွက်ရခြင်း ဖြစ်၍ ချက်ချင်း လုပ်ဆောင်၍ မရနိုင်ပါကြောင်း၊ ယနေ့ တင်ပြချက်များကို မှတ်သားကာ မိမိတို့ တိုင်းဒေသကြီး အစိုးရအဖွဲ့အနေဖြင့် ဆက်လက် ဆောင်ရွက် ပေးသွားမည် ဖြစ်ပါကြောင်းဖြင့် ရှင်းလင်း တင်ပြသည်။
ထို့နောက် တိုင်းဒေသကြီး လွှတ်တော် ဥက္ကဋ္ဌ ဦးစိန်တင်ဝင်းက မိမိတို့ လွှတ်တော် အပိုင်းနှင့် ပတ်သက်၍ လွှတ်တော် ခေါ်ယူကျင်းပရခြင်း ကိစ္စရပ်များတွင် တိုင်းဒေသကြီး/ ပြည်နယ် လွှတ်တော်ဆိုင်ရာ ဥပဒေအရ လွှတ်တော် ပုံမှန်အစည်းအဝေး တစ်ခုနှင့်တစ်ခု အကြား (၆)လထက် မပိုရပါကြောင်း၊ လွှတ်တော် ဥက္ကဋ္ဌသည် အထူး အစည်းအဝေးနှင့် အရေးပေါ် အစည်းအဝေးကို ခေါ်ယူ ကျင်းပနိုင်ပါကြောင်း၊ တိုင်းဒေသကြီး ဝန်ကြီးချုပ်မှ လွှတ်တော် အထူးအစည်းအဝေးနှင့် အရေးပေါ် အစည်းအဝေးကို အကြောင်းကြားပြီး အထူး အစည်းအဝေးနှင့် အရေးပေါ် အစည်းအဝေး ကျင်းပရပါကြောင်း၊ တိုင်းဒေသကြီး လူထုအကျိုးအတွက် အလျင်အမြန် ဆောင်ရွက်ရမည့် ကိစ္စများတွင် အထူး အစည်းအဝေးနှင့် အရေးပေါ် အစည်းအဝေးကို ခေါ်ယူ ကျင်းပရခြင်း ဖြစ်ပါကြောင်း။
မိမိတို့ လွှတ်တော်ကို ပြည်သူများက တိုင်ကြားစာများ ပေးပို့ခြင်းရှိပါကြောင်း၊ ၂၀၁၁ ခုနှစ်တွင် တိုင်ကြားစာ အစောင် (၅၀)ခန့်၊ ၂၀၁၂ ခုနှစ်တွင် အစောင် (၁၅၀)ခန့်၊ ၂၀၁၃ခုနှစ်တွင် အစောင်(၅၀၀)ကျော်၊ ယခု ၂၀၁၄ခုနှစ်တွင် အစောင် (၅၀၀) နီးပါး ရှိပါကြောင်း၊ ၎င်းတိုင်ကြားစာများကို သက်ဆိုင်ရာ ကော်မတီများသို့ ပေးပို့ပြီး ဆက်လက် ဆောင်ရွက်လျက်ရှိပါကြောင်း၊ မိမိတို့အနေဖြင့် ဖွဲ့စည်းပုံ အခြေခံဥပဒေအရ အုပ်ချုပ်မှုနှင့် ဆိုင်သည့် ကိစ္စများကို အစိုးရအဖွဲ့သို့ ပေးပို့ပြီး တရားရေးနှင့် ဆိုင်သည့် ကိစ္စများကို တိုင်းဒေသကြီး တရား လွှတ်တော်ချုပ်သို့ ပေးပို့ပါကြောင်း၊ ၎င်းတို့ထံမှ ပြန်ကြားချက်များကို သက်ဆိုင်ရာ တိုင်ကြားသူ ပြည်သူများထံ ပြန်လည်ပေးပို့ ဆောင်ရွက်လျက် ရှိပါကြောင်း။
လွှတ်တော် ကော်မတီများ ဖွဲ့စည်းမှုနှင့် ပတ်သက်၍လည်း ဥပဒေနှင့်အညီ ဆောင်ရွက်ခြင်း ဖြစ်ပါကြောင်း၊ မြန်မာနိုင်ငံ လွှတ်တော်ဆိုင်ရာ အဖွဲ့၏ တောင်းဆိုချက်အရ မိမိတို့ လွှတ်တော် ကိုယ်စားလှယ်များထံသို့ ဖွဲ့စည်းပုံ အခြေခံဥပဒေ ပြင်ဆင်ရေးတွင် အကြံပြုချက်များ ပေးပါရန် တောင်းဆိုခဲ့ပါကြောင်း၊ ကိုယ်စားလှယ်များ၏ အကြံပြုချက်များကို စုစည်းပြီး မြန်မာနိုင်ငံ လွှတ်တော်ဆိုင်ရာ အဖွဲ့သို့ ပေးပို့သကဲ့သို့ မိမိတို့ကိုယ်တိုင်လည်း ဆွေးနွေးပွဲ ပြုလုပ်ပါကြောင်း၊ မိမိတင်ပြခဲ့သည့် လွှတ်တော် ကျင်းပရေးဆိုင်ရာကိစ္စနှင့် လွှတ်တော် ကော်မတီများ ဖွဲ့စည်းခြင်း ကိစ္စတို့နှင့် ပတ်သက်၍ ပြင်ဆင်ချက်များ ပေးပို့ခြင်း မရှိခဲ့ပါကြောင်းဖြင့် ရှင်းလင်း တင်ပြကြသည်။
တင်ပြချက်များ အပေါ် ပြည်ထောင်စု လွှတ်တော် နာယက က ခြုံငုံသုံးသပ် ဆွေးနွေး ပြောကြားရာတွင် ယနေ့ တင်ပြချက်များကို ပြန်လည် သုံးသပ်ရာ၌ အချို့ကိစ္စများသည် အဆင့်ဆင့်သော အုပ်ချုပ်ရေး အဖွဲ့များက ဆောင်ရွက်ရမည်ဖြစ်ပြီး အချို့ကိစ္စများသည် လွှတ်တော်များ အပိုင်းက ဆောင်ရွက်ပေးရန် ဖြစ်ကြောင်း၊ အုပ်ချုပ်ရေး အပိုင်းက ဆောင်ရွက် ပေးရမည့် ကိစ္စရပ်များသည် ထုတ်ပြန်ထားသော ဥပ‌ဒေများ အရ ဆောင်ရွက် ပေးရန် ဖြစ်ကြောင်း၊ ဥပဒေပြုရန် လိုအပ်သည့် ကိစ္စရပ်များကို တိုင်းဒေသကြီး လွှတ်တော်နှင့်‌ ပြည်ထောင်စု လွှတ်တော်တို့က လုပ်ဆောင်ပေးရမည် ဖြစ်ကြောင်း။
ယခု လွှတ်တော် သက်တမ်း (၄)နှစ်အတွင်း ပြည်ထောင်စု လွှတ်တော်တွင် ဥပဒေပေါင်း (၁၂၆)ခု ပြင်ဆင်ရေးဆွဲ အတည်ပြု ပြဋ္ဌာန်းနိုင်ခဲ့ပြီး ဆွေးနွေးဆဲ ဥပဒေကြမ်း (၄၀)ခန့် ရှိကြောင်း၊ ဥပဒေများ ပြဋ္ဌာန်းရာတွင် ပြည်ထောင်စုအဖွဲ့ အစည်းဝင်များနှင့်‌ လွှတ်တော် ကိုယ်စားလှယ်များက ဥပဒေကြမ်းကို တင်သွင်းခွင့်‌ရှိကြောင်း၊ ဥပဒေကြမ်းများ အပေါ် စိတ်ဝင်စားသည့် မည်သည့် နိုင်ငံသားမဆို ပါဝင်ဆွေးနွေး အကြံပြုနိုင် ပါကြောင်း၊ ပြည်ထောင်စု လွှတ်တော်က ပြဋ္ဌာန်းထားသော ဥပ‌ဒေများသည် တရားမျှတမှု ရှိပြီး အများ လိုက်နာနိုင်သော ဥပဒေများ ဖြစ်ရန် လိုကြောင်း၊ ထို့ပြင် အပြည်ပြည်ဆိုင်ရာ ကွန်ဗင်းရှင်း၊ Treaty များနှင့်လည်း ကိုက်ညီရန် လိုကြောင်း၊ တည်ဆဲ ဥပဒေတစ်ရပ်ကို ပြင်ဆင်ပေးရန် လိုအပ်ပါက အမြန်ဆုံး ပြင်ဆင် ဆောင်ရွက်ပေးမည် ဖြစ်ကြောင်း၊ မိမိတို့ လွှတ်တော်တွင် တည်ဆဲ ဥပဒေများနှင့်‌ ပြဋ္ဌာန်းပြီး ဥပဒေများကို လိုအပ်ပါက  ပြန်လည် ပြင်ဆင်ပေးသည့် သာဓကများ ရှိပါကြောင်း။
ယနေ့ခေတ်သည် ဒီမိုကရေစီ စနစ်ဖြစ်သည်နှင့်‌အညီ ပြည်သူများ၏ အလိုကျ သက်ဆိုင်ရာ အဖွဲ့အစည်းများက အုပ်ချုပ်ရမည်ဖြစ်ကြောင်း၊ လွှတ်တော်များက ပြည်သူ့ဆန္ဒ သဘောထားများနှင့်အညီ ပြည်သူတို့၏ အကျိုးစီးပွားကို ဖော်ဆောင်နိုင်မည့် ဥပဒေများ ပြဋ္ဌာန်းပေးရန်ဖြစ်ပြီး ယင်းဥပ‌ဒေများနှင့်‌ အညီ အုပ်ချုပ်ရန် လိုကြောင်း၊ လွှတ်တော်သည် ပြည်သူ့ ကိုယ်စားလှယ်များဖြင့်‌ ဖွဲ့စည်းထားပြီး အပြန်အလှန် ထိန်းကျောင်းခြင်းများ ဆောင်ရွက်ရပါကြောင်း၊ လွှတ်တော်၏ လုပ်ငန်းများနှင့် စပ်လျဉ်း၍လည်း အုပ်ချုပ်ရေး အဖွဲ့များ၊ တရားရေး အဖွဲ့များက ဖွဲ့စည်းပုံ အခြေခံဥပဒေနှင့် ညီ၊ မညီ ၊ ပြည်သူများ အကျိုးစီးပွား ဖြစ်ထွန်းခြင်း ရှိ၊ မရှိ တို့ကို ပြန်လည် ထောက်ပြရန်လိုကြောင်း၊ သက်ဆိုင်ရာ ဝန်ကြီးဌာနများမှ ပုဂ္ဂိုလ်များအနေဖြင့်‌ ဥပဒေပြုရေးတွင် ပါဝင် ဆောင်ရွက်ခြင်းဖြင့်‌ ဥပဒေများ ပြဋ္ဌာန်းရာတွင် ပိုမိုမြန်ဆန် လွယ်ကူလာမည် ဖြစ်ကြောင်း။
မိမိတို့နိုင်ငံသည် လွှတ်တော် အတွေ့အကြုံ အားနည်းပြီး မိမိအပါအဝင် လွှတ်တော် ကိုယ်စားလှယ်များ အပိုင်းကလည်း လွှတ်တော် အတွေ့အကြုံ နည်းကြပါကြောင်း၊ လွှတ်တော်များ ဖွဲ့စည်း ပေါ်ပေါက်လာပြီး နောက်ပိုင်း ယခင် ပြဋ္ဌာန်းထားသည့် ဥပဒေများကို ခေတ်စနစ်နှင့်‌ ညီညွတ်အောင် ပြင်ဆင်၊ ပယ်ဖျက်၊ အသစ်ရေးဆွဲခြင်းများ ဆောင်ရွက် ခဲ့ရပါကြောင်း၊ ပါတီစုံ ဒီမိုကရေစီနှင့် ဈေးကွက် စီးပွားရေး စနစ်နှင့်‌ လိုက်လျော ညီထွေမှု ရှိသည့် ဥပဒေများရှိရန် လိုပါကြောင်း၊ မိမိတို့နိုင်ငံကို ပြုပြင် ပြောင်းလဲရေး လုပ်ဆောင်မည် ဆိုလျင် တည်ဆဲဥပဒေများကို ပြုပြင် ပြောင်းလဲရန် လိုအပ်ပြီး ပြဋ္ဌာန်းပြီး ဥပဒေများ အသက်ဝင် လာအောင် နည်းဥပဒေ စည်းမျဉ်း စည်းကမ်းများ လိုအပ်မည် ဖြစ်ကြောင်း။
နိုင်ငံတော်ကို ပါတီစုံဒီမိုကရေစီနှင့်‌ ဈေးကွက် စီးပွားရေးစနစ် ကျင့်‌သုံးပြီး ခေတ်မီ ဖွံ့ဖြိုးတိုးတက်သော နိုင်ငံတော်ကြီး ဖြစ်ထွန်း လာရေးအတွက် နိုင်ငံတော်အစိုးရ၊ လွှတ်တော် ကိုယ်စားလှယ်များနှင့်‌ ပြည်သူများ အားလုံး တက်ညီလက်ညီ ပူးပေါင်း ဆောင်ရွက် သွားကြရန် တိုက်တွန်း ပါကြောင်းဖြင့်‌ ပြောကြားသည်။

တွေ့ဆုံပွဲအပြီးတွင် ပြည်ထောင်စု လွှတ်တော် နာယကသည် တက်ရောက် လာကြသော လူမှု အဖွဲ့အစည်းများမှ ကိုယ်စားလှယ်များအား ရင်းရင်းနှီးနှီး လိုက်လံ နှုတ်ဆက်ခဲ့သည်။

No comments:

Post a Comment